District Court

Twisha Sharma Pasala Nu Girbala Singh, Judge Hlui Chu Twisha Sharm-i Thihna Chungchangah CBI In An Man

29/05/2026
Admin

CBI chuan ni 28,May 2026 ( Ningani) khan Bhopal-ah District Judge hlui Giribala Singh, Twisha Sharma pasal nu chu Model/Flim star Twisha-i thihna kaihhnawihah an man a. Madhya Pradesh High Court chuan hemi hma ni hian anticipatory bail pek tawh chu a thiahsak bawk a ni. CBI officer-te hi an inah zing dar 10:30 vel khan lutin, darkar eng maw zat an endik hnuah tlai dar 5:10 bawr khan an man ta a ni. Chhui chianna an neih lai hian, thil thlenna hmun tak hi hriat chian tumin, forensic examination an nei nghal a, 3D camera changkang tak hmangin thla laksak vek a ni. Official-te chuan in hmun leh a chhehvel, inchung leh balcony thlengin an enfiah a, he thil thlenna hmun hi pawn lam atanga hmuh theih a nih leh nih loh an enfiah bawk a ni.Giribala Singh hi Bharatiya Nyaya Sanhita (BNS) hnuaia section hrang hrang, dowry death, hmeichhe chunga pasal emaw a chhungte emaw nunrawnna, leh inthuruala chetlakna hnuaiah thubuai siamsak a ni. Hemi bakah hian Dowry Prohibition Act hnuaiah thubuai siamsak a ni bawk. CBI FIR-in a tarlan danin, inneih lai khan Twisha Sharma-i chhungte hnen atang hian cheng nuai 2 an lo phut tawh a, hemi hnu hian pawisa hi an pe nghe nghe. CBI chuan kar liam ta khan he thubuai hi an kutah lain, state police-in Giribala Singh leh a fapa, Samarth Singh-te chunga FIR an lo ziah luh tawh chu an ziak thar leh a ni.High Court-a hearing an neih lai khan, Twisha Sharma-i chhungte aiawhtu ukilte chuan, Twisha-i chu a pasal inah rilru hreawmna nasa tak a tawh thin thu leh an ina dan beha a awm reng thin tih an sawi a. Court chuan Twisha-i ruang an hmuh laia a taksaa hliam hnu hma pasarih zet hmuh a ni te, chhui chianna an neih laia Giribala Singh-i thlawpna tha lo te, leh WhatsApp chat-a rilru hliamna chi hrang hrang langte chu a ngaipawimawh hle a. High Court chuan Twisha-i nu leh pa leh a chhungte dangte thusawi atang khan, chhui chianna an neih tirh atang tawhin Samarth Singh leh Giribala Singh-te hian an sawisa thin ngei a ni tih a chiang a ni tiin a sawi bawk. Court chuan Giribala Singh hi judge pension, cyber crime leh forensics lama thiamna nei a nih avangin, thuhretute emaw finfiahna thilte a tihchingpen an hlauhthawn thu a tarlang bawk. Kar liam ta khan, Samarth Singh chu ni 10 chhung zet a tlan bo hnuah court-ah a lo inpe tawh bawk a ni(www.jclalnunsanga.in)

Congress Leader Alka Lamba Chu Jantar Mantar Midang Kutthlak Case-ah Delhi Court-in Thiamloh A Chantir

26/05/2026
Admin

Delhi court chuan July 2024-a Jantar Mantar-a lungawi lohna an lantirnaa police-te kut thlak thuah Congress hruaitu Alka Lamba chu thiam loh a chantir ta. Additional Chief Judicial Magistrate Ashwani Panwar chuan he thiam loh chantirna thupek hi siamin, hremna chungchanga inhnialna ngaihthlak hun atan June 5 hi a ruat nghal a ni. He lungawi lohna lantirna hi women's reservation thlawpna lantirna atana buatsaih a ni a, hemi tum hian Lamba hi thu sawi tu ber a ni nghe nghe. Police-te sawi danin, khapna thupek hman a ni chung pawhin lungawi lohna lantirtute hian Parliament hmun panin phalna neih chin piah lam pelh an tum a. Parliament session neih lai a nih avangin Sansad Marg bula vantlang kawngpuite daltu an nih bakah, daltu tura thil tlar te tichhiain, police-te an nam bawk nia hriat a ni. Rouse Avenue-a special court chuan Lamba laka thubuai siam tawhte thiahsak (cancel) chu a lo hnawl tawh a. Court chuan trial chhunzawm zelna tur khawp finfiahnna tha a awm a ti a, sawrkar hnathawk tibuai tur leh tharum hmanga nawr tur hian hliam tuar kher a ngai lo tih a sawi bawk. Lamba chuan lungawi lohna an lantirna chu a ralmuang tak a neih a nih thu leh hliam tuar report engmah a awm loh thu sawiin, tum bik nei a hek a ni tiin a sawi thung a. Mahse, court chuan police-te thusawi leh video record-a lungawi lohna lantirtuten barricade an tihchhuat lai leh tibuai lai hmuh tur awmte chu rinchhanin a thusawi hi a hnawlsak a ni(www.jclalnunsanga.in)

