High Court

ATL Kawng Chhia Avanga PIL Sawrkar Insawifiahna Thar Ber; CRRI Sawi Danin Kawng Hmanna Ngaihtuahin Kawngchhah Tawk Lo Siam That Tum, Six Pack Road Pukpui Siam Tan.

13/11/2025
Admin

He Aizawl-Thenzawl-Lunglei (ATL) kawng chhia (PIL No. 12 of 2022) chhia avanga High Court-a case puluttute hi Lunglei Ṭhalai Pawl (LṬP) te an ni a. He PIL  Lalduhawma Pachuau Vs State of Mizoram & Ors hi Gauhati High Court, Aizawl Bench hmaah ni 29.09.2022 khan, a vawi khat nan Aizawl Bench, Division Bench Justice Michael Zothankhuma leh Justice Marli Vankung ten an ngaihtuah ṭan a ni. Thubuai Inṭanna : LṬP-te chuan ATL Road chhe bik lutuk chu ATL kawng chhe chungchang  8th MLA 10th Session ni 8.9.2022 a House chhunga inhnialna te, Sub Hqrs. YMA-in ni 10.9.22 a thu a chhuah te, Lunglei Ṭhalai Pawlin ni 10.9.2022 a thu a chhuah te, MHIP thuchhuah ni 13.9.2022 a mi te, MSU-in ni 19.9.2022 ATL kawng chhe chungchanga thu a chhuah te High Court hi a hriattir a. Kawng ṭha neih hi India khua leh tuite dikna chanvo (fundamental rights) a ni a, Sawrkarin an ngaihsak lo hle tiin an zualko. Thubuai theh luttu hian, State leh Bhavya Company Pvtd. Ltd te hian ATL Road hi an siam uluk lo va, an enkawl tur hun defect liability chhung pawhin an enkawl  chhiatzia thu Court-ah hian an sawi a. Ni 29.09.2022 khan High Court hian Sawrkar chu ATL Road kawng dinhmun hriattir turin Order a chhuah a. Court Order Pawimawhte:Order dt 25.04.2023 : Ni 25.04.2023 khan High Court chuan, Sawrkar chhannaah kawng siam ṭhat hun kum thum chhung ni 17.3.2023 thleng a la awm pawhin, Bhavya Company chu Sawrkarin vawi tam kawng siam ṭha tura an hriattir pawhin an siam ṭha duh lo tih tarlan a ni a. Sawrkar lam chu Contract Agreement-te Court-a theh lut turin a ti a. Bhavya Company-a an hotu pawh Court-a inlan turin a hriattir. Order dt 14.06.2023 : Ni 14.06.2023 khan Chief Justice, Gauhati High Court chuan SP, Silchar chu Project Manager, Bhavya  Company chu Court-a mimala inlan ngei tura hma la turin a hriattir a. Heti chunga Court-a a la inlan duh loh avangin ni 18.07.2023 khan High Court chuan SP, Silchar chu Project Manager chungchanga enquiry ti turin a hriattir.Order dt 09.08.2023 : Ni 9.8.23 a High Court order-ah chuan Bhavya leh Sawrkar te hian ni 15.11.2019 ah Contract Agreement Rs 29,87,83,541/-, ATL kawng siam nan an ziak a; ni 07.04.2021 hmaa zawh tur a tih a ni. Kum khat pawh a ral hmaa kawngte hi kalna tlak pawh ni lova a chhiat leh avangin Sawrkar hian Bhavya-te hnenah hian ni 9.12.21 leh 13.10.2022 ahte kawng hi siam ṭha turin an hriattir a. He hriattirna hi zawm a ni lo va, Bhavya lam hi an awmna chin pawh hriat a ni tawh lo a ni. Hetia an awmna chin hriat a nih loh avang hian Sawrkar lam hian Bhavya Company-ten an kawng siamna tura an dah kham, Performance Quarantee hmangin an theih chin chin kawng an siam tih an sawi.  Bhavya Company-te hi Sawrkar hian an inremna (15.11.2019) bak bak hna a pe tih Court hian a hmu chhuak a. Sawrkar insawifiahna ni 7.8.23 a a lan dan chuan supplementary award-te pawh pek nual a lo ni a. Sawrkar hian ni 7.12.2020 ah ATL Road (100-110 Kms leh 155-160 Kms) siamna tur Rs. 825 lakh te , ni 25.02.2021 ah ATL road (110-126 Kms) siamna tur Rs. 875 lakhs te pek a lo tih hmuh chhuah a ni. Sawrkar chu Bhavya Company kawng siamte hi engtia rei nge ṭha tura an beisei tih leh eng vanga kum khat pawh daih ngai lo nge a nih