Delhi Rouse Avenue Court chuan September ni 18, 2026 khan Mizoram kaltlanga Myamnar-a lut a, dan kalh a Myanmar-a ethnic armed group te training petu, US khua leh tui, Matthew Aaron VanDyke chu default bail a pe. National Investigation Agency(NIA) Special Judge, Prashant Sharma chuan  VanDyke-a hi personal bond Rs 1 lakh leh surety neiin a chhuahtir a. Court chuan Delhi-a awm reng tur leh thubuai chhui chiannaa thawhpui tha turin a hriattir a ni. Court chuan Ukraine khua leh tui mi paruk an man telte pawh bail dilna an thehlut thei ang tih a sawi bawk.

March 2026 khan NIA te VanDyke leh Ukraine khua leh tui mi paruk Petro Hurba, Taras Slyviak, Ivan Sukmanovskyi, Marian Stefankiv, Maksim Honcharuk and Viktor Kaminskyi te chu India ram an chhuahsan hma lawk in , airport hrang hrangah an man a. Hêng mite hian passport leh visa dik tak nena dan ang taka India-a an rawn luh hnuin, Guwahati leh Mizoram kaltlangin Myanmar ramri an kan niin agency chuan an sawi a. Chhui chianna in a tarlan dan chuan, Protected Area Permit (PAP) leh Restricted Area Permit (RAP) la lovin Myanmar-ah an lut a. Myanmar-a ethnic armed group training-na hmunpui, Victoria Camp an thleng chho niin NIA chuan a sawi.

Hetah hian Ethnic armed group te chu training hrang hrang te an pe niin an sawi a. NIA chuan he training program hi ruahman lawkna hnuaia an buatsaih niin an puh a. He training-ah hian drone warfare, drone operations, drone assembly, leh jamming technology te a tel niin an sawi. Chhui chiangtute chuan Europe atanga drone leh drone bungrua rawn lakluh hrang hrangte chu training neih hmaa Mizoram-a mite leh pawl hrang hrang hnenah sem an ni bawk tih an sawi lang.

He chhui chianna hi tualchhung dan leh immigration kaihhnawih thubuai bakah Unlawful Activities (Prevention) Act (UAPA) hnuaiah ziah luh hmasak a ni a. NIA chuan India leh Myanmar-a armed group dang te puihna thubuai lian zawk a awm em tih an chhui mek thu court hnenah an hrilh a ni. Special Court phalna la in, NIA te chu Unlawful Activities (Prevention) Act (UAPA) thubuai chhuichian nan hian ni 180 hun pek an ni a.

Nimahsela, September ni 8, 2026 khan NIA chuan dan phal loh a luh, visa dan bawhchhia leh Immigration and Foreigners Act, 2025 Section 21 leh 23 hnuaiah chargesheet an thehlut a. Agency chuan anti-terror dan hnuaia thubuai siamna tur finfiahna a la awm rih lo niin a sawi a, nimahsela he thubuai chhui chianna chu a la kal zel dawn tih an sawi. Anti-terror dan hnuaia thubuai siam belh theih a nih chuan supplementary chargesheet  thehluh a la ni ang tiin court hnenah an hrilh. VanDyke aiawh hian Advocate Rohit Dandriyal leh Advocate Rohit Gour te an ding(www.jclalnunsanga.in)