KK Surgical & Maternity Hospital Te’n Kala Lungte Awm An Lakchhuah Theih Loh Avanga Medical Negligence An Neih Chu Delhi Consumer Commissioner Chuan A Nemnghet

26/05/2026
Admin

Delhi State Consumer Disputes Redressal Commission chuan K.K. Surgical & Maternity Hospital leh Dr. Rajnish Sharma-te'n vawi hnih ngawt an zai that hnuah pawh damlo kala lungte awm an lak chhuahsak theih loh avangin, thiam loh an chantirna chu a pawmpui (uphold) ta a ni.He thubuai hi Mohd. Sameer-a'n a kala lungte a neih thu kum 2016-a hmuhchhuah a nih hnuah a thehlut a. Hemi hma hian Guru Teg Bahadur Hospital-ah open surgery-a inzai turin thurawn pek a lo ni tawh a, mahse K.K. Surgical Hospital-ah Rs. 32,000/- chawia inentir a thlang zawk a. Chutah chuan doctor-te hian endoscopic surgery an lo neihpui a, a kala lungte awm chu an lak chhuah sak vek dawn tih an tiam a. Nimahsela, inzai hnua incheckup tura a kal leh chuan, lung chu an rin aiin a len deuh avangin vawi khat zai leh a ngaih thu lo hrilhin, Rs. 3,500/- an lo chawi tir leh a ni.Vawi hnih ngawt an zai hnu lhnuah pawh Sameer-a chuan na a la ti zui vawng vawng reng a. A hnu a medical test an han tih leh chuan a kalah chuan lung lian tak a la awm reng tih hmuhchhuah a ni a. Guru Teg Bahadur Hospital-a mithiam rual chuan he thil hi an han chhui chiang a, hospital lamin operation records leh inzaina pindan chhunga thil chhinchhiahna te an lo tibo tih an hmuchhuak a ni. Chutah, lung lian chutiang zat chu thla thum chhung lekin a lo awm thar leh thei lo hrim hrim bawk tih an sawi a.Commission chuan heng mithiamte ngaihdan leh damdawi in lam lehkha pawimawha thil inmil lo awm te, entirnan X-ray report-a damlo hming tlem a inang lo hret te chu chhinchhiahin damdawi in lamin thubuai an appeal-na chu a hnawlsak a, District Commission-in zangnadawmna an lo siamsak tawh chu a pawmpui ta a ni(www.jclalnunsanga.in)(He thubuai hi Dr Rajnish Sharma vs Mohd Sameer a ni a, thubuai thehluttu tan hian Adv.Bineet Pandey a ding)

Thlawhna Thlawhchhuah Hun Thlak Danglam Hriattir Lawk Loh Vangin Tata Airlines Ten Zangnadawmna An Pek Tur Chu State Consumer Commission Chuan A Tih Pun Belh

26/05/2026
Admin

State Consumer Disputes Redressal Commission chuan Tata SIA Airlines Limited tena thlawhna thlawh chhuah hun hrilhlawk lova an thlak danglam avanga zangnadawmna pe tura a lo tih tawh chu a tihpun belh a. Thubuai thehluttu hian Chandigarh atanga Delhi, leh Denpasar, Bali pan turin thlawhna ticket an lo la a. Nimahsela, April 2, 2024-a Denpasar Airport an thlen chuan, an hawnna tur thlawhna chu engmah hriattirna awm hmasa loin a chhuah hun sawn hma a ni tih an hre chauh a. He thil thleng vang hian an thlawhna tur hi an nang hman lo va, airport-ah an tang a, ticket thar Rs.51,000 man zet chu an lak leh phah hial a ni. Denpasar airport-a an tan tak vang hian Delhi atanga Chandigarh panna tur an thlawh chhunzawmna tur pawh an nang hman ta lo va, hemi hnu hian an kalna hrang hrangah sum an seng teuh phah bawk a ni.A hmain District Commission chuan he airline hi Rs.58,641 leh a pung 9% bakah zangnadawmna atan Rs.7,000 pe turin a lo hriattir tawh a. Mahse, zangnadawmna pek tura an tih tlem em avang hian an lungawi lo va, thubuai thehluttute chuan State Commission an pan ta a ni. Commission chuan airlines te hian thlawhna chhuah hun tur inthlak danglamna a awm a nih chuan khualzinte hriattir turin mawhphurhna an nei a ni tih a sawi a, airline-te inthlahdahna vang hian khualzinte chuan rilru hahna, harsatna, leh sum lama channa nasa tak an tawk a ni tih a sawi a. State Commission chuan zangnadawmna atan hian Rs. 50,000-ah a tihpunsak a, court kalna leh thubuai sênso atan Rs.15,000 dang a pe tel bawk a ni(www.jclalnunsanga.in)

