High Court

High Court Chuan Chite Lui-a Mimal Ram Chhunga Vantlang Kawngpui Siam Chungchanga a Hmaa a thupek Chhuah Tawh Zawm Loha an Puhna Thubuai Put Luh Contempt Case Chu A Titawp

12/10/2026
Admin

October ni 12,2026 khan Gauhati High Court, Aizawl Bench chuan Chite Lui-a mimal ram chhunga vantlang kawngpui siam chungchanga a hmaa thupek chhuah tawh zawm loha an puhna thubuai put luh Contempt Case(C) No.12 of 2023 chu a titawp a. He thubuai hi Justice Helen Dawngliani'n a ngaihtuah a ni.Thubuai thehluttu chuan a remtihna lovin Chite Lui-a a rochun ramte kaltlang chuan kawngpui siam a nih thu a sawi a, dan anga lei a nih loh thu leh zangnadawmna engmah pek a nih loh thu a sawi a. Court chuan August ni 17,2022 tawh khan WP(C) No.128 of 2021 ah thupek siamin, State thuneitute chu claim enfiah tur verification team din turin a hriattir a. Thil hmuhchhuah a zirin ram lei emaw, hman chhunzawm loh emaw ngaihtuah a, zangnadawmna pek theih dan tur tehfung siam turin a hriattir a ni.October ni 21,2022 khan joint spot verification neih a ni a,report-ah hian petitioner ram neih pakhat GLSC No.42 of 1980-in a huam ramah hian kawngpui a awm tawh tih hmuhchhuah a ni a, chutih rualin department-in a ram neitu remtihna anga kawngpui hna thawh a nih thu a sawi pawh chhinchhiah a lo ni bawk. Heng thil hmuhchhuah hi sawiselna leh a rah chhuah tur thupekte chu tihhlawhtlin loh a nih thu sawiin, petitioner chuan contempt thubuai hi a pu lut ta a ni.Justice Helen Dawngliani chuan contempt jurisdiction chu court thupek chiang tak leh duhthlanna vang ngeia zawm loh a ni em tih thlenna chauh a nih thu a sawi a. Court-in a hmaa thupek chuan thuneitute chu ram la turin emaw, zangnadawmna pe turin emaw a hriattir lo a ti a. Administrative verification report dik leh dik loh chungchanga inhnialna emaw, zangnadawmna dawn theihna emaw chuan a takin contempt thubuaiah a tling lo tih a tichiang a. High Court chuan contempt thubuai a titawp ta a ni (www.jclalnunsanga.in)(He thubuai hi Contempt Case(C) No.12 of 2023, Lalenghluni Vs Dr Renu Sharma & 15 Ors a ni a. Thubuai pu luttu tan hian Pi Valentina Laldinpuii a ding a, State tan hian Pi Mary L. Khiangte a ding bawk a ni.)

Mizoram Sorkarin SSA Zirtirtute A Ngheta Lak Chungchanga Court Thutluknaah Appeal Thehlut, Mimala Inlanna Tur Sut Leh

12/10/2026
Admin

Mizoram sorkar chuan Gauhati High Court-in 17th March, 2023-a SSA zirtirtute a ngheta lak chungchanga thutlukna a siam tawh chu duh loin, khinletna appeal court sang zawk Division Bench-ah an thehlut. Court thutlukna khinlet theih hun chhung chu ni 1,198 laia an pelh avangin, hun tiam an pelh avanga ngaihhnathiamna dilna an thehluh tel thu an sawi bawk a ni. Amaherawhchu, Court-in he ngaihnathiamna hi an ngaihthlak hnu a, court thutlukna a zirin sorkar-in khinletna thubuai an thehluh erawh hi chu ngaihtuah theih chauh a ni ang.Ni 17.03.2023-a High Court-in thutlukna a siam hnu khan, he thutlukna anga hmalak a nih loh avangin, court zah lohna/thuzawm lohna thubuai chu kum 2023 khan thehluh leh a ni a. Hemi chungchangah hian Court chuan sorkar officer thenkhat te chu anmahni ngei court-a inlana insawifiahna pe turin a lo ti tawh a. Nimahsela, heng sorkar officer-te hian anmahni ngei court-a inlan tura tihna hi duh loin, court thupek hi siam tha tur a ngenna an thehlut ve leh a. Tichuan, 5.10.2026 khan court chuan an ngenna te chu a ngaithla a.Kum 2023-a court thutlukna khinletna chu thehluh a nih tawh thu leh, kalpui chhoh mek zel anih thu Court chu hriattir a ni a. Court-a a mimal a inlan tur a thupek a chhuah tawh chu a sut leh ta a ni(www.jclalnunsanga.in)(He thubuaiah hian Mizoram Sorkar tan Advocate General Biswaji Deb leh Government Adv. Mary Lalruatkimi Khiangte te an ding a, Mizoram SSA Teacher’s Association-te aiawh hian Senior Adv, Dinari T Azyu leh Advocate Victor L. Ralte te an ding)

