High Court

An Man Chhan A Chhungte Hnena Ziaka Pe Lova, Phone Kaltlang Chiaha An Hrilh Avangin Kerala High Court-in NDPS Thubuaia Rinhlelh Chu Bail-in Chhuah

27/02/2026
Admin

Kerala High Court chuan ni 19, February 2026(Ningani) khan Narcotic Drugs and Psychotropic Substances Act (NDPS Act) hnuaia pawikhawihtua rinhlelh chu, a chhungte hnena an man chhan ziaka pe lova, phone kaltlang chauha hrilhhriat an nih avangin bail-in a chhuah. Dr. Justice Kauser Edappagath chuan pawikhawihtua rinhlelh chu, thubuai nena inkaihhnawihna an nei ngei a ni tih hmuh ni mah se, an man chhan hrilhriatnaa dan zawm tur chu zawm an nih loh avangin an manna chu a tihchhiat thu a sawi.Thubuai thehluttu hi Section 22(c) leh 29, NDPS Act hnuaiah ni 23, January 2026 khan man a ni a. Thubuai thehluttu hian an man chhan chu danin a sawi anga hrilhhriat a nih loh thu a sawi a. Court chuan Supreme Court leh High Court thutlukna lo siam tawh chu a en a, tunah chuan an chhungte hnena an man chhan hrilhhriatna chu ziaka pek ngei ngei tur a nih tawh thu a sawi a. He thubuaiah hian, a chhungte chu phone kaltlang chiaha hrilh an nih avangin, Court chuan an manna chu dan kalh a ni tiin, bail a pe ta a ni.(He thubuai Basheer Thaliyil v. State of Kerala and Anr. Bail Appl. No. 828 of 2026 ah hian thubuai thehluttu tan Adv. P.Mohamed Sabah, Adv. Libin Stanley leh ukil dangte an ding, sorkar tan Senior Public Prosecutor, Sreeja V a ding)

Pu RL Peka Chhungte High Court A An Zualkona High Court In Thutlingah Pawm, Sawrkar Leh Tanhril atanga Hnawhchhuahna Sign-tute Insawifiah Turin Ti.

24/02/2026
Admin

Vawiin ni 24.02.2026 khan Pu RL Peka nupui in police in ni 27.01.2026 a an thuchhuaha Marina Lalchhanchhuahi thattu a a pasal an puhna leh hemi Police PR avanga veng chhung atanga hnawhchhuahna thiah dilna chu a ngaihtuah a. High Court ah hian an in halna avanga an bungraw chhia sawrkar leh hnawhchhuahna signtu laka compensation Rs 7,61,130/- dilna leh henga inhnamhnawih te case siamsak turin an dil tel.Thubuai thehluttu hian a pasal chu engti kawngmaha Marina-i thattu a nih theih loh thu sawiin, YMA Mibo Zawnna ni 3.12.2026 a an thuchhuah ah pawh ni 1.12.2025 tlai lam dar 5 ah Marina-i hi Tanhril Vengtharah auto a chuang lai hmuh thu tarlan a ni a. Hemi ni hian Pu Peka hi chawhnu pumpui inah awmin an chhungte nen chaw an eikhawm a, pawn lamah a chhuak tawh lo. Marina-i thih avanga an in atanga zuang thla ni lovin, accident palh avanga tla thla niin mit ngeia hmutu pawhin a zuangthla ni lovin a far thla tiin a sawi. Tanhril atanga hnawhchhuahna lehkha siamtute hian an awmna pawl (YMA, MHIP, MUP, LC) anga thutlukna (Executive Committee notice leh thurel) pawh awm lovin hnawhchhuahna hi an siam.Thubuai thehlutttu ukil hian Police thuchhuahtu IGP & Chief Public Relation Officer, MRP, Media Cell hian Supreme Court in People’s Union for Civil Liberties & Anr. Vs. State of Maharashtra & Ors (2023 INSC 833) case a Police in PR an siam dan tur kaihhruaina a bawhchhia a ti a. Tin, Supreme Court in Tehseen S. Poonwalla Vs. Union of India & Ors (2018 9 SCC 501) case a hetiang mipui mob rule chungchanga inhnamhnawihte case siam sak tur an nih thu court-ah hian a thlen a. Pu RL Peka te in halsak kaihhnawihah hian Social Media-ah heta inhnamhnawihte chiang taka lang chunga tumah man an la nih loh thu court-ah hian a sawi. Court hian sawrkar leh hnawhchhuahna lehkha sign tute hi ni 9 March insawifiah turin a ti.(Case detail - WPC 12/2026 C Laltanpuii Vs State of Mizoram & 7 ors)Dan lam kaihhnawih thutharte hi Whatsapp Group siamin update post thin a ni a. Hemi Groupa i awm ve duh a nih chuan hemi link-ah hian lo join ve dawn nia. https://chat.whatsapp.com/BEZzj5EzMLCBEQjtWYRFug?mode=gi_c https://chat.whatsapp.com/DMaRfCsAQimCo6fLFyYNuS?mode=gi_c