tih insawifiah turin a ti a. Supervising Officer-te hna pawh chiang taka court hriattir turin a ti. Hemi hnu hian Court chuan Project Manager Bhavya Company chu ngawrh takin a zawng a. A mimal hming Khorendra Kumar Baruah angtein SP leh OC Silchar-te Court-a hruai turin a ti chungin, hmuh theih a nih lo thu court order-ahte hian tarlan a ni. Sawrkar lam pawhin Lunglei khawpui chhung chu theih tawpa an siam thu Court-ah an sawi bawk.Order dt 22.02.2024:  Ni 22.02.2024 a Court order-a a lan dan chuan sawrkar chhanna (20.11.2023) para 3-na-ah, Retention money Rs. 1,92,85,329 chu thlan bik lai kawng chhia siam nan hman a ni a. Performance Guarantee Rs. 74,69,589 pawh hman mai theih turin Chief Engineer (Roads), PWD kutah a awm thu tarlan a ni. Court chuan chung pawisa hmang chuan ni 20.11.2023 aṭanga hemi ni thlenga an hnathawhte tarlang turin Sawrkar chu a ti a. Rs 3.6 Cr leh 65 Lakhs hmanga siam kawng tha chuang lo:Petitioner te hian ni 2, December 2024 ah court ah affidavit thehlutin Court in ni 30.10.2024 ah pawisa hman tur Rs 3.6 Cr leh Rs 65,91,000/- sawrkarin  phalna pek nimah se ATL kawng chu a la chhiat reng thu an sawi a. Kawng chhe thlalak te thehluh a ni. High Court hian ni 30.10.2024 khan ATL siamna tura Rs 3.6 Cr  hman phalna sawrkar in a ti chhuak tawh a. Hemi hmanga kawng siam chin thlalak thehlut turin sawrkar lam hi a hriattir a. Sawrkar hian ni 22.7.2024 khan Rs 3.6 Cr ATL kawng siam nan hman theihna a lo ti chhuak tawh a.  Ni 14.10.2024 khan Rs 65,91,000/- Bhavya Company te dahkham hman ATL Kawng (100-143 kmp) atana hman phalna a lo ti chhuak tawh bawk a ni. Heti chunga ATL kawng a la chhe reng chu petitioner hian kawngchhia thlalak engemaw zat court ah hian an thehlut a ni.  Hemi kawng siamtu Pu PC Lalthantluanga, EL & TY Enterprise hnenah a hna thawh dan a lungawi loh avanga SR Lalramthanga, Sr EE, PWD, Road Div in ni 15.10.2024 a lehkha a thawnnate pawh court ah hian thehluh a ni. Sawrkar lamin kawng siam reng thu leh ruattui avanga harsatna thlen :He PIL thubuai hi Division Bench hrang hrang hmaah ngaihtuah a ni a. Justice Soumitra Saikia leh Justice Marli Vankung kaihhruai bench chuan April ni 2, 2025 khan, PWD Secretary chu kawngpui hnathawh mek dinhmun chu affidavit kaltlanga theh lut turin a hrilh nawn leh a; sum hman dan tur leh contractor laka hmalak a ngai tih a sawi bawk. May leh June 2025 chhova ngaihtuah a nih laiin State chuan performance guarantee leh sanctioned fund dangte chu hman a nih thu a sawi a. Kawng siam thlalak te sawrkar hian thehluh in ruah sur avanga harsatna te an thlen a. Hemi hnu hian PIL thehluttute pawhin an kawng siam te chhiat thu leh an siam that loh zia thu affidavit hmangin thlalak engemaw zat an thehluh ve leh a. Petitioner in ATL kawng siamna hman pen thu court a thehlut :September, 2025 khan thubuai thehluttute hian  court ah affidavit thehlut in sawrkar in ni 30.04.2025 ah Rs 58.99 Cr ATL Road atana hman phalna a ti chhuak a.  