MUHCS Chungchanga MSHCS Leh Private Hospital Te Inremna Thuthlung Pek Chhuah A Ni Ta

08/10/2026
Admin

Ni 1, October 2026-a Mizoram Information Commission (MIC)-in Mizoram Universal Health Care Scheme (MUHCS) hnuaia MSHCS leh private hospital-te thawhho dan tur thuthlung (MoA) leh hospital hrang hrang rate chawi dan tur te RTI hmanga pe chhuak tur a diltu Pu J. Malsawmzuala Vanchhawng hnena pe tur a thupek a lo chhuah tawh angin, inremna thuthlung chu pek chhuah a ni ta. MIC chuan Dr. K. Lalnghinglova, SPIO leh Chief Finance Officer, Mizoram State Health Care Society (MSHCS) chu October 12, 2026 ral hmaa man nei lova pe chhuak turin thu a lo pe tawh a, MIC thupek angin inremna thuthlung chu vantlang mipui hmuh theihin pek chhuah a ni ta a ni.Commission chuan he thil hi vantlang mipui sum leh pai kaihnawih leh vantlang mipui te hamthatna thil a nih avangin, Commission-in Case No. C.173/2026-MIC a lo rel tawh angin leh August 17, 2026-a Gauhati High Court-in thutlukna a lo siam tawh te thlirin, he inremna hi puangzar lo tur a dangtu tur engmah a awm tawh lo tih a sawi a.Pu J. Malsawmzuala Vanchhawng hian April 29, 2026 khan RTI application thehlutin, MUHCS nena inkaihhnawih private hospital-te MoA copy leh rate tarlanna chiang zawk te chu a dil a. SPIO chuan May 22, 2026 khan chhangin, RTI Act Section 8(1)(d) hnuaiah he thil hi exempt a ni a, chumi mai bakah hemi chungchangah hian Court-ah thubuai kal lai a awm bawk avangin an pe chhuak thei lo tiin a chhang a. Chu chhannaah chuan lungawi lovin, a diltu hian May 26, 2026 khan First Appeal a thehlut a. First Appellate Authority (FAA) chuan July 1, 2026 khan ngaihtuahin, July 10, 2026-ah thupek chhuahin, SPIO chu hospital te hnen atanga ziak a phalna la tur leh, hospital-ten phalna an pekna hnuah rate chawi dan te pe turin thu a pe a. Nimahsela, a diltu hian a thil dil zawng zawng a la dawn vek loh avangin Commission-ah Second Appeal a thehlut leh ta a ni.Commission chuan private hospital-te chu an MoA tlangzarh phal lohna chhan an neih leh neih loh sawi turin hun remchang a pe a. Hospital thenkhat chuan phalna an pe a, thenkhat erawh chuan chhanna an pe lo thung. Commission chuan an chhanna pe tur a hun tam tak an pek tawh hnu a chhanna pe lo hospital te chu phal lohna an nei loah ngaiin, phalna an peah a ngaihsak ta a ni.Commission chuan third party-te duh lohna emaw phal lohna ringawt chu RTI Act hnuaia chanchin pek chhuah loh nan a hman ngawt theih loh tih a sawi bawk. Commission hian Synod Hospital leh MSHCS inkara MoA chungchang Case No. C.173/2026-MIC a thubuai an lo rel tawh pawh a rawn tarlang a. Chu mi tuma Gauhati High Court thubuai rel danah chuan he thuthlung hian mipui sum leh mipuite hamthatna scheme a huam tel avangin, lang tlang taka thil tih ngei tur a nih a rinawm thu a lo sawi tawh a. High Court chuan sumdawnna lam thil a nihna ringawt emaw, thuruk vawn tur a nihna ringawt avangin tlangzarh loh ngawt theih a ni lo tih a lo rel tawh bawk.Hêng thil zawng zawng ngaihtuah hnu hian Commission chuan he appeal-a thil dil hi Case No. C.173/2026-MIC-a thil dil nena an in an avangin leh tlangzarh lo tur a dangtu tur a awm tawh lo tih hriain, SPIO chu a diltu hnenah hian a thil dilte chu October 12, 2026 ral hmaa a thlawn a pe chhuak tur leh, lehkha pek chhuah takte copy chu compliance report nen thehlut turin thu a pe a. He thubuai hi tih tawp a ni ta a ni. MIC thutlukna zawmin he inremna thuthlung pawh hi pek chhuah zui a ni ta a ni. Commission chuan RTI Act hnuaiah hian an thutlukna khin letna tur dan a awm lo nain, he thutlukna avanga lungawi lo chuan High Court-ah Article 226 hnuaiah writ petition thehlutin dan angin a endik tir thei ang tih a tarlang bawk a ni(www.jclalnunsanga.in)

