District Court

Air India Airlines Chu IAS Officer Leh A Chhungte Thlawhnaa An Chuang Tur Dik Lo Taka An Dan Beh Avangin Thiam Lohna An Nei Tih Consumer Commission Chuan A Sawi

26/05/2026
Admin

District Consumer Disputes Redressal Commission, Chandigarh chuan Air India Express chu IAS officer leh a chhungte thlawhnaa lut tur dik lo taka an lo dan beh avangin, service tha lo leh sumdawnna dik lo taka kalpui thubuaiah thiam loh a chantir.He officer, a nupui, leh an fapa naupang te hi June 17, 2024 khan Dubai-a chawlh an hman zawhin Amritsar-ah haw an tum a.Air India Express thlawhna ticket hi hemi thla hma hian an lo la lawk tawh a, thlawhna thlawh chhuah hma darkar hnih leh a chanve vela hmain Dubai International Airport hi an thleng a. Check-in leh bungrua te an tih fel hnuin boarding pass an pe a, chutah chuan zing dar 8:25-ah luhna kawngka (boarding gate) khar a ni dawn tih a inziak a. An chhungkua hian kawngka khar hma hian an thleng hman tih sawi mah se, airline hnathawkte chuan thlawhnaa luh chu an lo phalsak tlat lo va, thlawhna nang hman lo angin an chhinchhiah ta zawk a ni.An chhungkua hian Jaipur kaltlanga India panna tur ticket thar Rs 1.26 lakh lai sengin an lei chawp leh a. Hei hian IAS officer hi a hna thawhna kawngah pawh harsatna nasa tak a thlen tih an sawi bawk. Air India Express chuan mikhualte hi kawngkaah an thleng tlai hret tih sawi mah se, Commission chuan thlawhnaa lut lo tura an lo hnawlna chhan tur sawifiahna an pek chu tling tawkin hmu lo a ni.Commission chuan airline chu an inthlahdah vang a ni tiin an chhoh lehna senso zawng zawng pawh 9% interest telin pe let leh vek turin a hriattir a. Tin, rilru hrehawmna an tawh avangin zangnadawmna Rs.15,000 leh thubuai court-a kalna senso atan Rs.10,000 chawi turin a ti bawk a ni(www.jclalnunsanga.in)

DCDRC Adilabad Chuan Flipkart Chu Air Purifier A Chah Ni Lo An Pek Avangin Thiam Loh A Chantir

26/05/2026
Admin

District Consumer Disputes Redressal Commission, Adilabad chuan, Flipkart and Consulting Rooms Private Limited-te chu customer pakhatin air purifier a chah ni lo zawk an pek avangin, service tha tawk lo leh dik lo taka sumdawnna kalpui thubuaiah thiam loh a chantir.Thubuai thehluttu hian October 2, 2025 khan Flipkart kaltlangin Qubo Q600 Air Purifier, Rs.10,399 man chu a chah a. October 5 khan a thil chah hi an awmna hmun hnaivai bera delivery hub-ah a thleng tawh a, mahse October 16-ah chauh Flipkart ‘Open Box Delivery’ policy hmangin va pek a ni a. Bungrua an va pek lai hian, thubuai thehluttu chuan a thil chah lo thleng chu Q600 model ni loin Qubo Q500 model zawk a ni tih a hmu a. Delivery staff-te chu lak loh mai a dil a, mahse anni chuan an phalsak lova ,a dawn hmasak phawt a ngaih thu leh, chumi hnuah chauh a thlakna a dil theih thu an lo hrilh a.A tirah chuan bungraw thlak a dilna chu lo pawmsak mah se, a hnuah "out of stock" tih chhuanlamin an cancel sak leh a. Hemi hnu hian thubuai thehluttu hian Consumer Commission-ah tlu lutin a zualko ta a ni. Consumer Commission hian a khingpuitu pahnihte hi chhanna pe turin ti mah se, an pahnih hian Commission hmaah an rawn inlan duh lo va. invoice, email, leh call record-te ngun taka an enfiah hnuah, Commission chuan heng company pahnihte hi an service a that loh thu sawiin thiam loh a chantir a. District Commission chuan heng company-te hi ni 45 chhung ngeia thubuai thehluttu hi Rs.8,398 chu kum khata 12% interest a pe let tur te, zangnadawmna atan Rs.1,51,000 pe tur te, leh court kalna senso atan Rs.7,000 pe turin a hrem ta a ni(www.jclalnunsanga.in)

