High Court

Gauhati High Court Chuan Assam Rifles Hmun Hluia Thingkung Kih Chungchanga PIL A Ngaihtuah

24/04/2026
Admin

Ni 20 April, 2026 khan Gauhati High Court chuan Bazar Bungkawn atanga Treasury Square inkar kawng meter 14-a tih zau tumna avanga Assam Rifles hmun hlui a thing lian leh upa tak tak kih thluk tum chungchanga PIL chu a ngaihtuah a. Gauhati High Court tana ding Senior Counsel, TJ Mahanta leh Mizoram Additional Advocate General, P Bhattacharyya-te hnen atanga thupawimawhte a ngaihthlak hnuin, Court chuan he thil a mawhphurtu (respondents) hnenah notice a chhuah a. Thutlukna siam hma atana hmalak lawkna atan, Court chuan thutlukna dang a siam hma chu Mizoram sorkar chu he lai hmuna thingte hi kih chhunzawm lo turin thupek a chhuah nghal bawk a. He thubuai hi Division Bench, Justice Michael Zothankhuma leh Justice Kaushik Goswami-te’n an ngaihtuah a. Thubuai ngaihtuah leh hun chu May 18, 2026-ah an ruat nghal bawk.He hmalakna hi environmental activist Saizampuii Sailo-in Centre for Environment and Social Justice (CESJ) aiawha March 25, 2026-a ziaka thu a thehlut atanga intan a ni a. Saizampuii chuan Mizoram sorkarin thing 174 vel kih a tum thu leh, heng thingte hi khawpui tana boruak thianghlim petu pawimawh tak an nih thu a tarlang a. Aizawl khawpui chu in leh building-in a khat tawh hle a, heng thingte kih thluk hian kan chhehvel boruak a tichhe zual dawn hle a ni tih a tarlang bawk.Court chuan April 2026-a The Times of India, The Assam Tribune, leh Aizawl Post-a chanchin thar lo chhuahte pawh a ngaihtuah tel a. Heng chanchinbu-ah hian he lai hmunah hian thing 400 chuang a awm thu leh, chung zinga 174 chu kih thluk tura chhinchhiah an nih thu ziah a ni. Heng thing zinga thenkhat hi kum 100 zeta upa an ni tawh a, thing pakhat phei chu kum 1850-a phun tawh kha a ni nghe nghe. Court chuan helai hmunah hian kum 1897-a sak tawh ‘heritage site’ chhiar theih ‘barrack’ a awm bawk tih a sawi.(www.jclalnunsanga.in)(He thubuai PIL(Suo Moto)/1/2026 XXX vs In Re The State of Mizoram & 4 Ors Rep by the Chief Secretary, Mizoram Secretariat ah hian petitioner tan TJ Mahanta, SC, GHC a ding)

Gauhati High Court chuan vawiin khan Mizo ukil pathumte Senior Advocate designation a pe.

24/04/2026
Admin

Gauhati High Court chuan vawiin 24.14.2026 khan Mizo ukil pathumte Senior Advocate designation a pe. Heng Senior Advocate designation a pekte hi Pi Dinary T Azyu, Pu C Zoramchhana leh Pu F Lalengliana te an ni.Pi Dinary T Azyu hun rei tak High Court a sawrkar ukil lo ni tawh thin , private practice thlang ta zawk a ni a. All Mizoram Women Federation a Secretary ni lai niin Mizo hmeichhe zinga Senior Advocate Designation nei hmasa ber a ni. A pa Pu A Zakia (L) pawh hi Padma Shri leh National Teacher Award lo dawng tawh a ni.Pu C Zoramchhana hi MNF sawrkar laia Addl Advocate General ni thin kha niin tunah hian NIA, NIT, MRB, NCB ah Standing Counsel ni lai mek a ni. Pu F Lalengliana hi experience tha tak nei niin an kohhran Seven day a rawngbawlna a nasa taka in hmang thin mi a ni a. Mizo Adventist Choir Conductor leh hlaphuah thiam lar tak a ni. India-a Senior Advocate hi ukil chhuanawm, Supreme Court emaw High Court emawin an thiamna, an hmingthanna, leh dan hriatna thuk tak an neih avanga an title pek te an ni. Senior Advocate-te hi zah an kaiin an thusawite pawh hi judge te hian an ngai pawimawh thin. Court a an din pawhin ukil pakhatin a dinpui ve zel tur a ni. An gown hakte pawh hi ukil dangte hak loh ang an ha thin. Ukil rawihna lehkha vakalatnama an ziak/file ve a ngai lo a. Amaherawh chu client te direct in an kawm ve phalsak an ni lo a. Drafting an tih ve a thiang lo bawk.Tun dinhmunah hian ani pathum bakah hian mizo zingah Pu RC Thanga, Pu LH Lianhrima leh Pu C Lalramzauva te kan neih mek te an ni.

