Ni 5, October 2026 khan Mount Carmel Mission School (Baptist Church of Mizoram te enkawl), Roing Principal leh hostel warden ni bawk, Lalnunpuia chu Protection of Children from Sexual Offences (POCSO) Act hnuaia an school-a kum tlinglo hmeichhe naupang te chunga hursualna thleng chungchanga an puhnaah, Special Judge, POCSO, Tezu chuan a thiam lohna a awm lo tiin thuhretu ko a kal zelna chhan a hmuh loh avangin case bul tanna ah thiam chantirin a a chhuah zalen.He thubuai hi Mount Carmel Mission School, Roing-a pawikhawihna thleng atanga intan a ni a. Zanlaiah hmeichhe hostel-ah hian mipa pakhat chu lut ru in, hmeichhe naupang kum tlinglo tam tak chungah hursualna kawnga pawikhawihna a thlen a. Principal chu ni 20.07.2025 ah man niin thubuai siam sak a ni.Hmeichhe hostel-a thil thleng:July ni 9 zan leh 10 zing inkar dar 3 AM bawr vel khan Mount Carmel School, Roing-ah mipa pakhat chu zanlaiah hmeichhe hostel-ah hian a lut ru a, hmeichhe naupang kum tlinglo tam tak a khawih chhia nia puh a ni a.A tuartu zinga hmeichhe naupang pakhat chuan hmeichhe zirtirtu, hmeichhe dormitory-a awm Ms. Anne hnenah mipa pakhat an hostel-a lo lut ru leh an chunga thil thleng chu a hrilh a. Tichuan, Ms. Anne chuan Principal leh hostel warden ni bawk Lalnunpuia chu thil tleng chu zing dar 6 AM velah a hrilh a, ani hian zing dar 8:00 velah School Chairman a hrilh ve leh a. Chu mi hnuah dar 10:00 velah school management chuan meeting an nei a. Zirtirtute chuan naupangte chu endikin, naupang thenkhat chuan pem leh hliam an neih a hmuh chhuah a ni a. School hotute chuan naupangte nu leh pate chu ko khawmin buaina a chhuak ta a ni.Intihbuaina A Thleng:Hmeichhe naupang engemaw zat hur sualna avanga khawih chhiat a ni tih an hriatin an thinrimna avangin boruak a so sang chho a. School bul hnaia inhlawha hna thawk thenkhat chu manin, a tuartu te hmaah an hruai a, an sawisa ta hial a. Boruak a chhiat em avangin school building leh hmun hma pawh tihchhiat a ni nual bawk. A hmun a police te an thlen phei hnuah boruak chu an thunun thei ta a ni.Tichuan, school hotute chuan Roing Police Station-ah FIR an thehlut zui a. July 10, 2025 zan dar 11:30 velah school Executive Secretary James Litin chuan ziaka FIR a thehlut. Investigating Officer chuan July 10 leh 11 zinga zan laiah preliminary investigation chu a ṭan zui nghal a. July 11 zingah, he pawikhawihnaa rinhlelh ber pakhat school bula insatu mistiri Riza Ul Karim chu mipuite'n an man a, mipui te’n kut an thlak zui a. Police in Police station a an hruai hnuah a hliamte endik tura an hruaina damdawiinah mipui thinrimin luh chilh leh in, damdawiinah hian sawisak hlum a ni. Hnam dang dawrte suasam niin Roing khawpumah Curfew puan chhunzawm a ni.Prosecution-in Section 21 hnuai a thubuai siam turin an ngen:Kum khat dawn investigation tih a nih hnu July thla ah a case zial fel in Chargesheet court ah thehluh chauh a ni a. Sawrkar ukil Special Public Prosecutor chuan school hotute chu Mt Carmel chu naupangte venhimna ngaihthah avangte, school Principal chu hostel-a lut ru leh naupang khawih chhiat an nih thu hrilh a nih tawh hnu a, an nu leh pa te hrilh vat lo a, Police-te hnena rang taka a report loh avangin leh an sawisak hlum tak te nena inthurualna an neih avangin POCSO Act hmanga Police te chhuina anga thuhretute ko a, hremna pe turin a ngen a.Lalnunpuia