District Consumer Commission Chuan Adarsha Automotives Pvt. Ltd. Chu Motor Parts Thlak Dik Tawk Loh Avangin Thiam Loh A Chan Tir

26/05/2026
Admin

District Consumer Disputes Redressal Commission, Kurnool chuan Adarsha Automotives Pvt. Ltd. chu Maruti Brezza lirthei an siamnaa coolant thlak ngai tawh an thlak loh vangin thiam loh a chantir a, coolant thlak loh vang hian engine chu a sat phah hle a, motor khawl a tihchhiat phah ta a ni. Thubuai thehluttu P. Masumbi, Kurnool chuan he service centre-ah hian a lirthei hi a dah thin a. August 26, 2025 khan, a pasal dialysis ti tura an tlan laiin, lirthei engine chu a sat lutuk avangin a thi a. Hmun danga a enfiah tir chuan coolant chuan hna a thawk tha lo hle tih an lo hmu ta a ni. Thubuai thehluttu hian commission hnenah hian service centre hian an hnenah a motor endik tura a kal reng thin thu leh engmah an thlak sak loh thu a sawi a, an hna an thawh that loh thu a thlen a ni.Service centre chuan thiam lohna an neih loh thu sawiin, coolant thlak hun kha a la thleng lo hrim hrim tih an sawi a. Lirthei khawl a sat lutuk dawn hian hriattirna (warning) a awm thin a, mahse warning a awm chung pawhin thubuai thehluttu hian a la tlanpui luih zel avangin engine chhia a nih thu an sawi a. Maruti Suzuki pawhin lirthei warranty a tawp tawh thu leh an dealer-te thiltihah mawh an lak theih loh thu an sawi a. Nimahsela, Commission chuan service record te, invoice te, WhatsApp inbiakna leh internal email-te a enfiah hnuah, service centre thil sawi inkalh chu a hmu chhuak a. Coolant chu thlak ngai tawh chungin thlak a ni lova. Commission chuan an service an tih that loh avang hian engine chhiatna hi a thleng ngei tih thutlukna a siam a, a thlawna siamsak an tiam tawh hnua an sut leh pawh chu dik lo (unfair trade practice) tiin a sawi. Commission chuan service centre hi engine chu a thlawna siamsak tur emaw, Rs.1,79,623 pe tur emaw hian a hriattir a, hei bakah hian zangnadawmna Rs.1 lakh leh court luhna senso (litigation costs) Rs.5,000 pe turin a hrem bawk a ni(www.jclalnunsanga.in)( He thubuai hi Mrs.P.Masumbi v. M/s adarsha Automotives Pvt. Ltd & Maruti Suzuki India Ltd. CC/160/2025 niin, thubuai thehluttu tan hian Adv. Sri P Ramanjaneyulu a ding a; a ; a leh lam tan Adv. Naveen Kumar a ding)

Gauhati High Court, Aizawl Bench Lehkha Lem Hmangin Mi 15 Tang in Atanga Chhuah An Ni