Kawppuite Hlawh Zat Chu RTI, Act Hnuaiah Dan Anga Dil Theih A Ni Lo, Hlawh Zat Chu Mimal Thil A Nih Thu Rajasthan High Court-in Tichiang

24/02/2026
Admin

Rajasthan High Court chuan ni 3, February 2026 (Thawhlehni) khan, hmeichhe pakhatin Right to Information (RTI) Act, 2005 kaltlanga a pasal hlawh zat hriat a dilna chu a hnawl sak. January- March 2024 inkara a pasal hlawh zat inziahna chu a dil a. A pasal hi Bhilwara-a police department-a hnathawk a ni a. Thuneitute chuan mimal hlawh zat chu “personal information” (“mimal thil”)a ni tiin a dilna chu an hnawl sak a, midangte “personal information” chu RTI Act hnuaiah chuan puangzar lo turin hriatthiamna a awm thu an sawi a. Rajasthan State Information Commission chuan he thutlukna hi an pawmpui bawk a ni.He thubuai hi Rajasthan High Court lama ngaihtuah a nih hian, Justice Kuldeep Mathur chuan sorkarin a dilna an hnawlsaknaah chuan dan lova thil tih engmah a hmu lova. High Court chuan Supreme Court thutlukna, Girish Ramchandra Deshpande vs. Central Information Commissioner & Ors. ah a innghat a, chu thutluknaah chuan mimal hnathawhna chanchin chu, a chhawrtu leh a chhawra te inkar a nih thu an sawi a. Hetiang ang chanchin hi chu “personal information” huang chhunga a awm thu an sawi a, mipui tam tak nena inkaihhnawih thil a nih loh chuan puanzar theih a nih loh thu an sawi a ni.Rajasthan High Court chuan Section 8(1)(j) RTI Act chu a tarlangin, he dan hnuaiah hian “personal information” chu vantlang mipui tam tak kaihhnawih thil a ni lo emaw dan kalha mimal thil tlangzarhna a awm thei a nih chuan puanzar loh theih a nih thu an sawi a. He thubuaiah hian court chuan vantlang mipui kaihhnawih thil engmah a awmin a hmu lova, court chuan a pasal hlawh zat RTI, Act hmanga hriat a dilna chu a hnawlsak a, he thubuai hi a titawp ta a ni(www.jclalnunsanga.in)(He thubuai Kanta Kumawat vs. State of Rajasthan & Ors. [2026:RJ-JD:6212] ah hian thubuai thehluttu tan Adv. Gopal Lal Acharya a ding)

Helmet A Khum Loh Avangin Zangnadawmna Dawn Tur Tih Hniam Sak A Ni: Accident Avanga A Thihnaah Thiamlohna A Nei Ve Tiin Madras High Court Chuan Thutlukna A Siam