Air India Airlines Chu IAS Officer Leh A Chhungte Thlawhnaa An Chuang Tur Dik Lo Taka An Dan Beh Avangin Thiam Lohna An Nei Tih Consumer Commission Chuan A Sawi

26/05/2026
Admin

District Consumer Disputes Redressal Commission, Chandigarh chuan Air India Express chu IAS officer leh a chhungte thlawhnaa lut tur dik lo taka an lo dan beh avangin, service tha lo leh sumdawnna dik lo taka kalpui thubuaiah thiam loh a chantir.He officer, a nupui, leh an fapa naupang te hi June 17, 2024 khan Dubai-a chawlh an hman zawhin Amritsar-ah haw an tum a.Air India Express thlawhna ticket hi hemi thla hma hian an lo la lawk tawh a, thlawhna thlawh chhuah hma darkar hnih leh a chanve vela hmain Dubai International Airport hi an thleng a. Check-in leh bungrua te an tih fel hnuin boarding pass an pe a, chutah chuan zing dar 8:25-ah luhna kawngka (boarding gate) khar a ni dawn tih a inziak a. An chhungkua hian kawngka khar hma hian an thleng hman tih sawi mah se, airline hnathawkte chuan thlawhnaa luh chu an lo phalsak tlat lo va, thlawhna nang hman lo angin an chhinchhiah ta zawk a ni.An chhungkua hian Jaipur kaltlanga India panna tur ticket thar Rs 1.26 lakh lai sengin an lei chawp leh a. Hei hian IAS officer hi a hna thawhna kawngah pawh harsatna nasa tak a thlen tih an sawi bawk. Air India Express chuan mikhualte hi kawngkaah an thleng tlai hret tih sawi mah se, Commission chuan thlawhnaa lut lo tura an lo hnawlna chhan tur sawifiahna an pek chu tling tawkin hmu lo a ni.Commission chuan airline chu an inthlahdah vang a ni tiin an chhoh lehna senso zawng zawng pawh 9% interest telin pe let leh vek turin a hriattir a. Tin, rilru hrehawmna an tawh avangin zangnadawmna Rs.15,000 leh thubuai court-a kalna senso atan Rs.10,000 chawi turin a ti bawk a ni(www.jclalnunsanga.in)

DCDRC Adilabad Chuan Flipkart Chu Air Purifier A Chah Ni Lo An Pek Avangin Thiam Loh A Chantir

26/05/2026
Admin

District Consumer Disputes Redressal Commission, Adilabad chuan, Flipkart and Consulting Rooms Private Limited-te chu customer pakhatin air purifier a chah ni lo zawk an pek avangin, service tha tawk lo leh dik lo taka sumdawnna kalpui thubuaiah thiam loh a chantir.Thubuai thehluttu hian October 2, 2025 khan Flipkart kaltlangin Qubo Q600 Air Purifier, Rs.10,399 man chu a chah a. October 5 khan a thil chah hi an awmna hmun hnaivai bera delivery hub-ah a thleng tawh a, mahse October 16-ah chauh Flipkart ‘Open Box Delivery’ policy hmangin va pek a ni a. Bungrua an va pek lai hian, thubuai thehluttu chuan a thil chah lo thleng chu Q600 model ni loin Qubo Q500 model zawk a ni tih a hmu a. Delivery staff-te chu lak loh mai a dil a, mahse anni chuan an phalsak lova ,a dawn hmasak phawt a ngaih thu leh, chumi hnuah chauh a thlakna a dil theih thu an lo hrilh a.A tirah chuan bungraw thlak a dilna chu lo pawmsak mah se, a hnuah "out of stock" tih chhuanlamin an cancel sak leh a. Hemi hnu hian thubuai thehluttu hian Consumer Commission-ah tlu lutin a zualko ta a ni. Consumer Commission hian a khingpuitu pahnihte hi chhanna pe turin ti mah se, an pahnih hian Commission hmaah an rawn inlan duh lo va. invoice, email, leh call record-te ngun taka an enfiah hnuah, Commission chuan heng company pahnihte hi an service a that loh thu sawiin thiam loh a chantir a. District Commission chuan heng company-te hi ni 45 chhung ngeia thubuai thehluttu hi Rs.8,398 chu kum khata 12% interest a pe let tur te, zangnadawmna atan Rs.1,51,000 pe tur te, leh court kalna senso atan Rs.7,000 pe turin a hrem ta a ni(www.jclalnunsanga.in)

DISCLAIMER