08/05/2026
Admin

April ni 30,2026 khan Gauhati High Court, Aizawl Bench lehkha lem hmanga lung in atanga mi 15 chhuah thubuaia a mawuhphurhtu bera puh Jeremy Lalthangtura chu Police-ten amah zawhfiahna (interrogation) nei turin phalna an dil a, Lunglei Chief Judicial Magistrate chuan May ni 1,2025 hian zawhfiah hun phalna a pe a ni.Kumin atang khan High Court lehkha lem hmang hian mi 15 zet Lunglei tang in atang hian chhuah an lo ni tawh a. Police-te chuan Jeremy Lalthangtura, ukil anga insawi thin jail-a lo tang mek chu he thubuai lian tham tak phena a bulpui ber a nih thu an sawi a. He chungchangah hian thubuai an thehlut tawh thu sawiin, amah zawhfiah phalna pawh an hmu tawh bawk.Jeremy hian ukil anga insawiin lung in tangte chu High Court-ah thubuai (appeal) a sawipui sak thei tih a lo hrilh thin a. Pawisa hi mi pakhat lakah cheng 60,000 thleng te la tawhin, a tlangpuiin cheng 20,000 atanga cheng 40,000 inkar a dil thin a ni.Lunglei Police-te chuan Jeremy-a'n dawt hmanga a lo chhuah takte chu an man khawm leh vek tawh tiin, pakhat chu a thih tawh avang leh pahnih dang chu state pawn mi an nih avangin an man thei rih lo a .Thil thlen dan an chhuinaah, Jeremy hian High Court Aizawl Bench leh Lunglei District Court-a ukil a hriat thu leh, chung mite nen chuan High Court-a thubuaite an bawhzui thin thu a sawi a. Mahse, police-ten chung ukil an zawhfiah chuan dawt a nih hmel hle a, chhui chianna (proper investigation) neih a nih hunah thil awmzia tak a hriat chauh ang an ti a ni. He thubuaiah hian District Jail-a thawk pakhat hming pawh tarlan a ni bawk. Police-te chuan zawhfiahna felfai tak an neih hnuah chanchin chiang zawk a hriat theih chauh dawn a, an thu sawite pawh finfiah hmasak phawt a ngai a ni tih an tarlang a ni (www.jclalnunsanga.in)

Pu Vanlalenmawia, MJS Grade-1 Pension Tur Thlahna Hun MBA-in Hmang

01/04/2026
Admin

Ni 30, March 2026 (Thawhtanni) khan District & Sessions Judge, Pu Vanlalenmawia, Mizoram Judicial Service(MJS) Grade-1 pension tur thlahna chu Mizoram Bar Association(MBA) chuan Bar Room-ah an hmang a. He hun hi MBA President, Pu R Lalremruata’n a kaihruai a, thlahna thilpek hi Treasurer Pu Saihmingliana Sailo leh Finance Secretary Pi K Lalremruati te’n MBA aiawhin an hlan a. Tin, thlahna thusawina hun hi a duh apiang tan hawn a ni bawk. MBA hian MJS pension tur te thlahna hun hi hetiang hian an la hmang ngai lova, he hun hi an vawikhat hmanna a ni nghe nghe.A chanchin tawi:Pu Vanlalenmawia pa hi Pachhinga niin, a nu hi Vanrami a ni a, a nupui hi Lalrohlui Sailo a ni. Guwahati, Assam-ah piangin, ni 29 December, 2011 khan Mizoram Judicial Service hi a zawm a ni. Thiamna lamah hian BA LLB niin, MJS-a a luh hma hian hna hrang hrang a lo thawk tawh bawk. Kum 1987-88 inkar khan ME School, Saitsama, Jaintia Hills District, Meghalaya-ah Headmaster hna a thawk a. Kum 1988-90 inkar khan Bungkawn High School, Aizawl-ah zirtirtu hna a thawk leh a. Kum 1990-97 inkar khan Taxation Dept. Mizoram-ah Inspector of Taxes dinhmun chelhin a thawk leh ta a ni.Dan hriatna lama a zinkawng:Kum 1997-98 inkar khan ukil hna hi zawmin, APP & AGA niin, District Court Aizawl-ah kum 1998-2000 inkar khan sorkar ukil hna hi a thawk leh a. Kum 1999-2011 khan District Court leh Gauhati High Court, Aizawl Bench-ah ukil angin a practice leh a. Case har tak tak la chho in judgment tangkai tak takte a nei chho a, Mizo te zinga ukil tha ber a nih chhoh lai takin MJS lamah in ziak tlingin Kum 2012-2015 khan Addl. District & Sessions Judge, Lunglei niin, ni 23.01.2015 – 05.12.2017 chhung hian Addl. District & Sessions Judge, Aizawl a ni leh ta a ni. Ni 05.12.2017 – 17.06.2020 chhung hian Member Secretary, Mizoram State Legal Services Authority niin, ni 17.06.2020 – 31.10.2022 chhung hian Special Judge, PC Act, Mizoram a ni leh a, ni 01.11.2022 – 23.09.2023 chhung hian District & Sessions Judge, Aizawl niin, ni 23 September, 2023 atangin District & Sessions Judge, Lunglei Judicial District, Lunglei-ah hian a awm leh a. Kumin kum tir khan Presiding Judge, MACT niin a pension thlengin he hna hi a chelh.MBA tana mi hlu:Mizoram Bar Association room-a chair thutna tur mumal a awm loh laiin, Pu Vanlalenmawia chuan an mamawhna te leh a tulna hriain, phal takin Bar room-a chair leina tur nuai li lai mai chu a lo sanction tawh a. Bar room-a thutna tur chair tha tak mai chu 200 lai an lei theih phah a. MBA tana a inpekna leh inphalna te hi a hlu hle a ni.Pu Vanlalenmawia hian MJS a pension hnu hian ukil hna zawm leh law practice leh a tum thu a sawi a. State danga a kal changin ukil leh court tha tak tak te a hmuhin Mizoram-a kan neih ve atan a awt ve em em thin a. Lunglei-a a awm lai pawh hian ukil-te chu nasa takin a fuih mawlh mawlh thin a, High Court-a practice thei tur a tan la turin leh, amah pawhin zir tir a huam thu a sawi thin a ni. Pu Vanlalenmawia hian ukil hna hi a practice lai khan nuam a tiin a tui thin em em a, amah hi mi inzir mi leh pa taima tak a ni a, hmasawn reng duh mi a ni.Pu Saingura (Late) hnuaiah law a practice tirh hian a kal thin a, Pu Saingura kaihhruaina hnuaiah law hi a practice chho a, rei lo te chhungin a hna chu a thiam chak em em, case pawh a nei chak hle niin an sawi. Kan thiamna leh thil hriat te midangte tan ui lo turin leh midangte hrilh hre ve zel turin a ti a.(www.jclalnunsanga.in)

