High Court

"Sorkar hnathawk, a hna thawk thei lo tura lo tina" anga puhna siamsak tawh chu, "Hriamhrei hlauhawm hmanga hliam siam" Hnuaiah Ni Lovin a hremna tlem zawk "Hliam tenau siam" hnuaiah thiam loh chantir theih a ni:Kerala High Court

28/05/2026
Admin

Kerala High Court chuan, sorkar hnathawk a hna thawk thei lo tura lo tibuai a, hliam siamsak vanga Section 332 IPC tlawhchhana thubuai siamsak tawh chu, a hnuah ralthuam hlauhawm hmanga hliam siamna Section 324 IPC hmangin thiam loh chantir leh ngawt theih a ni lo, a bik taka Section 324 hnuaiah thubuai hi siam a nih loh chuan, tiin an rel. Justice Jobin Sebastian-a chuan Section 324 IPC hi Section 332 IPC hnuaia "dan kalha chetna tenau zawk" (minor offence) a tling lo tiin a hrilhfiah a; a chhan chu ken tel dang- ralthuam hlauhawm hman tih chu a tel bakah, heng sualna pahnihte hremna sang ber hi a inzat chiah a ni, a ti.He thubuai h police-in, bus driver pakhat chu a tlan chak lutuk avanga a lo tih din hnua, bus driver-in screwdriver-a beihna chungchang a ni a. Trial Court chuan Section 332 IPC-ah thiam loh chantir lo mah se, Section 324 IPC hnuaiah thiam loh a chantir thung a, Appellate Court pawhin chu thutlukna chu a lo nemnghet tawh a ni.High Court chuan police officer hliam tuartu thusawi leh hliam chungchanga medical record-te ațangin accused hian hliam a siamsak ngei tih chu chiang taka finfiah a ni tih a hmu a. Nimahsela, Court chuan thubuai hrang siamsak phawt a nih loh chuan Section 324 IPC hnuaia thiam loh chantir chu dan kalh a ni thung tih a sawi. Section 222 CrPC tlawhchhanin, Court chuan mi pakhat chu "dan kalha chetna tenau zawk" (minor offence)-ah chauh thiam loh chantir theih a ni a, chu pawh dalh kalha chetna tura a kalhmang(ingredients) te chu dan kalha chetnaa a thiltih lian zawk chhungah chuan a tel a ngai a, hremna tlem zawk a ken tel bawk a ngaih thu a sawi.Court chuan Section 323 IPC (tihpalh thil ni lo va hliam siamsakna) hi chu Section 332 IPC hnuaia "dan kalha chetna tenau zawk" a tling thung a, a chhan chu a dan kalha chetna lian zawk chhungah khan a kalhmang tur a tel tawh a, hremna pawh zâng zawk a ken vang a ni, a ti. Hemi rual hian, Court chuan Section 324 IPC hnuaia thiam loh chantirna chu nuaibo-in, Section 323 IPC hnuaiah driver chu thiam loh a chantir ta zawk a, court chuan Rs.1,000 chawitir turin a hrem ta a ni(www.jclalnunsanga.in)(He thubuai Babu Avarachan vs.State of Kerala ah hian thubuai thehluttu tan Adv. Sri.C.P.Udayabhanu a ding a; a leh lam tan PP U Jayakrishnan a ding)

Section 52A NDPS Act kalphung zawm loh ringawt hian thubuai Siamsakna a tichhe vek thei lova, finfiahna pawh hman tlak lohvin a siam ngawt lo: J&K&L High Court