tana ding ukil chuan hmeichhe naupang khawih chhiatnaah inhnamhnawihna Lalnunpuia an a neih loh thu leh darkar 24 chhungin FIR thehluh a nih thu sawiin case tih tawp a dil a. Naupang ten ni 10 July zing dar 3 ah mi tuemaw ni hostel-ah a lo tih an Warden Ms. Anne an Dar 6 am velah an hrilh a, khawihchhiat an nih thu an sawi lo tih court a sawi. An principal/warden Lalnunpuia hnenah Ms Anne hrilhin Lalnunpuia hian a hriat velah Chairman a hrih a. Zing dar 8:00 velah School Chairman a chuan Executive Secretary, hrilhin dar 10:00 velah school hotute meeting neih nghal a ni. Zana misual man dan tur leh duty dan turte an rel.Hemi hnu 3:30- 4 PM hian school hotu hmeichhia te chuan a tuartu naupang te chu endikin, hur sualna an tuar ngei a rinna an nei a, an nu leh pate an be pawp a. Mipui chem leh hriam hrei nen School compound chhungah lo lutin boruak muanawm lo tak a awm avangin hlau leh thla bara an awm avangin rang takin FIR an theh lut thei lo a ti. An FIR chu zan dar 11:30 ah chiah register chuah a ni tih thu court a hrilh.Court-in POCSO case report loh/tlai a nih leh nih loh a ngaihtuah:Court chuan dan hian institution enkawltu berte pawh naupang an enkawl lai chunga thil thleng report lo chu hrem theih a nih thu a sawi a. Page 475 a chhah charge-sheet leh thil hrang hrangte, Magistrate leh Investigating Officer hmaa victims-te thu sawi zawng zawngte chu Court chuan uluk takin a endik a. July 10, 2025 zing dar 6:00 velah school hotuten he thil chungchang hi an hria tih Court chuan a pawm a. Chu mi ni vek zan dar 11:30 velah FIR thehluh a ni bawk a. School thuneitu-te'n thil thlen dan an hriat aṭanga dar 24 chhung ngeiin FIR hi thehluh a ni tih Court chuan a sawi. Mipuite thinrim avanga school huang chhung boruak buai leh rapthlak tak thleng pawh Court chuan ngaihtuah telin, investigation record-ah Lalnunpuia thiam lohna emaw a ngaihthahna hmuh tur a awm lo tih a sawi.Principal thubuai atanga chhuah zalen (Discharge) a ni ta:Lalnunpuia chu a ukil kaltlanga POCSO Act Section 21 hnuaia thubuai siamsaka, thuhretu te koh a rorelna hmachhawn theihna tur thu tling leh finfiahna a awm lo tih a sawi chu Court chuan a pawm a. Court chuan Lalnunpuia chu thubuai zawng zawngah thiam lohna a nei lo tiin thuhretu koh buaia a case kal zel ngaihna chhan awm lo tiin thiam a chan tir ta a ni.Lalnunpuia, (Warden/Principal Mt Carmel Mission School) hi case pahnih siam sak a ni a. A hmasa zawk FIR No.40/2025 chu school a naupang khawih chinpenna-a avanga case a ni a. Hetah hian school hi naupan venhimna pek that loh avang leh naupangin hetiang lam thleng thin warden te hrilh pawha sawi chhuak lo tura an tih avang case a ni a. A pahnihna bik FIR No.43/2025 chu school lamin heng thil thleng ngawihbo pui an tum avanga puhna case a ni. Case pahnihna hi tun hnaiah investigation kum khat dawn kalpui a nih hnuah charge-sheet court-ah theh luh leh a ni.(www.jclalnunsanga.in)(He case ah hian JC Lalnunsanga chu Mt Carmel Mission School Principal tan hian a ding a, sawrkar lam tan Special PP POCSO P Padung a ding) Dan lam kaihhnawih thutharte hi Whatsapp Group siamin update kan post thin a. Hemi Groupa i awm ve duh a nih chuan hemi link-ah hian lo join ve turin kan sawm a che. https://chat.whatsapp.com/BEZzj5EzMLCBEQjtWYRFug?mode=gi_c https://chat.whatsapp.com/DMaRfCsAQimCo6fLFyYNuS?mode=gi_c