Gauhati High Court Aizawl Bench Chuan MUHCS Chungchanga Thubuai Thehluh A Ngaihtuah

23/04/2026
Admin

Ni 22 April 2026 (Nilaini) khan, Gauhati High Court, Aizawl Bench chuan Mizoram State Health Care Society te writ petition thehluh chu a ngaihtuah a. He thubuai hi State Chief Information Commissioner, Mizoram-in ni 9.04.2026-a RTI hmanga Durtlang Hospital leh Sawrkar te inremna pe chhuak tura a thupek atanga lo awm a ni. Commissioner hian dilna siamtu, Pu J. Malsawmzuala Vanchhawng an a thil hriat duh a dil te chu a thlawna pe tur leh hun tiam chhunga pe ngei turin thuneitute a lo hriattir a. He thupek hi MUHSC te chuan dan kalh a nih thu leh thuruk vawnna (confidentiality) leh Right to Information Act, 2005-in a phutna te palzutna a nih thu sawiin an khing let a ni.Court hmaah petitioner-te chuan Synod Hospital, Durtlang, Aizawl nen inremna (agreement) an neih thu an sawi a. He inremnaah hian thuruk vawnna clause khauh tak a awm a, damlo inenkawlna chungchang report leh an chanchin hrim hrim te chu thuruk anga vawn tlat tur a nih thu a chuang a. He hriatpuina hi thuneitu pahnihte hriatpuina leh remtihna (written consent) lo chuan midang hnenah pek chhuah phal a ni lo bawk. He clause behchhan hian SPIO pawhin a hmain hriat duh tarlante hi pek a lo hnar tawh a ni.Nimahsela, he thil hi State Chief Information Commissioner hnen a thlen a nih hnuah, Commissioner chuan tarchhuak turin thupek a chhuah ta a. Petitioner-te hian ni 17.04.2026 khan he thuthlukna hi ennawn leh turin dilna an siam a, mahse ngaihsak a ni lo. High Court hmaah hian Advocate General chuan Commissioner hian Right to Information Act-a Section 19(4), “third party"-te hriatpuina leh thu sawina hun pek tur tih chu a zawm lo tih a tarlang a. Chutih rualin, Act-a Section 19(9) pawh zawm a ni lo tih a sawi bawk.Thil awmdan hrang hrangte a ngaihtuah hnuah, High Court chuan respondent-te hnenah in sawi fiah turin hun a pe a, kar thum chhunga chhanna pe turin a hriattir a ni. Petitioner-te pawh ni thum chhunga notice hi hlan (serve) turin a hrilh bawk. Court chuan ni 9.04.2026-a Commissioner thupek chhuah chu a "stay" (titawp rih) a. He thubuai hi ni 18.05.2026-ah ngaihtuah leh turin tih a ni. Hetiang ang thubuai sawrkar leh sawrkar inkhinna hi thil thleng khat tak a ni. (www.jclalnunsanga.in)(He thubuai WP(C)/40/2026, The Mizoram State Health Care Society r/b the SPIO and Dy. Chief Executive Officer & 2 ors vs State Information Commission & 2 Orsah hian thubuai thehluttute tan Adv. Samuel Vanlalhriata Chhangte a ding a ni)

Arvind Kejriwal-a Excise Policy Case Chungchang Delhi High Court-ah Ngaihtuah A Ni

06/04/2026
Admin

Vawiin ni 6, April 2026 (Thawhtanni) khan Delhi High Court chuan Delhi Excise Policy thila Chief Minister hlui Arvind Kejriwal leh mi dangte thiam loh chantir lohna (discharge) chungchanga Central Bureau of Investigation (CBI) te dila thehluh chu an ngaihtuah a. He thil hi April 13-ah ngaihtuah leh tura rel a ni a. Kejriwal hi a nupui nen court-ah hian an inlan a, amah ngei hian 'recusal application' (judge dang hmaa thil ngaihtuah tura ngenna) hi sawifiah a duh thu bench hmaah a sawi a ni. Justice Swarana Kanta Sharma-a kaihhruai bench chuan, mahni ukil-te an ban phawt loh chuan mahniin thubuai an sawi thei lo tih a lo hrilh a ni.He thil ngaihtuah a nih lai hian, Kejriwal chuan 'vakalatnama' (ukil ruatna lehkha) hmanga ukil tumah a ruat loh thu leh, mahni ngeia thubuai sawi theihna dikna chanvo hman a duh thu a sawi a. Document-te hi online-a file a harsat avangin a 'recusal application' chu hard copy-a lo pawmsak turin court a ngen bawk a ni. Nimahsela, CBI aiawha ding Solicitor General Tushar Mehta chuan hei hi a lo hnial a. Kejriwal hian ukil a lo rawih tawh avangin, amaha thil a sawi hmain a ukil-te hi a ban (discharge) hmasa tur a ni tiin a hrilh a. Mehta chuan hetianga judge thlak tura dil nawn reng leh judiciary chunga hetiang thil an sawi fo hi thil pawi tak a nih thu a sawi bawk.He thubuai hi Kejriwal-a hun laia Delhi sorkar liquor licensing policy-a dik lo taka thil tih awm nia hriat anih chungchang a ni a. Tun hnai khan trial court chuan Kejriwal leh mi dangte hi thiam loh a lo chantirna tur a awm loh thu sawiin a lo chhuah zalen tawh a, nimahsela CBI-in hemi chungchang hi High Court-ah a thlen leh a ni. March 11 khan Kejriwal leh mi dangte hian thleibik neia hleih neihna a awm an hlauh avangin, he thubuai hi judge dang ngaihtuah turin an lo ngen tawh a. High Court chuan Kejriwal-a recusal dilna chungchangah hian notice a chhuah a ni(www.jclalnunsanga.in)