Chuti chung pawh chuan hmasawnna hmuh tur a awm lo kawng chhe thlalakte thehlut in  court an hriattir a. 9th MLA Committee on Estimate in kawng siamna tura a tih pawh Rs 90.69 Cr chu Aizawl khawchhung siam that nan a pawt pengin Rs 45.89 Cr chiah dah dah chu MZP, Lunglei te Lungawi lovin ni 28-30.4.2025 ah te kawng an dan thu an hriattir. Kum 2025 laihawlah chuan thubuai thehluttu chuan thubelh theh lutin Aizawl–Thenzawl–Lunglei Kawngpui siam tharna atan Special Assistance to States for Capital Investment (SASCI) 2024–25 scheme hnuaiah ₹ 58.99 crore chu pawm a nih tawh thu Court-ah hian a thlen a. Chumi chung chuan kawng siamah hmasawnna hmuh theih chu a tlem hle a ti a. Court chuan kawngpui siam ṭhatna atana sum ruahman chu thil dang atan lak pen (divert) tur a nih loh thu a sawi a. Langtlang taka kalpui a nih theih nan judicial monitoring chhunzawm zel a ngai tih a sawi bawk.Sawrkar Insawifiahna Thar Ber: Chief Justice Ashutosh Kumar leh Justice Michael Zothankhuma te ṭhutna bench chuan November ni 3,2025 khan he thubuai hi an ngaihtuah a. Court chuan PWD Engineer-in-Chief chu Aizawl–Thenzawl–Lunglei Road-a sum hman dan leh tuna a dinhmun  report kimchang taka theh lut turin a hriattir a. Sawrkar ukil chu project document kaihhnawih leh  expenditure statement te chu theh lut turin a hriattir bawk. Bench chuan mipui vantlang kawngpuia him taka an zin theihna chu Indian Constitution hnuaia Article 21 hian a huam tel thu a sawi a. State chuan vantlang himna ngaihtuah chhunzawm zel tura mawhphurhna a nei tih a sawi bawk.November ni 7, 2025 khan Chief Justice Ashutosh Kumar leh Justice Michael Zothankhuma te ṭhutna bench chuan he thubuai hi a ngaihtuah leh a. November ni 3,2025 a Court-in thu a lo pek tawh angin State chuan Aizawl–Thenzawl–Lunglei kawngpui dinhmun report chu affidavit kaltlangin a theh lut a. Affidavit-ah hian Ninth Mizoram Legislative Assembly-a Committee on Estimates-in rawtna a lo siam tawh angin Sawrkarin hma a lak dan tur update a pe a ni.State chuan Aizawl–Thenzawl–Lunglei kawng siam ṭhat leh enkawl a nih theih nan April ni 30, 2025 khan ₹ 58.99 crore chu sanction a nih tawh thu a hriattir a. Amaherawhchu, sawrkarin October ni 16, 2025 khan administrative phalna leh expenditure sanction a pek chauh avangin he sum hi hman a la nih loh thu a sawi chiang a ni.  Ministry of Science & Technology hnuaia Central Road Research Institute (CRRI)-in a hmuh chhuah danin, sanctioned amount hi 100–134.2 kmp leh 152–164 kmp inkar kawngpui tihchakna atan hman a ni thei dawn a. Affidavit-ah hian PWD chuan project kalpui tur contractor thlan theihna tender a  buaipui mek thu a tarlang a. Tender zawh veleh hian hna thawk ṭan thei tura beisei an nih thu a sawi bawk a ni. Central Road Research Institute (CRRI)- te hmuh dan chuan tuna kawng chhah zawng hi a kawng a kal hman dan leh a rit lak ten a zo lo an ti tih court ah hian an thlen a, kawng hi tun ami aia chhah a siam tum a ni.  He thubuai hi November ni 18,2025-a  ngaihtuah leh turin  court hian a ruat nghal a ni. Court in a enzui avangin hmalak ve zel, Six Pack Road Pukpui siam tan :He thubuai hi put luh tirh atangin court hian sawrkar te an kawng siam chin sawifiah turin a tih thin avangin leh a enzui avangin khawpui chhung te, khaw kar kawng an siam thalak te an thehlut ve zel a. Chuti chung pawhin hengte hi ruah sur avangin a lo chhe leh hman zel tho thin a. Tun hnaiah hian chakzawka hmalak tumin Pukpui chho “Six Pack Road” an tih mai te pawh khawih chhoh tan mek a ni tih he kawng enkawltu Pu T Lalhimpuia, MLA in social media a tarlan atangin tarlan a ni.(www.jclalnunsanga.in).(He thubuai PIL No. 12 of 2022 , Lalduhawma Pachuau Vs State of Mizoram & Ors-ah hian thubuai thehluttu  LTP, Lunglei Thai Pawl tan hian JC Lalnunsanga dingin sawrkar tan hian Mary L. Khiangte a ding a ni.)

