Ni 1, October 2026 khan Mizoram Lokayukta chuan Finance Department-in ni 22.10.2025-a hna 41, cheng vaibelchhe 328 vel man hu leh hna 76, cheng vaibelchhe 6.29 chuang ni 17.04.2025-a "Restricted Tender" hmanga a pawm chungchanga thubuai chu ching felin, a khar ta a. Lokayukta chuan eirukna emaw, diklo taka contractor duhsakna emaw, thil sual dang awmin a hmu lo. Nimahsela, tender chhan dan tur kawng a dan zawm tur chu zawm a ni lo tih sawiin, a hnu zela chutiang thil a thlen tawh loh nan Department chu fimkhur turin zilhna a pe bawk.

He thubuai hi Pu Vanlalruata Sailo thehluh a ni a. Finance Department-in October 22, 2025-a hna 41 te chu dan pangngai ni lo (blanket approval)-a a  pawm sak chu diklo a ti a. Open Tender hman aiin Restricted Tender hman a nih avangin contractor thenkhat duhsakna atan hman theih a ni tih a sawi a ni. Tin, he thil hi CPWD Manual leh Rules and Regulations-in a tarlang anga kalpui a nih loh thu a thlen a ni.

Lokayukta chuan he thubuai chungchangah hian chhui fiahna (preliminary inquiry) nei hmasa phawt turin thupek a chhuah a. Chhui fiahtu officer chuan July 30, 2026 khan report a thehlut a. Report chuan Restricted Tender hman chhan ber chu pawisa hman theih hunchhung hun bi tuk a awm avanga hna rang taka zawh fel a ngaih vang a ni tih a tarlang a. Finance Department pawhin Lokayukta hnenah hian Open Tender chuan ni 21 a duh laiin, Restricted Tender erawh ni sarih (7) chhungin a zawh fel theih tih an hrilhfiah a. Sorkar chuan hna zo fel tur a Union Ministry of Finance hun bituk chhung ngeia hna zawh a ngaih vang a ni tih an sawi bawk.

 Lehkha pawimawhte enfiah a nih hnuin, Lokayukta chuan contractor thenkhat duhsakna tura he tender hi kalpui niin a hmu lo a.  Chutiang bawkin diklo taka thil tih emaw, mimal hlawkna umna chungchangah finfiahna an hmu lo bawk a ni. Nimahsela, Lokayukta chuan hna thenkhat chu danin a phut ang ni lova bidder tlem zawk hnenah pek an ni tih a hmu chhuak a. Registered firm pawimawh zawng zawng hnenah pawh hriattirna thawn vek an ni lo bawk.

Lokayukta chuan tun hnuah erawh Restricted Tender an hman dawnin a chhan bulpui chu chiang taka ziak lang tawh thin turin Finance Department chu a ti a. Hun tiam chhung a awm avanga hmanhmawhthlak thil a nih loh chuan, Open Tender hmang thin turin a rawn a. Hetiang hi a nih avangin he thubuai hi chinfelin a awm ta a ni(www.jclalnunsanga.in)