In Chhunga Tawngtai Inkhawm Neih Khapna Dan A Awm Lo, Thuneitute Phalna Lak Pawh A Ngai Lo: Chhattisgarh High Court

01/04/2026
Admin

Chhattisgarh High Court chuan ni 24 March, 2026 khan mi mal in chhunga ṭawngṭai inkhawm neih khapna dan a awm lo tih a sawi a. Court chuan hetiang inkhawmna hi remna leh muanna hnuaia neih a nih a, dan kalh engmah a awm loh chuan thuneitute phalna lak hmasak a ngai lo tih a sawi bawk. Nimahsela, bengchheng leh mi tibuai thei emaw, dan leh hrai kalha thil tih a awm a nih erawh chuan thuneituten dan hmanlai mekte tlawhchhanin hma an la thei thung ang.He thubuai hi Godhna khua, Janjgir-Champa District-a ram nei tute’n an thehluh a ni a. Kum 2016 aṭang khan an chenna in chhunga hall-ah Kristian te hian tawngtai inkhawm hi an lo nei tawh ṭhin a. Harsatna engmah an siam ngai loh thu leh dan kalh thil engmah an tih ngai loh thu an sawi a; mahse, tualchhung police-te’n tawngtai inkhawm titawp tura hriattirna vawi tam pein, an tiduhdah nia tarlan a ni bawk. Petitioners-te sawi danin, Gram Panchayat-in “No Objection Certificate” (NOC) an lo pek tawh pawh hnuhdawh sak an nih thu an sawi bawk.Petitioners-te hian an ṭawngṭai inkhawm neih thin thlavang hauhsak tura Court an pan hnuah, Justice Naresh Kumar Chandravanshi chuan hetiang hian a sawi a ni:“Petitioners-te hi kum 2016 aṭanga an chenna in chhunga Kristian ṭawngṭai inkhawm an lo neih tawhna hmun neitute an ni a. Mi mal in chhunga ṭawngṭai inkhawm neih khapna dan engmah a awm lo a. Inkhawmnaah chu dan kalha thil tih engmah a awm loh chuan thuneitute phalna lak hmasak a ngai lo bawk. Inkhawm avanga bengchheng emaw, dan leh hrai kaihhnawih harsatna emaw a awm a nih erawh chuan thuneituten dan hmanlai mekte tlawhchhanin hma an la thei ang. Chuvangin, thuneitute leh police-te chu petitioners-te dikna (civil rights) tibuai lo tur leh, thil chhui anga langin emaw, chhuanlam dang siama tiduhdah lo turin hriattir an ni.”(www.jclalnunsanga.in)

Orthodox leh Jacobite buaina: Biak in laksak tura Sorkar thupek chu High Court-in a thiat

25/03/2026
Admin

Ni 24, March Kerala High Court chuan sakhaw thila inbeihna avanga sorkar thuneituten biak in an laksak tura thupek chu court-in a pe thei lo tih a nemnghet a. Justice Anil K. Narendran leh Justice Muralee Krishna S. te Division Bench chuan kum 2024-a Single Judge-in thupek a lo chhuah tawh chu an thiat a ni. Chu thupek hmasa chuan Ernakulam leh Palakkad District Collector-te chu Orthodox leh Jacobite pawl hnih inkara buaina awmna biak in parukte laksak turin a lo hriattir a. Court chuan chutiang thupek chu sakhaw thila sorkar thuneihna piah lam a nih thu a hrilhfiah a ni.Court hrilhfiahnaah chuan biak in chhunga inrelbawlna chungchang, a bik takin 1934 Constitution hnuaia awmte chu, sorkarin a kuta la loin dan ang zela chinfel tur a ni. Court thupek zawm lohna leh dan leh thupek thila harsatna a awm fo a nih pawhin, High Court chuan police-te hmanga venhimna pein muanna a thlen thei a; mahse, hei hian thuneituten biak in an enkawl thei tihna a ni lo a, inkhawm leh sakhaw thiltihte erawh mumal taka a kal theih nan hma an la thei a ni.Orthodox leh Jacobite pawl hnih inkara buaina hi kum 1910-a Malankara Church a inthenna atanga intan a ni a. Kum 2017 khan Supreme Court chuan K.S. Varghese case-ah inrelbawlna thuneihna chu Orthodox faction-te hnenah a lo pe tawh a ni. Chu mi hnuah, kum 2023 khan High Court chuan Orthodox member-te tana venhimna pe turin thu a lo chhuah leh a. He thupek hi zawm a nih loh avangin 'contempt petition' siam a ni a, biak in laksak tura thupek pawh hi a lo chhuah phah a ni; mahse, tunah hian chu thupek chu thiah a ni ta a ni(www.jclalnunsanga.in)

DISCLAIMER