Delhi High Court Chuan PM Modi-a Degree Appeal Tihkhawtlai Chungchangah Delhi University Chu Chhanna Thehlut Turin a Ti

13/11/2025
JC

Delhi High Court chuan nimin November ni 12, 2025 khan Prime Minister Narendra Modi-a degree chungchanga Single Judge-in August thlaa puanzar loh tur thupek a chhuah laka appeal chu a ngaihtuah a. Division Bench Judge pahnih awmna Chief Justice(Delhi HC) Devendra Kumar Upadhyaya leh Justice Tushar Rao Gedela-te thutna bench chuan Delhi University(DU) chu kar thum hun chhung thehluhna tur hun a pe. He appeal hi AAP(Aam Aadmi Party) hruaitu Sanjay Singh, RTI activist Neeraj Sharma leh Advocate Mohammad Irshad-te thehluh a ni a. Kum 2016-a Central Information Commission(CIC)-in Modi-a BA Degree chungchang chhuah tura DU laka thupek a chhuah Modi a Degree pe tura a tih chu Single Judge chuan August ni 25 khan a pek loh turin a ti leh a. He thupek/sutna hi he appeal hian hian khin a ni. Kum 2016 khan CIC chuan DU hi vantlang zirna hmun a nih avangin Modi-a degree chungchanga thu chiang chu puangzar turin a ti a. Mahse, Justice Sachin Datta chuan chu thupek chu thiatin, DU-in RTI ngenna chu politics lama infuihna a nih thu leh Modi-a degree chungchang chu mipui ngaihvenna(public interest) tham a awm loh thu a sawi chu a pawm a ni. Tunah chuan thubuai thehluttute chuan Delhi University hian RTI Act Section 8 hnuaiah exemption a dil thei em tih leh, lo thei  ta se, mipui vantlang tana hriat tura chhuah tur a ni em tih a zawt mek a. Nimin nilaini khan High Court chuan appeal hi thehluh tlai a nih thu a sawi a. Judge-te chuan thubuai an ngaihtuah hma hian tihkhawtlai hi ngaihdam(condone) a nih leh nih loh tur an enfiah hmasa dawn a ti a. January ni 16, 2026-ah ngaihtuah leh turin a ruat a ni. An Buaina Bul: BJP chuan PM Modi chu kum 1978  leh 1983 khan DU leh Gujarat University atangin BA leh MA degree a zir chhuak an ti a. Amaherawhchu, sawiseltu tam tak leh Aam Aadmi Party(AAP) chuan a degree neih hi an ringhlel a. RTI activist Neeraj Sharma hian kum 1978-a DU BA program-a inziak lut zirlai list, an roll number, marks-te leh an pass nge fail  thlengin a lo dil tawh a. DU CPIO(Central Public Information Officer) chuan he dilna hi hnarin, data chu “third party information” a nih thu a sawi a. Sharma chuan CIC hmaah appeal a thehlut nghal a. Kum 2016 khan CIC chuan puangzar tura thupek a chhuah phah ta a ni. Delhi University chuan court hnenah zirlaite record, roll number, an hming leh marks te chu RTI Act hnuaia puanzar theihna atangin awl tir (exempt) an ni a ti tlat a ni(www.jclalnunsanga.in). (He case-ah hian thubuai thehluttute tan Senior Advocate Shadan Farasat a ding a, Delhi University aiawh hian SGI Tushar Mehta a ding a ni.) 

High Court-in Airport Chei Ṭhat Hna Thawh chin Zawt Chiang, Sawrkarin Airport Chei Ṭhat Hna February 2026-a Zawh Hman Beisei.