28/05/2026
Admin

Jammu & Kashmir and Ladakh High Court chuan NDPS Act hnuaia Section 52A kalphung bawhchhiat hlekna a lo awm pawhin hian ruihhlo chungchanga thubuai siamsa a tichhe nghal ngawt lo va, finfiahna awmte pawm tlak lohin a siam vek lo bawk tih a thutluknaah a tarlang. Justice Rajesh Sekhri chuan Section 52A hian damdawi hlauhawm man tawhte hmun hima dah that leh tihchhiat chungchang a huam ber, chutih rualin NDPS thubuaia finfiahna tihchakna tur atan a ni bawk tih a sawi. Court chuan he dan zawm lohna emaw, a inkaihhruaina tlem te zawm lohna emaw a awm a nih chuan, court lamin thubuai siamsa lakah ngaihdan dang an siam phah thei a, mahse chutiang tihsual palh mai mai chuan thubuai pumhlum a tichhe vek thei lo tih a sawi a ni. Court hian NDPS Act hnuaia thubuai hrang hrang siamsak hlip tura ngenna (petition) a ngaihtuah lai a ni a. He ngenna siamtu hian Narcotics Control Bureau chuan heroin an man chu Section 52A leh kum 2022 Rules-in a sawi anga kalphung tur dik tak zui lovin an tichhia niin a sawi.Court chuan dan awm dante enfiahin Supreme Court thutlukna hrang hrang, Narcotics Control Bureau v. Kashif leh Bharat Aambale v. State of Chhattisgarh case-te thlengin a en a, heng case-ahte hian kalphung hman sual hlekna chauh chuan thubuai a tichhe vek thei lo, finfiahna awmte kha nasa taka a tichhe hle a nih loh chuan, tiin an lo rel tawh a ni. Tun a thubuaiah erawh court chuan thil chhuitu khan an zui tur kalphung zui tur chu tha takin an zui tih a hmu a. Damdawi tihchhiat hma hian an damdawi man leh a neitua phute chu Magistrate hmaah hruai an ni a, a sample lak chhuah a ni a, inventory leh thlalakte chu laksak a ni bawk. Court chuan thubuai neitu dikna chanvo humhim a nih theih nan sample dang pawh dah that a ni tih a chhinchiah bawk. Documentary evidence hrang hrang, inventory-te, thlalakte, seizure memos leh sample list-te hian hlutna an la nei reng tih sawiin, Court chuan thubuai siam tawh hlip tura ngenna chu a hnawlsak a, mahse thubuai neitu chu hun rei tak chhung a lo tan tawh avangin leh thubuai ngaihtuah chhung a rei tawh em avangin bail erawh a pe thung a ni(www.jclalnunsanga.in)(He thubuai Rameez Ahmed vs. Union of India ah hian thubuai thehluttu tan Adv. MA Bhat leh Adv. Toquir Mustfa an ding a; a leh lam tan DSGI Vishal Sharma leh CGSC Karan Sharma te an ding)

Private School Te Hian Academic Session Tan Dawna Fee Tihsan Kawngah Phalna An Lak Hmasak A Ngai Lo: Delhi High Court

26/05/2026
Admin

Delhi High Court chuan Delhi-a private school-te chuan academic session thar an tan rualin, fee tihsan nan Directorate of Education (DoE) hnenah phalna lak hmasak an ngai lo tih a puang. Court chuan school-te hian session intan hmain an fee siam thar tur ruahmanna chu Delhi School Education Act, Section 17(3) tlawhchhanin DoE hnenah hian an thehlut ngei tur a ni thung tih a sawi a. Amaherawhchu, kal pui mek academic session chhung ngeia fee tihsan an duh a nih erawh chuan DoE phalna lak hmasak a ngai thung dawn a ni. Justice Anup Jairam Bhambhani chuan private school engemaw zatin DoE-in fee tihsan an dilna a hnawlsak duh lohna chungchanga thubuai thehluhah he thutlukna hi a siam a ni.Court chuan DoE mawhphurhna ber chu school-te’n hlep uchuak an lo siam a, zirna chu sumdawnna anga an hman (commercialisation) tur ven chu a ni tih a hrilhfiah a. Private unaided school-te hian Constitution a Article 19(1)(g) hnuaiah sum leh pai leh inrelbawlna enkawl kawngah dikna chanvo (right) an nei tih a sawi bawk. Court chuan DoE hian school fee siamah a inrawlh thei a ni tih a sawi rualin, mahse chu chu a dan tlawhchhan Section 18(5) hnuaia sum hman dan endikna (audit) fel tak an neih hnuah, chu school chuan hlawkna uchuak a siam a ni tih finfiah a nih hnuah chauh an inrawlh thei tih a sawi fiah a.High Court chuan private unaided recognized school zawng zawngte managing committee-ah hian DoE aiawhte (nominees) an tel ve bawk tih a sawi lang a. Thutlukna siamnaah hian DoE aiawhte hi an tel ve avangin, managing committee-in fee tihsan a pawmpui tawh a nih chuan pawm mai tur a ni dawn a ni. Court chuan tun session kalpui mek chhunga fee tihsan a nih huna hun bi (timeline) hman tur a siam bawk a. Chutah chuan school-te chuan fee an tihsan hma thla hnih a la awm tihin he proposal hi an thehlut tur a ni a, DoE chuan thla hnih chhung ngei chuan thutlukna a siam fel tur a ni. Thutlukna a siam hman lo a nih chuan fee tihsan chu tlang nghal anga ngaih a ni ang.He thubuaiah hian, Court chuan DoE chu dan dinglai leh inkaihhruaina hlui tawh te zawm loah a sawi a, an thil tih dan chu "dan hnualsuatna" niin a sawi hial a ni. Court chuan school-te’n fee tihsan an dilna hi academic session thar, April 2027 aṭang chauhva hmang ṭan turin a hriattir bawk(www.jclalnunsanga.in)(He thubuai DPS Vasant Kunj &Ors vs. GNCTD(and batch) WPC 7481/2017 ah hian thubuai thehluttu tan Adv. Kamal Gupta, Adv. Tripti Gupta leh ukil dangte an ding a; a leh lam tan ASG Chetan Sharma,Sameee Vashisht(Standing Counsel GNCTD) leh ukil dangte an ding)