Mizoram Bar Association Leh Mizoram High Court Bar Association Te’n Justice Helen Dawngliani Lawmpuina Hun Hmang

08/10/2026
Admin

Vawiin ni 8, October 2026 (Ningani) khan Mizoram Bar Association (MBA) te leh High Court Bar Association, Mizoram te chuan Gauhati High Court(Aizawl Bench) Bar Room-ah Justice Helen Dawngliani, High Court judge lawmpuina hun an hmang a. He hun hi High Court Bar Association President, Senior Advocate Pu C. Lalramzauva chuan kaihhruaiin, lawmpuina hun hlimawm leh hlawkthlak tak hman a ni.Mizoram Bar Association (MBA) aiawhin Advocate Rosaline L Hmar chuan lawmpuina thilpek a hlan a. High Court Bar Association aiawhin Advocate Vanneihsiami’n lawmpuina thuziak a hlan bawk.He hunah hian MBA aiawhin, MBA President Advocate Lalremruata chuan lawmpuina thu a sawi a. High Court Bar Association aiawhin Vice President, Senior Advocate Pu LH Lianhrima’n thu a sawi bawk. Tin, a duh apiang tan thusawina hun hawn a ni a, he hunah hian Senior Advocate Dinari T Azyu, MBA General Secretary Advocate R. Lalhmingmawia leh Advocate Lalremtluanga te’n lawmpuina thu an sawi a ni.Justice Helen Dawngliani chuan MBA te a tana an hlutna leh tun dinhmun a thlen theih nachhan chu Bar-in an support tlat thin vang a nih thu a sawi a. Ukil hna a thawh thin lai chuan ukil ho chu chhungkua ang mai an nih thu leh an inpuih nasat thin thu te a sawi a. Tun dinhmun a thlen theih nana MBA in atana hma an lakna te a sawi a. Ukil naupang zawk te tana fuihna thu tha tak tak a sawi a, Ukil te chu nitina an tih tur chu tha taka ti zel turin a fuih. Judiciary zahawmna vawnhim pawimawhzia te a tarlang a ni. Justice Helen-i chuan inngaitlawm takin Bench-ah chuan nausen ang chauh a la nih thu leh zir tur a la ngah thu a sawi a. Ukil hna a thawh thin lai leh tun dinhmun chu a inthlauh thu te tarlangin, hmasawnna nasa tak Bar-ah pawh a awm thu a sawi a. Ukil-te chu inpui tlang dial dial tur an nih zia leh, midangte hmasawnna tur atana puih hreh lo turin a chah bawk.“Pathian enkawlna leh a tanpuina tello chuan he hna hi kan thawk thei lo va. Pathian chuan a hun teah min chawisang thin a. Mahni tih tur hi ti ve mawp mawp mai i la, “One day at a time” tih hi zir i la, rilru ngil tak pu chungin, hmanhmawh tut tut lovin, Pathianin mi zawng zawng a inang vek a ni khat a darkar 24 min pek hi engtin nge ka hman dawn tiin, inzawt thin i la. Nimin a ka thil tih dan aiin vawiin a ka thil tih danah hma ka sawn em tih inzawt zel chungin, darkar 24 Pathianin min pek hi hman tangkai tum theuh ang u” tiin Justice Helen Dawngliani chuan a thusawi a khar a ni.Senior Advocate Dinari T Azyu chuan Justice Helen Dawngliani nena ukil hna an thawh tan tirh atanga an zinkawng bumboh tak chanchin te a sawiin Justice Heleni hi High Court Judge kan neih tawh zawng zawng a experience nei tha ber- private ukil, sawrkar ukil, district judge, High Court Registrar, Law Dept Secretary te lo ni tawh a nih thu a sawi. Sr. Adv Dinari chuan nitin hun hman that pawimawih zia sawiin, “Kan tih tur nitin rinawm takin ti ila, kan chanvo tur chu Pathianin a ruat ang tih ka ring” tiin fuihna thu a sawi bawk.MBA Secretary Pu Lalhmingmawia leh senior member Pu Lalremtluanga ten an practice tirh laia Justice Heleni an tana a tangkai thin zia te an sawi.Thusawitu hrang hrang te chuan Justice Helen-i chu mi thliar hrang ngai lo, duhsak bik nei ngai lo leh Pathian tih mi a nih zia an sawi a. Mi rilru tluang a nih zia leh nakin zelah pawh rorelna dik thlentu a nih ngei an rin thu an sawi a. District Court-a a thut lai pawh a sawiselna an neih loh thu te an sawi a. A kal leh zelna turah duhsakna an hlan mawlh mawlh a ni(www.jclalnunsanga.in)

