Sainik School, East Siang district, Arunachal Pradesh-a Class-7 zirlai naupang kum 12 mi, Tadu Haro thihna chungchanga zirlai naupang an mante chuan Bail Hearing an nei a. Bail Hearing hi Principal Magistrate, Juvenile Justice Board(JJB) hmaah neih a ni.

Juvenile Justice Board(JJB) chuan zirlai pariat an man takte chungchangah thutlukna a siam a. Zirlai rinhlelh an mante chu Juvenile Home-a khung lovin, Vice Principal khuahkhirhna hnuai (custody) a awm tur leh, sikul chhungah an zirlaipuite nena awm ho lo va, a hranga awm turin a ti bawk. Bail Hearing hi ni 15, November 2025-a neih leh tura ruat a ni.

Ni 31, October 2025 Zana Thil Thleng:
CCTV footage aṭanga a lan danin, Class-8 zirlai naupangte chuan a tuartu naupang chu darkar chanve chhung hremna an pe a; chutah chuan a kete chu a khur nasa hle a. Hemi hnu hian Class-10 zirlaite chuan a huhovin Class-7 zirlai naupangte chu hremna an pe leh a. Chutah pawh chuan Haro chu tel lehin, a hnuah Haro chu amah chauhin hremna an pe nawn leh a ni. Hemi zana Tadu Haro chunga thihna a thlen hma hian, darkar thum chuang a taksa leh rilruah tihduhdahna leh hreawmna nasa tak a tuar a ni.

Ni 1, November 2025 zingah chuan Tadu Haro taksa chu an school building aṭanga meter 100-200 vela hlaa awm tanky bulah hmuh a ni a. A tirah chuan mahni intihlum anga ngaih a ni a; nimahsela, sikul naupang dangte thusawi aṭangin Tadu chhungte hian mahni intihlumah an ngai thei ta lo a ni. Tadu Haro unaunu, Miss Arunachal 2024, Tadu Lunia-in a Instagram-a a nau thihna chungchang a rawn sawi aṭangin mi tam takin he chanchin lungchhiatthlak tak hi kan lo hre ta a ni.

Haro Thihna Chungchanga An Mante:
Ni 1, November 2025-a Tadu Haro thihna chungchangah hian ni 8, November 2025 (Inrinni) khan school staff-te zinga mi pathum - Devendra Singh, Subansiri House (Junior Cadet Wing) House Master te; Kangge Darin, Subansiri House (Senior Cadet Wing) House Master te leh Amar Singh Thakur, Hostel Superintendent te man an ni. Tin, school staff-te mai bakah hian, Sainik School-a kum tling lo zirlai rinhlelh mi pariat an man bawk. 

School Staff pathumte man an nih dan hi East Siang Superintendent, Police Pankaj Lamba sawi danin, Ruksin Police Station-a ziah luh, Case No. 20/2025, Bharatiya Nyaya Sanhita(BNS) Section108(1) (abetment to suicide), Section 106(1) (causing death by negligence), leh Section 3(5) (common intention) te hmanga man an ni, a ti. East Siang Police-te sawi danin school staff an man takte chuan enkawltu an nihna angin engmah an ti lo va, a bik takin, ni 31, October 2025 zana zirlai naupang upa zawkte’n naupang zawkte an rikrapna leh nasa taka an tihduhdahna chungchangah khan endikna engmah an nei lo a ni, a ti . School Staff pathumte hi Magistrate hmaah inlan tawhin, zawhna dangte zawh chhunzawm turin tan ina dah hrih (remand) an ni a, Bail Hearing hmachhawn leh tur an ni bawk.(www.jclalnunsanga.in)