High Court

Rajasthan High Court: University Chuan Fee Pe Tura Nawrna Atan Zirlaite Original Documents A hrensak Thei Lo

05/12/2025
JC

December ni 3, 2025 (Nilaini) khan Rajasthan High Court chuan, MBBS zirlai pakhat, a university hluiin a original documents, college thar luhna atana a mamawh chu an pek duh lohna thubuai a ngaihtuah a. Justice Anuroop Singhi chuan university-te chuan zirlaite chu an original documents hrensakin, course fee chuang bang chu a pek luihtir thei lo, a ti.An Buaina Bul:Thubuai theh luttu hian kum 2022 khan MBBS course a zawm a. Course chu kum hnih chhung kalin, a kum thumna fees pawh a pe nghal a. Nimahsela, a hriselnain a tlin loh avangin university dangah, stream dang zirin a course chu a chhuahsan a.University thar chuan exam-a tel leh ṭhu tur chuan original documents theh luh a ngaih thu an lo hrilh a. Thubuai theh luttu chuan university hlui chu a dil nawn fo pawhin a document-te chu an pe let duh lo va. Hei vang hian High Court hmaah hian a zualko ta a ni.Court-a An Inhnialna-te:University chuan course kalpui laklawh laia zirlai pakhat document a pek let chuan, anmahni tan sum leh pai lama harsatna a thlen dawn niin a sawi a. Zirlai pakhat ringawt pawh a chhuah hma chuan seat a awl phah a, University chuan pawisa tam tak an hloh ṭhin a ti a ni.Thubuai theh luttu erawh chuan a hriselnaah harsatna a tawh avangin course chu a chhunzawm theih loh thu a sawi a. Document an hrensak tlatna chuan a hma lam hun leh a zir chhunzawmna tur a tibuai a ti a ni.High Court Ngaihdan:Rajasthan High Court chuan university hnialna chu hnawlin, original documents chu zirlai pakhatin admission-a a tlin leh tlin loh finfiah nan chauh lak a nih thu sawiin, fee pek tura nawrna atan hman tur a ni lo a ti a. Justice Singhi chuan hetiang hian a sawi a:Zirlaite fee pe tura nawrna atan original certificate hrensak chu dan kalh a ni. Counselling Board Admission Rules hian University-te chu an zirlaite an chhuah hnuah an documents kawlsak a phal lo.Admission-a affidavit sign-ah pawh university-te chu zirlai hmasawnna tichhe thei khawpa document khuahkhirh theihna thuneihna a pe lo.High Court Thuchhuah:Court chuan University-in zirlai document a khuahkhirh theihna tur chhan a hmu lo a. Thubuai theh luttu document theh luhte, i.e Class 12 Transfer Certificate leh Migration Certificate chu a tukah pe let nghal turin a ti a. He thubuai hi January ni 22, 2026-a ngaihtuah leh turin a ruat a ni. (www.jclalnunsanga.in).(He thubuai hi SB Civil Writ Petition No. 7084 of 2024; Eshita Gupta Vs Jaipur National University & Anr a ni a. Thubuai theh luttu tan hian Punit Singh a ding a. University tan hian Kamalakar Sharma, Senior Advocate leh Yogesh Kalla an ding a ni).

Rajasthan High Court: Police-te Hian Ukil-te Chu Thubuai Awrhtu Angin An En Thei Lo; HC Chuan Police-te Training Nei Turin a Ti