Rahul Gandhi-a India Khua Leh Tui Nihna Cancel Dilna Chu Allahabad High Court-ah Thehluh A Ni

26/05/2026
Admin

Allahabad High Court Lucknow Bench-ah Rahul Gandhi-a India khua leh tui nihna thiat tur leh Rae Bareli Lok Sabha bial ațanga Member of Parliament (MP) atana thlan a nihna lo hnawl sak turin ngenna (writ petition) thehluh a. He ngenna hi Ukil Ashok Pandey leh dental surgeon Rajnesh Kumar Singh-te thehluh a ni a. He thubuai hi Justice Shekhar B. Saraf leh Justice Abdhesh Kumar Chaudhary-te Bench-ah ngaihtuah tura ruahman a ni. Ngennaah hian Rahul-a hi kum 2003 khan UK-a company pakhat, M/s Backops Limited nen an inthlunzawm nia tarlan a ni a, tah hian director leh shareholder lian ber zinga mi, London address nei angin a hming a lang a. UK company registry-a chhinchiahna tarlante tlawhchhanin, petitioners-te hian document țhenkhatah British khua leh tui anga tarlan a ni tiin an sawi.He ngenna hian kum liamta chhunga he mi chungchanga ngenna leh hekna lo siam tawh thinte pawh a tarlang a. Kum 2015 khan Ukil Pandey hian High Court hi a lo pan tawh a, UK-a chhiah chawina document-ah Rahul-a hian British khua leh tui a nih thu a tarlan avangin a India khua leh tui nihna a hloh tawh nia sawiin a lo khing tawh a ni. Mahse, court chuan Citizenship Act-a Section 9(2) hnuaiah Central Government chauhvin hetiang thil hi an rel thei a ni tiin he ngenna hi a lo hnawl tawh a. Kum 2019-a ngenna dang thehluh pawh Central Government pan thei tura zalenna pein sorkar chuan a lo khingfel tawh a, hma lak zui a nih loh thu petitioners-te hian an sawi thung. Ngennaah hian kum 2019-a Subramanian Swamy-a hekna siam leh kum 2024-a Gandhi-a tlinna lo khing tawh leh ngenna dangte pawh tarlan tel a ni(www.jclalnunsanga.in)

Gujarat High Court Chuan Mi Tang Pakhat Chu Panchayat Inthlana Vote Thlak A Phalsak