Gauhati High Court-in Health Worker 100 Lakna Tur Advertisement Chhuah Thiat, Dan Dik Taka Ngaihtuah Hnuah Advertisement Thar Chhuah Leh Turin Hriattir

01/10/2026
Admin

Vawiin ni 1, October 2026 (Ningani) khan Gauhati High Court chuan Health Worker post 100 direct recruitment-a la tura Mizoram Sorkar-in advertisement a chhuah tawh chu a thiat a. Tun dinhmun a National Rural Health Mission (NRHM) hnuaia Contract Health Worker thawktu awm zingah a ngheta dah theih an awm em tih ngaihtuah hmasa a, chumi hnuah advertisement thar chhuah leh turin a hriattir.Justice Mridul Kumar Kalita chuan State Sorkar chu post awm zat atangin engzah nge Government of Mizoram Regularization of Centrally Sponsored Scheme (CSS) Employees Scheme, 2024 (2024 scheme) hnuaia hna thawk lai mek, contract Health Worker-te zingah a ngheta dah theih an awm em tih chhut hmasa turin a hriattir a. Court chuan direct recruitment tura post bang la awm te a advertisement an chhuah leh hmain 2024 scheme dan leh kaihhruaina angin sorkar hian a ngaihtuah hmasa phawt tur a ni a ti.He thubuai hi Health Worker 72, kum 2007-a Health Worker Training zo leh National Rural Health Mission (NRHM) hnuaia contract-a thawk tura lakte thehluh a ni a. Mission Director, National Health Mission, Mizoram State Health Society (MSHS), Aizawl chuan DPC/Selection Board-te recommend-na angin thawktu atan a la a. Thla 4 chhung atan chauh thla khata Rs. 7,000 hlawh tura lak phawt an ni a, mahse an contract hi pawt sei zelin chawl miah lovin kum 18 chuang an thawk zui a ni.Kum 2017 khan Health Worker ve tho 93 te chu special recruitment scheme hnuaiah a ngheta dah an ni tawh a. Hemi hnu hian CSS hnathawktu 354 chuang erawh contract-in an la thawk a. Chumi hnuah, CSS hna thawktute ngenna angin kum 2024 khan Mizoram Sorkar chuan CSS employee-te a ngheta dah an nih theih dan tur scheme a siam a. Nimahsela, July 2025 khan Sorkar chuan kum 2024 scheme anga a nghet a dah theih tur an awm leh awm loh pawh enfiah hmasa lovin direct recruitment kaltlanga Health Worker post 100 la turin advertisement a chhuah a. Thubuai thehluttute hian CSS hnuaiah thawktu 354 chuang contract-a thawk an la awm mek a, contract-a thawktu awmsa te pawh a nghet a dah an la nih loh lai a, direct recruitment-a thawktu 100 chuang la tura sorkar-in advertisement a chhuah chu an duh lo hle a. Tin, kum 2024 scheme zul zui ni lova sorkar-in Advertisement No. 4 of 2025, No. A.12011/1/2025-DHS/MPW, dated 22.07.2025 kaltlanga Health worker (Group ‘C’ post) te direct-recruitment a la tura advertisement a chhuah chu duh lovin he thubuai hi an thehlut ta a ni.Court chuan 2024 regularisation scheme chuan CSS employee te tan rinna leh beiseina a siam sak tih a sawi a. Court chuan Sorkar chu scheme Clause 3 anga chet la phawt tur an nih thu leh, chumi hnua regularization atana post la awm te chhut chauh tur an nih thu a sawi a. Court chuan 2011 Recruitment Rules hnuaiah hian thawktu atana lak dan, kum leh qualification-ah te hriatthiamna a awm thei tih a hmu a. Nimahsela, Court chuan kum rei tak an thawh avang chauh erawh chuan a ngheta dah/lak theihna dikna chanvo an nei lo tih a sawi. Court chuan 2024 Scheme Clause 4-a eligibility condition-te chu an neih ngei a ngaih thu an sawi chiang a. Tin, Court chuan Sorkar-in Advertisement a chhuah hma a 2024 scheme anga an ngaihtuah hmasa lo chu Constitution Article 14 leh 16 hnuaia thubuai thehluttute dikna chanvo bawhchhiatna a ni a ti a. Chuvangin, advertisement hmasa chu thiatin, sorkar chu regularisation tur leh direct recruitment tur post zat chhut chhuak hmasa a advertisement thar chhuah leh turin a hriattir a ni(www.jclalnunsanga.in)(He thubuai hi Manluni & 71 ors vs State of Mizoram & 4 ors WP(C)/104/2025 a ni a. Thubuai thehluttute tan hian Senior Advocate Pu C. Lalramzuava leh Advocate Stephen Lalbuatsaiha te an ding a, Mizoram sorkar tan Government Advocate Lalnunhlui a ding)

