High Court

Delhi Excise Policy Thubuai: CBI-te Hnenah Trial Court Thutlukna Dik Lohna Sawifiah Turin High Court-in Hriattir

15/10/2026
Admin

Delhi High Court chuan October 14, 2026 khân, Delhi excise policy thubuai a Arvind Kejriwal, Manish Sisodia leh thubuai nei dang 21-te trial court-in a discharge-naa thil dik lo awm nia an hmuh te chu chiang tak a tarlang a, an sawifiahna thehlut turin Central Bureau of Investigation (CBI) chu a hriattir. CBI chu trial court thutluknaa an khinlet ber chu fiah tak a sawi turin a ti a, trial court-in finfiahna a ngaihtuah tel loh emaw, a ngaihtuah dan a dik lo emaw, dan hman dik loh emaw te chu chiang tak a tarlang a, thliar hrang turin a ti bawk. He thubuai hi November 5, 2:30 pm-ah ngaihtuah leh a ni ang.Justice Sachin Datta chuan CBI chu trial court thutluknaah chuan khawi lai nge dik lo an tih chu fiah tak a sawi turin a ti a, “Eng nge dik lo chu ni a, min hrilh rawh,” tiin CBI chu a zawt a ni. Court chuan trial court-in finfiahna te chu chik takin a zirchiang ngei tih a hmu a, charge siam tur nge tur loh tih ngaihtuah hun laiin ngaihtuah tur chin aia thui a kal em tihte a ngaihtuah bawk. Trial court thutlukna chu engvanga ennawn leh anihna chhan tur chu chiang tak a sawi turin High Court chuan CBI chu a ti a ni.CBI ngaihdan chuan excise policy thlak danglamna chuan sumdawng mi thenkhat duhsakna a pek thu an thlen a. Tin, trial court chuan thuhretute thu sawi pawimawh tak tak, lehkha pawimawh leh digital evidence te chu a ngaihtuah tel loh thu an thlen a. February 27 khân, trial court chuan Delhi Excise Policy thubuaia pawikhawihtua puh zawng zawng 23-te chu an puhnaa thu tling leh innghahna tlak a awm loh avangin, thubuai atangin trial court chuan a chhuah zalen (discharge) a. Hetah hian Trial Court chuan CBI thil chhui dan chu a dem hle a, an puhna chungchangah hian thu tling leh fiah tak a awm loh thu Court chuan a lo sawi tawh a ni. Hemi hnu hian CBI chuan trial court thutlukna hi High Court-ah an khing let ta a ni.CBI-in High Court-a an khinlet hnu hian, Kejriwal leh Sisodia te hian High Court-a an thubuai ngaihtuahtu judge, Justice Swarana Kanta Sharma chu duhsak bik nei thei tura rinlelhna an neih avangin an thubuai chu ngaihtuah lo va, inhnukdawk turin an ngen a, mahse an ngenna chu hnawl a ni a. An ngenna hnawl anih hnu hian, Kejriwal leh Sisodia te chuan, he thubuai ngaihthlak lehnaah hian an tel tawh dawn loh thu an lo sawi tawh a ni(www.jclalnunsanga.in)(He thubuai hi CBI v. Kuldeep Singh & Ors. a ni)

Kerala High Court-in Zirlai Hrem Avanga Zirtirtu Laka Thubuai Thehluh Thiat; Zirtute’n Naupang Thunun Nan Hremna Lekkawh A Ngaih Thu Sawi

15/10/2026
Admin

Kerala High Court chuan October 9, 2026 khân zirtirtu pakhatin naupang thuawih lo a hrem naah, naupangin hliam a tawrh phah tia puhna thubuaiah, zirtirtu an puhna te a thiat. Justice Jobin Sebastian chuan he thutlukna hi siamin, zirtirtu te chu naupang te’n nunkawng dik an zawhna tur leh thiamna pe turin dinhmun pawimawh tak chelh an nih thu a sawi a. Naupang te thununna atana hremna lek kawh pawh a tul chang a awm thin thu a sawi.He zirtirtu hi Juvenile Justice (Care and Protection of Children) Act, 2015 hnuaiah thubuai awrh tir a ni a. Court chuan zirtirtute chu zirlaite mizia leh nungchang tha chher chhuahna kawngah mawhphurhna pawimawh tak nei an nih thu a sawi a. Zirlaite zirtir leh thunun chu an tihtur leh mawhphurhna a nih thu a sawi a. Naupang chunga rilru tha lo leh tihnat duh vang hrim hrim ni miah loa thununna tenau pek chu thubuai siamsak nan a tling lo tiin Court chuan a sawi a. Amaherawhchu, zirtirtuin naupang chunga pawikhawih tumna neia hremna a lekkawh erawh chu chu dan ang taka hrem tur an nih thu a sawi chiang bawk. He thubuai ah hian zirtirtu hian naupang chunga pawi khawih tumna rilru a nei lo tih hmuin, a laka thubuai awm te chu a thiah sak ta a ni.He thil hi December 6, 2018-a Thiruvalla, Kerala-a school pakhat a thleng a ni a. Class-5 zirlai naupang hi classroom chhungah a tlan kual a, zirtirtu hian a kut ah manin a thutnaa thut tir tumin a pawt phei a. A pawh lai hian naupang ke chu thuthlengah a tang a, a khup dinglamah hliam a tawrh phah ni a sawi a ni a. Police hnenah January 16, 2019 khân a chhungte chuan thubuai hi an thehlut a. Zirlai dang he thil thlen laia awm ve te atanga a lan danin, zirtirtu hian naupang hi tihnat tumna rilru a nei lo tih a lang a. Medical report pawhin a hliam tawrh hi thil lian tham a nih loh thu a sawi bawk(www.jclalnunsanga.in)