26/05/2026
Admin

Gujarat High Court chuan thawhtanni khan mi tang pakhat chu Junagadh Taluka Panchayat-a Chairman leh Vice Chairman thlannaah vote thlak a phal sak. Court chuan inthlannaah hian vote khat chauh pawhin thil a tidanglam thei tih a sawi a. Thubuai thehluttu hian habeas corpus ngenna (petition) thehlutin, inthlanna neih hma ni chiah ni May 24-a man a nih thu a sawi a. Mahse, sorkar lam chuan May 22-ah FIR hi thehluh a nih tawh thu sawiin, thlanna tihbuai nan chauh ngenna hi an thehlut niah an puh thung. Sorkar chuan a thil sual tih a len tham vangin, inthlanna a awm vangin thlah zalen ngawt chi a nih loh thu an sawi bawk.Justice DN Ray chuan he thil hi Court-ah zing dar 9:30-ah sawi tawh ni mah se, a file erawh dar 11:45-ah chauh Court a thlen thu a chinchhiah a. Tlai deuh mah se, dikna tana tha tur ngaihtuahin Court chuan interim order a chhuah ta tho a ni. Court chuan police a man tupa chu a manna hmun atanga vote thlakna hmun thleng, ama pawisa senga escort turin thu a pe a. Vote a thlak zawh veleh a tanna hmunah a kir leh nghal turin a ti a. Court chuan vote a thlak hma chu inthlanna hmun hi hawng reng turin a ti bawk. He thubuai hi June 10-ah ngaihtuah leh a ni ang(www.jclalnunsanga.in)

Delhi High Court Chuan Kawngsira Thil Zuarte Chu Hnawtchhuak Lo Turin Leh Tibuai Lo Turin Venhimna Thu An Sawi

26/05/2026
Admin

Delhi High Court chuan Delhi kawngsira thil zuartute chu Town Vending Committees (TVCs)-te’n an thil zawrh dan chungchanga thutlukna an siam hma chu hnawtchhuak lo tur leh tibuai lo turin a ti a. Court hian Municipal Corporation of Delhi (MCD) chu July 21, 2026 hmain TVC 23-te chu din fel vek turin a hriattir a. Justice Pratibha M Singh leh Justice Madhu Jain-te thutna Division Bench chuan kawtthlera thil zuartute zinga phalna lehkha pek lailawk tawh te chu dan mumal tak siam a nih hma chu thlamuang taka an hna thawk chhunzawm phalsak tur an ni an ti bawk.He thubuai hi Street Vendors (Protection of Livelihood and Regulation of Street Vending) Act, 2014 leh Delhi Street Vendors Rules, 2017 leh Delhi Street Vendors Scheme, 2019 tlawhchhana thehluh a ni a. Thil zuartute chuan an phal lailawkna CoV an dawnah te chuan hriat tur pawimawh tam tak telh a nih loh thu an tarlang a. Thuneitute chuan thil zuartu te category, an thil zawrhna hmun tur dik tak, leh hmun khata thu nge an nih a, hmun danga vahvel paha zuar tih te chu chipchiar takin an tarlang lo a. Rualbanlote bik phei chu, taksa lama harsatna an neih chung pawha vahvel paha zuar tura an tihluih tlat thin an nih avangin lungawilohnah nasa tak an thlen bawk. Thil zuartute chuan hmun hrang hranga thil zawrhna tur ruahmanna te chu certificate hnuhnung ber pek chhuah rualin tihfel tur a ni, tiin an hriattir bawk.High Court chuan kaihhruaina pawimawh tak tak a chhuah a. TVC-te chu an din fel hunah thil zuartu hming tarlante lo finfiah tur leh, rualbanlote leh hmun khata thuthmun neia hnathawkte chu ngaituahna tha pe turin a hriattir a. Court chuan vantlang hmun hmangtu thil zuartute tana chawi tawk chauh tur fee bituk turin a hriattir bawk. Hetih rual hian, thil zuartute pawh an thil zawrhna hmun thianghlim taka enkawl tur leh, a nghet a eng thil mah sa lo turin a hriattir a. Court chuan kawtthlera thil zuartu, phalna CoV nung nei reng reng te chu TVC-te’n dân anga thutlukna an siam hma chu hnawhchhuah leh an eizawnna dál sak khap tlat a ni tih an puang a ni(www.jclalnunsanga.in)(He thubuai hi Sumit Verma vs. State of NCT of Delhi & Ors. and other connected matters, Neutral Citation:2026 DHC 4504-DB a ni a. Thubuai thehluttu tan hian Adv. Kamlesh Kumar Mishra, Shivani leh Mansi Kashy te an ding a. A leh lam tan Sr. Adv Mukul Singh (Central Govt. Standing Counsel), Sr. Adv. Pratiman N Lakra leh ukil dangte an ding)

DISCLAIMER