12/11/2025
Admin

November ni 3,2025-a Chief Justice (Gauhati High Court) Ashutosh Kumar leh Justice Michael Zothankhuma te ṭhutna bench-in thu a lo pek tawh angin, Sawrkar chuan Lengpui Airport siam ṭhat leh tihchangtlun hna thawh mek chungchangah November ni 7 khan report a theh lut a. Report chuan “Improvement/Upgradation of Operational and Non-Operational Facilities of Lengpui Airport (Renovation of Terminal Building)” Project-a November ni 1, 2025-a an hmalakna chin a tarlang a ni. Affidavit-a tarlan danin, siam ṭhat hna thawh tur tam tak chu zawh fel a ni tawh a. A chhawng khatna chu 5,167.35 sq. m. a zau niin structural, flooring, ceiling, partition, plumbing, leh a dangte chu tihfel vek a ni tawh a. Chutiang bawkin, ground floor chu 4468.99 sq. m.-a zau a ni a, check-in area 540 sq.m a zau tih loh chu khawih fel vek a ni tawh a ni. Hna hmabak hi check-in area chei thar leh toilet block thar siam a ni a. Amaherawhchu, check-in counter hi first floor-a an hmun ruat thara sawn a nih hma loh chuan khawih ṭan theih a ni rih lo, an ti a ni. Heng hna la awmte hi tihfel a nih theih nan thla thum vel a ngai dawn niin an chhut a. Sawrkar chuan February ni 28, 2026 hmain project pumpui hi zawh fel a nih theih an beisei a ni. KR Construction lam pawhin, Court-in a hna thawh chin affidavit hmanga sawifiah tura a tih angin March, 2025 aṭangin Department lamin an thawh tawh thu a sawi.July ni 3, 2025-a Court-in thu a lo chhuah tawh angin, respondent no. 6 (second contractor) hnenah court-a insawifiah tura notice pek tawh ni mah se, court hmaah a la inlan lo va. Court chuan a lungawi lohna lan tirin contractor lakah warrant of arrest (bailable) thu a chhuah hmanga court lehah chuan inlan ngei turin a hriattir. He thubuai hi November ni 18,2025-ah ngaihtuah leh turin ruat a ni a.Lengpui Airport chei ṭhat nan hian  Sawrkarin Rs 19,58,99,822/- a dah a. Airport hi chei ṭhat a nih mek laiin ni 10 March, 2022 khan a slab a chim a. A satuten an hna an thawk ṭha tawk lo tiin High Court-in Airport chei hna hi vil zui se tiin Pi Vanramchhuangi hian PIL hi High Court-ah ni 12.7.2022 khan a pu lut a ni. Meghalaya High Court lamah pawh an Airport (Umroi) chungchangah PIL 4 of 2021 a kal ve mek a. Tun hnaia Court hearing an neihah Rs 600/- Crore vel Umroi Airport zauh nan ruahman a nih thu Court hi hriattir a ni. Guwahti Airport pawh Rs 2,000/- Crore hmanga terminal thar siam a ni. (www.jclalnunsanga.in).(He thubuai PIL No. 8 of 2022, Vanramchhuangi Vs State of Mizoram & Ors-ah hian thubuai thehluttu tan Joseph Lalchhanhima Renthlei a ding a. Sawrkar tan Mary L. Khiangte dingin, M/s KR Construction Firm tan hian JC Lalnunsanga a ding a ni).

India Ram High Court-a Bengngawng Tawngtheilo Ukil Interpreter Nena Dinna Hmasa ber- Karnataka High Court