Drishyam: The Conclusion Film Chu Online Piracy Laka Venhim Anih Theih Nan Delhi High Court-in Hma La

15/10/2026
Admin

Delhi High Court chuan film chhuak thar tur Drishyam: The Conclusion chu tlangzarh a nih hmaa online piracy laka a venhim a nih theih nan, film hi chhuah a nih hma in Court-in piracy thleng thei laka venhimna a pe. Justice Purushaindra Kumar Kaurav chuan website 9-te leh a khawihtute chu phalna telloa he film hi upload, stream, emaw en leh download theih tura an pho chhuah a khap sak a. He film hi October 2, 2026 khân tlangzarh tura ruahman a ni a. Film siamtute chuan copyright nei film-te phalna telloa pe chhuak thin nia puh website-te’n piracy a thlen theih avangin Court hi an pan a. He film siamtute film hmasa ‘ Jolly LLB 3’ chu heng website te hian phalna tel lova an lo thehdarh nasat tawh thu an thlen bawk a ni.Court chuan piracy hian film siamtute tan chhiatna lian tak a thlen thei a, chutiang chhiatna leh an thil hloh te chu sum ringawta thawidam mai theih a nih loh thu an sawi bawk. Court chuan thubuai thehluttu te tana thubuai kalpui tur a innghahna tling tawk awmin a hmu a, interim injunction a chhuah nghal a. Court chuan thuneitute chu hriattirna leh finfiahna an dawn atanga darkar 72 chhungin he dan bawhchhetute chu an domain block emaw deactivate sak turin a ti a.Sorkar aiawh te pawh he thutlukna hi zawm a ni ngei em tih enfiah tura hriattir a. Tin, thubuai thehluttu chu thubuai tha taka kalpui a nih a, chet lak a nih theih nan domain hming Registrar te, internet service pechhuaktu te leh sorkar department-te chu he thubuaia dah tel a phal sak bawk(www.jclalnunsanga.in) (He thubuai hi Digital18 Media (P) Ltd. v. SSRMovies.style, CS(COMM) 1083/2026 and I.A. 27399 and 27405/2026 a ni, thubuai thehluttu tan Adv. Sidharth Chopra, Adv. Yatinder Garg leh ukil dangte an ding a, a leh lam tan Satya Ranjan Swain, CGSC leh Adv Naveen Dedha te an ding)

Bombay High Court Chuan Chungkaw Pakhat Kristian-a Inlet Tura Nawr Luitu Anga Puh Mi Pali Te Thubuai A Thiat

14/10/2026
Admin

Bombay High Court (Nagpur Bench) chuan mi pakhat leh a chhungte Hindu atanga Kristian-a inlet tura nawr luitu anga puh mi pali te laka FIR leh charge-sheet thehluh te chu a thiat. Court chuan BNS hnuaia puhna awm turin thu tling a awm loh thu an sawi a. Chutih rualin, Section 299 hnuaia thubuai siamna turin Bharatiya Nagarik Suraksha Sanhita (BNSS) Section 217 hnuaia sorkar phalna (sanction) lak tur pawh lak a ni lo tih an hmu a. Chutih rualin, heng thil thleng nia sawite hi kum 2025-a thleng a ni a, Maharashtra sorkar-in thlemna hmanga sakhaw danga inlehtir khapna dan a hman tan hma a ni tih a tarlang bawk.Thubuai thehluttu hi Chandur Bazar-a tlawmngai pawl pakhat a social worker a ni , pawikhawihtua puh te hian amah leh a nupui chu Kristian-a inlehtir tumin an nawr lui niin hekna a thehlut a. Thubuai thehluttu sawi danin, pawikhawihtu a puh te zinga pakhat chuan, a fate zirna man tumsak leh in sak sak turin a tiam niin a sawi a. Chu bakah, sorkar lehkha pawimawha an sakhua chu 'Kristian' ti a ziak turin nawrna leh Sunday school-ah naupangte chu Kristian-a inlet turin an thlem niin a sawi bawk. Ni 14 January, 2026-a FIR ziah luh a nih a, charge-sheet thehluh a nih hnuin, heng mi te hian an thubuai hi hlihsak sak turin High Court an pan ta a ni.Justice M.W. Chandwani chuan mahni sakhua thehdarh tura hmalakna leh mi dangte sakhaw thara inlehtir tura sawmna hrim hrim hi sakhaw rilru tihbawrhbanna a ni lo tih a sawi a. Court chuan Section 299 hnuaia dik lo taka chetna emaw Section 302 hnuaia tawngkam, ri leh chet ziaa sakhaw rilru hliam tumna a awm lo tih a hmu bawk a ni(www.jclalnunsanga.in)(He thubuai hi Joseph S/o Vishwashrao Khudawant & Ors. v. The State of Maharashtra & Anr. (Neutral Citation: 2026:BHC-NAG:13533) a ni a. Thubuai thehluttute tan Advocate Deepak Khushlani a dik a, sorkar tan APP D.I. Charlewar a ding)