20/02/2026
Admin

Helmet A Khum Loh Avangin Zangnadawmna Dawn Tur Tih Hniam Sak A Ni: Accident Avanga A Thihnaah Thiamlohna A Nei Ve Tiin Madras High Court Chuan Thutlukna A SiamMadras High Court chuan ni 10, February 2026 khan kum 19 mi motor-cycle chesuala boral ta chu, a fimkhur loh avangin thiamlohna 25% a neih thu an sawi a, a zangnadawmna dawn theih a tih hniam sak. Motor-cycle khalhtu hian chetsualna a thlen lai hian helmet a khum lova, driving license a nei lo bawk a ni. Court chuan accident thlen tirtu tak chu Eicher Van khalhtu fimkhur loh vang leh khalh chak vang niin a sawi a. Nimahsela, a lua hliam na tak a tawrhna chhan erawh motorcycle khalhtu in dan zawm lova, helmet a khum loh vang a ni, tiin an sawi. Justice C.V. Karthikeyan leh Justice K. Kumaresh Babu te chuan motorcycle khalh laia helmet a khum loh avang hian, a luah hliam na tak a tawrh phah a, chumi chuan a thihna chu a thlen ta niin an sawi .Accident hi ni 3, December 2017 ah khan a thleng a, he accident-a a tuartu hian surgery lian tak tak vawi 3 lai a paltlang a, tichuan a na tuar lovin ni 24, November 2018 khan a boral ta a ni. Motor Accidents Claims Tribunal chuan Rs. 33,57,696 chu zangnadawmna turin an hlan a, chumi hnuah chuan a thiamlohna 25% chu paihin, Rs.25,18,272 chu 9% interest neiin a pe ta a. Section 173 of the Motor Vehicles Act, 1988, hnuaia an appeal naah chuan, insurance company chuan zangnadawmna an pek zat chu a hnial a. High Court chuan a thihna chu accident atanga a hliam tawrh nen a inzawm tlat thu a sawi a, an inenkawlnaa an sum sen zawng zawng zangnadawmna pek tawh chu a pawmpui a ni.Chutihlai chuan, Court chuan a hrehawmna leh na tawrh avanga Rs. 2,00,000 zangnadawmna pek tawh chu pawm lo a. Court chuan a tuartu boral hnu chuan hemi hnuaia zangnadawmna chu pek theih a nih loh thu an sawi a. Bench chuan an thutlukna siam tawhah chuan a innghat a, hemi hnuaia zangnadawmna chu a tuartu a thih tawh chuan pek theih a ni lo, tiin an lo sawi tawh a. Hemi hnuaia zangnadawmna an pek tawh Rs. 2,00,000 chu paih a ni a, tin, a thiamlohna a tel avangin a zangnadawmna pek tawh atangin 25 % paih leh a ni a. Tichuan, zangnadawmna an pek theih chu Rs. 23,68,272 ah Court chuan a tih hniam sak ta a ni. Insurer-te ngenna chu a then lai pawm sak a ni a, zangnadawmna diltute dil belhna erawh a hnawl thung(www.jclalnunsanga.in).

ITAT Chuan Senior Advocate Mukul Rohatgi-a Rs 133 crore Income Assessment Chungchanga Assessment Neih Tha Leh Tura Order A Sut

20/02/2026
Admin

ITAT Chuan Senior Advocate Mukul Rohatgi-a Rs 133 crore Income Assessment Chungchanga Assessment Neih Tha Leh Tura Order A SutNi 19, February 2026 khan Income Tax Appellate Tribunal, Delhi chuan Supreme Court lawyer, Senior Advocate Mukul Rohatgi income Rs.133 crore assessment chungchanga endikna nei tura tihna revision order chu a sut a. ITAT Vice President, Mahavir Singh leh Accountant Member, Manish Agarwal te chuan Assessment Year 2020-21 atana income assessment chu nei leh turin finfiahna tha tak a awm lo tih a sawi a. Mukul Rohatgi income chu disallowance neih hnuah Rs.133.46 crore a ni tih scrutiny assessment atangin hriat a ni a. Tribunal chuan a appeal-na chu a pawm a, tichuan Principal Commissioner of Income Tax (PCIT) in revision order Section 263 of Income Tax Act hnuaia a pek chu a sut ta a ni.Rohatgi-a chungchang hi scrutiny assessment hnuaiah endik a ni tawh a. Hetah hian Section 24(b) (home loan interest) hnuaiah Rs. 44.77 lakh leh Section 14A(expenses related to exempt income) hnuaiah Rs. 40.10 lakh disallowance siam a ni a. Chumi hnuah chuan a income chu Rs. 133.46 crore a chhut sak a ni a. Nimahsela, March 2025 khan Income Tax Department chuan Section 263 hnuaiah assessment nei tawh sa chu ennawn turin hriattirna a pe leh a ni.Tax Department chuan heng thil pathumte avang hian assessment neih that an duh a. A hmasa berah chuan mutual fund investment atanga capital gains-ah chuan engtin nge tax lak a nih tih te. A pahnihnaah chuan, India ram chhung leh pawna annual letting value an chhut dan te, leh pawisa an hmuhna atanga tax paih a nih loh avanga hremna lek kawh a nih loh vang te niin an sawi. Tribunal chuan Section 263 hnuaia thuneihna chu original assessment-a endikna thar neihna tur leh fel lohna a awm lo chunga, thlirna tlang dang atanga en duh vang ringawta hman tur a nih loh thu an sawi a. Original Assessment-ah chuan dik lohna a awm ngei a ni tih finfiahna chiang tak a awm a ngaih thu an sawi a. Tax department lam chuan fel lohna leh dik lohna a awm ngei a ni tih an finfiah theih loh avangin, Tribunal chuan thubuai chu a tih tawp sak ta ni.Mukul Rohatgi hi ni 17, 1955 ah a piang a. Law Degree hi Government Law College, Mumbai atangin a zo a. A pa a hun laia ukil tha leh judge ni ta Justice Awadh Behari Rohatgi kaihruaina hnuai atanga seilian a ni. India sawrkar ukil sang ber Attorney General of India kum 2014 atanga 2017 chhung khan a ni a. Private a practice a duh zawk avangin a bang a ni.A vawikhat dinah Rs 10 lakhs atanga Rs 20 lakhs a charge tlangpui. Case a harsa leh lian deuhah phei chuan hei ai a sang hi a charge thin. India ram a company leh milian chhungkua ten an ruai tlangpui. Ambani te chhungkaw ukil pawh hi a ni. (www.jclalnunsanga.in)