11/11/2025
Jc

Supreme Court-a bengngawng tawngtheilo ukil interpreter nena inlan hmasa ber lo ni tawh, Kristian nula Sarah Sunny chu Karnataka High Court lamah pawh interpreter puihna nen Court-ah a ding chhunzawm zel a. Hei hian India ram chhunga High Court zingah Karnataka High Court chu bengngawng tawngtheilo ukil, interpreter nena dinna hmasa ber a nih tir a ni.Karnataka High Court-a A DinnaSarah Sunny hi Karnataka High Court-a case putluh, ni 1 September, 2025 a thutlukna siam tak, Amit Ashok Vyas AND Union of India case-ah a ding leh a. He case-a a din tum pawh hian Justice M Nagaprasanna chuan a fak hle a. ‘A tumruhna chu mi tam tak tan chona a ni zel a, he thil hi chiang taka kan inhriat nawntirna ni se la, rorelna dik chuan beng atang ringawtin a ngaithla lova, thinlung atang a ngaithla tel thin a ni’ tiin Justice M Nagaprasanna chuan a sawi.He case  Amit Ashok Vyas AND Union of India, Sarah Sunny dinna hi hmeichhe pakhatin, a pasal Section 41A Cr.P.C hnuaia Police Officer hnena inlan tura hriattir a nihna titawp tur te, amah manna tura thupek kal zel titawp tur te, Jurisdictional Magistrate hmaa inlan tura tih a nihna titawp tur te in a dil a. Heng te mai bakah hian LOC an chhuah hnua hmalak dan tur te siam tura ngenna Court hnenah a thlen a ni.Supreme Court-a A Inlanna Hmasa berNi 22 September, 2023 khan  chutih hunlaia Chief Justice Dy Chandrachud hmaah, Kristian nula Sarah Sunny chu Supreme Court-a bengngawng inlan hmasa ber ni turin a ding a. Sarah Sunny thawhpuinu Advocate-on-record(AOR), Sanchita Ain chuan court hnenah interpreter a dilsak a, court chuan phalna pein, sign language interpreter-in a thubuai dinna chu a pui a. Hemi tum a Sarah Sunny case dinna hi Rights of Persons with Disablities nena inkhaihhnawih a ni."Constitution Bench-a thubuai ngaihtuahnaah hian mi zawng zawngin thubuai kalpui dan an zawm theih nan tawnglettu kan nei ang tih kan lo ngaihtuah  tawh reng a ni," tiin Justice Dy Chandrachud chuan a sawi.A Lehkha Zir Chhoh DanSarah Sunny Parambett hi 1998-ah a piang a. Thla 18 chauh a nih laiin a beng a ngawng tih hriatchhuah a ni a. Nimahsela, a nu leh pa te chuan intluktlanna an ngaihpawimawh em avangin a unaute nen  zirna in pangngaiah bengngawng mahsela an kaltir a;  Bengaluru-a Cluny Covenant School-ah te, St. Claret Pre-University College- ah te, Jyoti Nivas College Autonomous-ah te a lut thin a. Sunny hian Bengaluru-a St. Joseph’s College-ah LLB hi a zir bawk. Kum 2021 khan LLB hi  a zir chhuak a, tichuan Karnataka Bar Council-ah inziak lutin a practice chho tan ta a ni.Sarah Sunny hian  Bengaluru-a Indian Red Cross Society -ah te, Everstone Capital Advisors Pvt. Ltd -ah te, Kochhar &Co.-ah te, Lakshmikumaran & Sridharan-ah te leh Centre for Law and Policy Research-ah te internship a lo ti thin tawh bawk. AOR Sanchita Ain chuan ," Mi tam takin ngaihdan nghet tak an lo nei thin a tichhia a, hei hian zirlai bengngawng tam zawk chu dan zir turin a fuih ang a, legal system chu bengngawngte tan a hman theih turin a fuih ang," tiin Sarah Sunny chungchang chu a sawi.India rama rorelna inah hian bengngawng tawngtheilo te tan kawng a harsa thin hle a. Tun hma kha chuan bengngawng tawngtheilo ukil te chuan engkim ziaka a court-ah an chet vel a ngai thin a. Tunah erawh chuan Court hrang hrang-ah te pawh bengngawng tawngtheilo ukil te pawhin anmahni ngeiin, interpreter puihna nen, an case dinnaah an argue ve thei ta a ni. Kristian nula, Sarah Sunny tumruhna leh kum 2023-a Supreme Court hmalakna khan bengngawng tawngtheilo te tan rorelna in sangah kawng a hawng a nasa hle a ni(www.jclalnunsanga.in)

Kerala High Court chuan Medical Qualification Nei Lo Physiotherapist-te Chu an Hming Hmaa 'Dr' Dah A Phalsak Lo