Hmeichhia Chu Ama Duh Thu Ngei Anih Loh Chuan Police Station-a Kal Turin Nawr Luih Theih A Ni Lo: J&K and Ladakh High Court

30/09/2026
Admin

Jammu & Kashmir and Ladakh High Court chuan hmeichhia chu ama duhthlanna ngei a nih loh chuan thubuai chhui chianna atan police station-a kal tur a nawr luih theih a ni lo, tiin an sawi. He thubuai hi hmeichhe pakhat Hyderabad-a Corporation pakhat-a thawk lai mek thehluh a ni a. A ni hian WhatsApp message kaltlangin police-te chuan police station a kal tur a an tih thu a thlen a. A aiawha ding ukil chuan a hnathawhna hmunin a zir loh avangin leh India Danpuiin thubuai chhui chiannaa hmeichhe te tana an zahawmna venhimna a pek angin police-te koh dan chu thil dik a nih loh thu a sawi a.Justice Shahzad Azeem chuan Section 179 Bharatiya Nagarik Suraksha Sanhita (BNSS) chu a sawifiah a, he section-ah hian police te’n thubuai an chhui chianna kawnga hmeichhia te venhimna tarlan a ni a. Hmeichhia te chu an chenna inah ngei an statement chu lak theih a nih thu Court chuan a sawi a. Court chuan Section 179 leh section 35 BNSS te hi chhiar kawp a nih chuan, hmeichhia chu a duh loh chuan police station-a kal turin nawr luih theih a ni lo tiin Court chuan a sawi a ni.Court chuan India Danpui Article 21-in thubuai thehluttu chu a zahawmna vawnghim chunga thubuai chhui chianna a tel tura venhimna a pek thu an sawi a. Police thuneitute chu Section 179 BNSS zawm chunga chhui chianna kalpui turin a hriattir a, hmeichhe statement la tura dan anga ruahmanna dang siam turin a ti ta a ni. Nimahsela, he thupek hian thubuai chhui chianna kalpui meka tel lo tur erawh chuan venhimna a pe lo tih Court chuan chiang takin a sawi lang bawk a ni(www.jclalnunsanga.in)

DISCLAIMER