04/12/2025
JC

December ni 2,2025 khan Rajasthan High Court chuan Station House Officer-in (SHO) ukil pakhat a khawihna video chu suo moto lain thubuai a siamsak. Acting Chief Justice Sanjeev Prakash Sharma leh Justice Baljinder Singh Sandhu te thutna bench chuan he thubuai hi ngaihtuahin police leh ukil-te chu rorelna kalphunga taksa peng pahnih an nih thu leh inzah tawnna leh thawhhona tha tak nena thawh an ngaih thu a sawi .An Buaina Bul:He thubuai hi Bar Council of Rajasthan-a elected member, Senior Advocate Dr. Sachin Acharya chuan Dainik Bhaskar chanchinbua chhuah, Jodhpur Kudi Police Station-a ukil khawih rawnna article pakhat chu a sawi chhuak a. High Court ukil pakhat Bharat Singh Rathore leh a nupui(ukil tho) chuan police station-ah pawngsual victim (prosecutrix) chu an hruai a. Singh-a chuan dan kalhin uniform ha lo mi pakhat chuan victim statement a lo laksak thu a sawi a.Singh-a chuan SHO Hamir Singh hnenah a sawisel a. An sawi danin Officer hian Singh-a chu khawihin room-ah a nek lut a. Singh-a chuan victim chu police station-a ko nawn reng lo tura a hrilh chuan boruak a sang zual a. A coat te chu pawt thler sakin Bar atanga hnawh chhuah leh Section 151 hnuaia manah an vau a A nupui pawh hmeichhe constable hmangin station atanga chhuah tir an tum a. Ukil chuan heng thil thleng hi video a lain High Court hmaah a thehlut a ni.Court Ngaihdan leh Thuchhuah:Bench chuan Om Prakash, Jodhpur Commissioner of Police, Vinit Bansal, Deputy Commissioner of Police (West) leh Roshan Meena, Additional Deputy Commissioner of Police-te chu court-ah inlan turin a ti a. Video hi court-ah tarlan niin, Commissioner pawn he video hi a pawm thlap a .High Court chuan he thubuaia video viral an enfiah hnuah Commissioner of Police chu sawiselin ,dan kenkawhtute police chuan an thu sawite, an awm dante leh mipui enkawl dante an hriat a ngai a ti a. Bench chuan hetiang thil thleng hi eng dinhmunah mah ngaihdam theih a ni lo a ti a.Commissioner chuan endikna a neih tur thu court chu hrilhin, SHO pawh duty atanga ban a nih thu a sawi a. High Court chuan Rajasthan chhunga police zawng zawngte chu mipui nungchang leh khawsazia (public behavior) leh inbiakpawhnaah (communication) training nei turin a hriattir a. Court chuan heng ruahmanna te hi tha taka kenkawh a nih theih nan Rajasthan sorkar leh Commissioner chu a hriattir nghal bawk a ni .High Court chuan thutlukna pawimawh tak, Bharat Yadav Vs State of Rajasthan (2019) chu a sawi lang a. He thutlukna hian Supreme court a Harish Uppal Vs Union of India a thutlukna, ukilte tan an lungawi lohna chinfel theihna tur committee ruahhman a ngaih thu chu a kengkawh a. High court chuan Jodhpur leh Jaipur-ah Grievance redressal committee siam fel a ni tawh a ti a. Amaherawchu, Committee hi a thawkrim tawklo niin a lang a ti a. High Court chuan District tinah committee din thar leh turin a hriattir a, a ruahmannate siam chu court hmaah thehlut turin a hriattir bawk.He thubuai hi PIL anga register a ni a. Court chuan kar khat chhungin investigation report kimchang thehlut tura tiin, December ni 8 ah ngaihtuah leh turin a ruat nghal a ni (www.jclalnunsanga.in).(He thubuai hi Rajasthan High Court Advocates Association, Jodhpur & Anr Vs State of Rajasthan & Anr, DB Civil Writ Petition No.23646 of 2025 a ni a. Thubuai thehluttu tan Dr Sachin Acharya , Sr Adv a ding a. Sorkar tan hian Mahaveer Bishnoi, AAG leh midangte an ding a ni.)

Delhi High Court ah chuan J&K Deputy CM in Zahmawh Rawngkaia Nula Phone Biakna Social Media a awmte delete tura kualkona a ngaihtuah

02/12/2025
Admin

Vawiin December ni 2,2025(Thawhlehni) khan Delhi High Court chuan Jammu & Kashmir Deputy Chief Minister Surinder Kumar Choudhary in social media-a hmeichhe pakhat nena zahmawh rangkaia an inbiakna social media a awm te paih tura a dilna case (Surinder Kumar Choudhary Vs Google LLC) chu a ngaihtuah.An Buaina Bul:Choudhary hi October ni 16,2024 khan Union Territory-a Deputy Chief Minister tura lakluh a ni a. Assembly election-ah pawh J&K BJP President a lo hneh tawh a ni.Kum 2024-a Nowhera atanga thlan tlin leh Jammu & Kashmir National Conference (NC) leader senior ni bawk, Choudhary-a chuan Facebook page leh YouTube channel thenkhat chuan a chanchin amah ti hmingchhe thei lam video an upload a nih thu court hi a hrilh a. Choudhary chuan hmeichhe pakhat nena phone-a an inbiakna chu zahmawh rawng kai lama an puhna chuan a tih hmingchhiat hle thu a sawi a, court hnenah chuan a rang thei ang bera paih tirna thupek chhuah turin a dil a ni.High Court Ngaihdan leh Thupek:Justice Amit Bansal hmaah chuan he thubuai hi ngaihtuah a ni a. Justice Bansal chuan thubuaia transcript leh video sawi lang te chu thehluh a la nih loh avangin pen drive hmangin thehlut turin a ti a. Court chuan social media platform chauhte khing lovin, video upload tute chu defendant (lehlam party)-a belh turin thubuai thehluttute chu a hriattir a.High Court chuan Google LLC leh Meta Platform-te chu video upload tute Facebook page leh Youtube Channel-te chu thubuai thehluttu hnenah pe turin a ti bawk. He thubuai hi January ni 13,2026-a ngaihtuah leh turin a ruat a. Court chuan defamation case a nih leh nih loh a enfiah hmain thil tul zawng zawng chu record-ah dah vek turin a hriattir a ni (www.jclalnunsanga.in).(He thubuai hi Surinder Kumar Vs Google LLC& Ors a ni a.)