Gauhati High Court-in Mimal Ram Inchuhna Thubuaiah Lok Adalat Thutlukna A Thiat; Lok Adalat Award Chu Endik Theih Nih Thu Sawi

13/10/2026
Admin

Gauhati High Court chuan October 12, 2026-a thutlukna a siamah, Kolasib Lok Adalat-in thutlukna a lo siam tawh chu a thiahsak. He thubuai hi ram inchhuh chungchang a ni a, a hmaa Lok Adalat thutlukna hian thubuai thehluttu ram ṭhenkhat chu midang hnena pek tawh anga sawi chu a lo pawmpui tawh a. Thubuai thehluttu chuan he inremsiamnaah hian chiang taka remtihna pek leh mahni duhthu ngeia remtihna pek a awm loh thu a sawi a. Tin, thutlukna innghahna ‘gift deed’ chungchangah pawh hian inhnialna a awm thu a thlen a ni.He thubuai hi Justice Helen Dawngliani chuan a ngaihtuah a, he thutlukna hi a siam a. High Court chuan Lok Adalat award, inremsiamna dik tak hmanga neih chu thutlukna tawp anga ngaih tur ni mah se, Lok Adalat award chu khinlet theih loh a ni tihna a nih loh thu a sawi chiang a. India Danpui Article 226 leh 227 hnuaiah, Gauhati High Court chuan engemaw bik thilah heng- inbumna thil, remtihna awm lohna, principles of natural justice kalh, leh jurisdiction kalh a nih chuan Lok Adalat award chu endik leh theih thu a sawi bawk. Court chuan Lok Adalat chu pawl pahnih te’n anmahni remtihna ngeia inremsiamna an neihna hmun tur anih thu a sawi a ni.High Court chuan record awm te atanga a lan danin Lok Adalat-a an inremsiamna chu mahni duhthu ngeia an pawm tlan vek ngei a ni tih lantirna awm lo tih a hmu a. Chuvangin, September 14, 2024-a Lok Adalat-in award a lo pek tawh chu a tihtawp sak a, court pan tha tur a zalenna a pe tel bawk a ni.He thutlukna hian mipuite tana fimkhur a pawimawhzia a tarlang tel a: Lok Adalat award hi a dan pangngaiah chuan thutlukna tawp a ni a, amaherawhchu Lok Adalat award hi endik theih loh chu a ni lo tih a sawi chiang a ni(www.jclalnunsanga.in)(He thubuai hi Joseph Vanlalawmawma v. Vanlalfaka and Another (CRP No. 3/2025) a ni a, thubuai thehluttu tan Adv. S. Vanlalhriata a ding a, a leh lam tan Emily L. Chhangte, Legal Aid Counsel a ding)

Karnataka High Court-in Engineer-te Hming Hmaa ‘Er’ Hman A Phalsakna Thubuaiah State Sawrkar Te Insawifiahna Pe Turin Ti

13/10/2026
Admin

Ni 9, October 2026 khan Karnataka High Court chuan state sorkar-in engineer-te'n an hming hmaah 'Er' tih an hman a phalsakna duh lohna thubuaiah State sorkar chu an insawifiahna pe turin a ti a. Justice CM Poonacha chuan he thubuai hi ngaihtuahin, November 16-ah ngaihtuah leh tur a dah a ni.September 15, 2026 khan Karnataka State sorkar chuan Karnataka-a engineer-te chu he chawimawina hming (honorific), an hming hmaa ‘Er’ dah chu phalsak an nih thu a chhuah a. He mi chungchanga sorkar thuchhuah chu Advocate Beerappa N-a chuan khingletin, ani hian State sorkar-in chutiang chawimawina hming pe turin thuneihna an neih leh neih loh chungchangah zawhna a siam a.Sorkar thutlukna chuan chhan leh vang chiang tak leh innghahna mumal a neih loh thu a thlen a. India Danpui Article 14-naa intluktlanna a bawhchhiat thu a thlen a. He thubuaiah hian profession pakhat chutianga chawimawina hming pek an nih chuan profession hrang hrang te inkarah inenhniamna leh intluktlan lohna a siam theih thu a sawi bawk a ni (www.jclalnunsanga.in)(He thubuai hi Beerappa N vs State of Karnataka a ni. Thubuai thehluttu tan Adv. Trivikram SS a ding)

DISCLAIMER