Gauhati High Court In Lengpui Airport PIL Case-ah Thubuai A Ngaihtuah

19/02/2026
Admin

Ni 17, February khan Gauhati High Court Chief Justice Ashutosh Kumar leh Justice Michael Zothankhuma ten Lengpui PIL case chungchang an ngaihtuah leh a. Contractor pakhat zawk Pu Zoramchhana ukil JC Lalnunsanga chu court hmasa a an hnathawh tawh chin affidavit thehlut tura a tih angin court-ah hian affidavit a thehlut a.Affidavit-ah chuan Pu Zoramchhana hian Civil Work , a chhung chei te a khawih a. Ni 3.3.2022 a sawrkar nena an inremna bakah ni 7.11.2022 khan inremna siam belhin a hna khawih zawng zawng hi Rs 19.56 Cr a ni a. He court thupek anga a hna endiktu ten a hna thawh chin ni 1.12.2023 ang chuan 96 % zo tawh tih court ah an thlen thu an sawi a.Hemi mai baka court order ni 3.11.2025 a Pu Kamlova leh Pu Zoramchhana hnathawh chin a endiktu sawrkar in court a hriattir danin ni 1.11.2025 thlenga an hna thawh atanga la bang a sawi te chu;Pu Kamlova hna lamah chuan ⁠ check-in area (540sqm) chu siam that a, inthiarna thar siam te a la ngai a. Heng te hi check in area chu a hmun thar a sawn a nih hunah chiah siam theih a ni dawn tih court ah an thlen a.Pu Zoramchhana hna lamah chuan a chung tur siam a la ngai a. Order hi company ah thlen tawh niin an design te pawm a nih hnuah a chung khuh hi tan a ni ang tih court ah an thlen. Pu Zoramchhana chuan a affidavit ah hian PWD Department te chuan Pooja Steel Corporation chu a chung siam tur hian an thlang a. A hmanraw hman tur pawh company in ni 1.8.2024 a an dil lai lawk Rs 56 lakhs chu ni 8.8.2024 khan a pek tawh thu a sawi a, hna hi 98 % zo tawh angin a in sawi.Contractor-te ukil Pu JC Lalnunsanga hian a affidavit-ah chuan, Lengpui Airport-a hna thawh tha lo ang a lan chhan chu Airport dangte nen kan tehkhin thin avang a nih thu a sawi a. Lengpui Airport cheinna Project atan hian Rs 39 Crore bawr (Kamlova hna Rs 19.59 Cr, Zoramchhana hna Rs 19.56 Cr)vel chiah sanction a nih laiin Shillong (Meghalaya) a Umroi Airport zauh nan Rs 600 Crore lai sanction a ni a. Rs 2,000/- Crore lai mai Lokpriya Gopinath Bordoloi International Airport chei that leh hna zawh nan sanction a nih thu a sawi.PIL thehluttu (Pi Vanramchhuangi) ukil Mr. Joseph Lalchhanhima Renthlei chuan court-ah hun a dil a. Hna te enchiana, a tul anga hna la thawh zawh lohte thlalak court-ah a thehluh a phalsak.Thubuai hi ni 5 March ah ngaihtuah a ni leh ang.(He thubuai PIL No.8/2022 ah hian petitioner tan Joseph Lalchhanhima Renthlei a ding a, sawrkar tan Mary Lalruatkimi dingin, contractor-te tan JC Lalnunsanga a ding)Dan lam kaihhnawih thutharte hi Whatsapp Group siamin update kan post thin a. Hemi Groupa i awm ve duh a nih chuan hemi link-ah hian lo join ve la.https://chat.whatsapp.com/BEZzj5EzMLCBEQjtWYRFug?mode=gi_c (Group 1)https://chat.whatsapp.com/DMaRfCsAQimCo6fLFyYNuS?mode=gi_c (Group 2)

DISCLAIMER