Delhi Court-in Akasa Air Chu Seat 640 Group Booking Tih Tawh An Cancel Avangin Rs. 1.08 Crore Chawi Turin A Hriattir

02/03/2026
Admin

Ni 24, February 2026 khan Delhi District Commercial Court, Saket chuan Akasa Air chu ABS Tours & Travels te hnenah Rs. 1.08 crore pe turin a ti a. He hremna hi hunpui lai, December-January inkara ABS te’n a seat 640 an lak sa, airline-in a cancel sak avanga, an hlawkna tur an hloh tak zangnadawmna atan a ni. District Judge, Lalit Kumar chuan airline hian seat man pumpui atanga 25% advance-a an lak tawh hnuah, group booking confirm tawh pariat lai an cancel hi contract bawhchhiatna a ni tih a sawi a. Court chuan hun pui laia group booking-te hi hunbi bik nei a nih thu leh, hemi cancel hian sumdawnna kawng inhawng a tih chhiat thu a sawi bawk a ni.Akasa Air chuan seat 70 aia tam group booking siam tur chuan 50% advance pek a ngai thu leh, chu thil chu travel agent hian a tihlawhtling lo tih a sawi a. Mahse, Court chuan hemi chungchang hi booking siam laiin ABS hnenah an hriattir a ni tih airline-in an finfiah zawh loh thu a tarlang a. Court chuan pawisa engemaw zat an lak tawh a, PNR pawh a chhuah tawh hnuah chuan Indian Contract Act, 1872 hnuaiah thuthlung nghet (binding contract) a awm tawh a, airline-in an duh thu chauhva an cancel lehna chu contract bawhchhiatna a ni tih a sawi(www.jclalnunsanga.in)(He thubuai ABS Tours & Travels vs. SNV Aviation P. Ltd ah hian thubuai theluttu tan Adv, Abhinay Sharma, Adv. Atul Sharma leh ukil dangte an ding a, Akasa Air tan Adv. Gaurav Gupta, Adv. Shouryendu Ray leh ukil dangte an ding)

DISCLAIMER