10/11/2025
JC

Kerala High Court chuan November ni 4, 2025 khan physiotherapist leh therapist medical qualification nei lote chu “Dr” an hming hmaah an dah thei lo a ti. Justice V.G Arun chuan medical degree nei si loa “Doctor” nihna hman hian Indian Medical Degrees Act, 1916 a bawhchhia a ti a. Court chuan Indian Medical Degrees Act, 1916 leh Competency Based Curriculum for Physiotherapy and Occupational Therapy (a hmaa prefix “Dr” lo huang tel) karah insutna a siam a ti. Chumi bakah chuan Ministry of Health & Family Welfare chuan Approved Syllabus for Physiotherapy (2025) atangin  prefix la chhuak turin thu a lo chhuah tawh a ni. Court chuan prima facie thubuai hmuin thuneitute chu physiotherapist leh occupational therapist medical qualification nei mumal lo te chu prefix “Dr” an hman loh nan enchiang turin a hriattir a.  He thu hi December ni 1, 2025-ah ngaihtuah leh turin a ruat nghal a ni(www.jclalnunsanga.in). (He thubuai hi WP(C) No. 41064 of 2025 niin Indian Association of Physical Medicine and Rehabilitation (IAPMR) thehluh a ni a. Thubuai thehluttu tan hian Advocate VV Asokan (Sr.), S. Parvathi, T.K. Sreekala, Nikitha Susan Paulson, Uthara Asokan leh K.G. Anil te an ding a ni.) 

Gauhati High Court : Kawnpui-Khamrang Kawng Siamtu M/s. J Infratech Ltd -te Chu Court-ah Inlan Loh Chuan Warrant of Arrest Kan Ngaihtuah Ang

06/11/2025
JC Lalnunsanga

Vawiin November ni 6, 2025 khan Gauhati High Court, Aizawl Bench-a Chief Justice (Gauhati High Court) Ashutosh Kumar leh Justice Michael Zothankhuma-te ṭhutna bench chuan, Kawnpui leh Sairang inkar kawngpui dinhmun ṭha lo tak chungchanga Mizoram Truck Drivers’ Association (MTDA)-in PIL-a thehluh chu a ngaihtuah a. NHIDL leh M/s J Infratech Ltd. te chu an kawng siam thlalak affidavit hmanga court a thehlut turin a ti. Court order ni 24.10.2025 angin NHIDCL chuan an insawifiahna thehlutin, Kawnpui leh Khamrang (118 to 130 kms) inkar chu July 2025 khan PWD kut aṭanga an lak thu an sawi a. Bilkhawthlir–Kolasib (70-95 Kms), Kawnpui–Khamrang (118-133 Kms), leh Buichali–Sairang (147.8-159 Kms) kawng inkarte chu siam ṭhat hna lo thawk lailawk turin (short term maintenance work) M/s. J Infratech Ltd chu June ni 4, 2025 khan NHIDCL chuan an ti a. Hemi hna lo thawh lailawk tura Work order chu July ni 7, 2025 khan NHIDL hian M/s Infratech hnenah tihchhuah a ni a. NHIDCL leh M/s. J Infratech Ltd te chu kawng khuar hnawhkhah te, leimin leh tui luan kawr thenfai te, lung rem te leh a dangte siam hna thawk turin an ti a ni. Ruahsur nasat leh motor veivak an tam avangin hna hi thawh chak theih a ni lo tiin court an hriattir.  NHIDCL insawifiahna chu court hian thutlingah pawm lovin, kawng chu siam ngei a nih tihchian nan kawng siam thlalak chu affidavit hmanga thehlut turin a ti a. M/s. J Infratech Ltd. chu court hmaa inlan tura hriattir ni mah se, an inlan lo va. Court chuan a lungawi loh thu sawiin, M/s. J Infratech Ltd. chu an hnathawh chin bakah an hnathawh thlalak kim chang nena affidavit hmanga court hriattir  turin a ti a. Court hmaa an inlan lo nawn leh a nih chuan, he kawngpui hi Mizoram tana a pawimawh em avangin, court-a inlan turin warrant of arrest chhuah thlengin an ngaihtuah ang tih a sawi lang a ni.   Thubuai thehluttu chuan tun hnaia kawngpui dinhmun chhe tak avangin nunna chan an awm tawh thu chu court a hriattir a; court chuan thil awm danah a lungawi loh thu a sawi a ni. He case hi November ni 25, 2025-a ngaihtuah leh turin a ruat a ni (www.jclalnunsanga.in).(Hemi case PIL No. 2 of 2025 -ah hian thubuai thehluttu tan Emily Chhangte a ding a. Samuel Vanlalhriata chu NHIDCL tan dingin, Vanneihsiami chu sawrkar tan a ding. Vawiin High Court Order hi website-ah upload a nih hunah lo dah a ni ang) 

DISCLAIMER