Kristiana Inlet Te’n SC/ST Certificate Dik Lo Tak A An Hman Loh Nan Allahabad High Court Chuan Enthlithlaina Nei Turin A Hriattir

02/12/2025
Admin

Ni 21, November 2025 khan Allahabad High Court, Justice Praveen Kumar Giri chuan Uttar Pradesh-a District Magistrate zawng zawngte chu Hindu sakhua atanga kristian leh sakhaw danga mi tupawh an inlehin, hna hmuh nan Scheduled Caste leh Category dang certificate dang dik lo takin an hmang em tih enfiah turin a ti.Court chuan hetianga India Danpui hnuaia inbumna hi a thlen loh nan, District Magistrate-te chu thil felhlel a awm chuan State sorkar hnenah thla li chhunga hrilh turin a ti a. Court chuan Uttar Pradesh sorkar hnuaia Union Cabinet Secretary leh Chief Secretary-te chu Scheduled Caste, Scheduled Tribe leh Other Backward Classes te chungchang hi lo enfiah turin a ti a ni.He thubuai hi mi pakhat Hindu sakhua atanga Christian sakhuaa a inleh hnuin Court-a affidavit thehluhah Hindu sakhua niin a in sawi a. Court chuan mi tumah Hindu, Sikh leh Buddhist ni lo chu Constitution (Scheduled Caste) Order, 1950 hnuaiah Scheduled Caste an nih theih loh thu a sawi a. Supreme Court chuan tunhnai maia C Selvarani Vs District Collector case a thutluknaah chuan, sakhaw danga inleh hnua Scheduled Caste-in hlawkna an dawn theih tel an tum chuan chutianga ti te chuan India Danpuia inbumna lian tak an khawih niin an sawi. Andhra Pradesh High Court chuan Akkala Rami Reddy Case ah caste avanga inthliarhranna chu Christian rinnaah a awm loh thu a lo sawi tawh a, chuvang chuan Scheduled Caste nihna chu Christian sakhuaa inlehin a tawp nghal thu an lo sawi tawh bawk.Thubuai thehluttu hian mi tam tak Christian sakhuaa hruai luh tum ang leh Hindu sakhaw kalh zawnga thu sawi anga puhna a tawk bawk a. Nimahsela, thubuai thehluttu ukil sawi danin Sub Divisional Magistrate, Maharajganj hnen atangin a ram chhunga Pathian thu sawi phalna a pek thu a sawi. He phalna hi a hnuah lak let a ni.Thubuai thehluttu hian Section 153-A IPC ( sakhua, hnam, pianna avanga inhuatna thlen thlen) leh 295A IPC ( sakhua bil avanga inhuatna thlen) hnuaiah thubuai neiin Allahabad High Court hnenah a thubuai hi tih tawp a dil a, Court chuan tih tawp a phalsak lo a. Court chuan District Magistrate, Maharajganj hnenah thubuai thehluttu sakhua chu thla thum chhunga endik turin a ti a, inbumna a awm anih chuan dan anga hremna pek a nih tur thu a sawi a ni. (www.jclalnunsanga.in) (He thubuai Jitendra Sahani v. State of UP and another ah chuan hian thubuai thehluttu lam tan Advocate Vandana Henry leh Advocate Patsy David te an ding a. UP Sorkar tan Additional Government Advocate Pankaj Tripathi a ding)

Orissa High Court chuan MP/MLA-te'n Zirtirtute An Sawn Theihna tur Sawrkar Lehkha Chhuah A Thiat

01/12/2025
JC

November ni 27,2025 khan Orissa High Court chuan Member of Parliament (MP) leh State Legislative Assembly (MLA)-te’n district hrang hranga zirtirtu sawn theihna thuneihna pe sawrkar lehkha chu a thiat. Court chuan MP leh MLA-te chu hetiang thuneihna pe thei dan engmah a awm loh thu a sawi.May ni 14,2025 khan State rawtnain Right to Education Section 19 leh 25 hnuaiah zirtirtu sawn(transfer) dan khawih turin “Transfer Committee” din a ni a. Sawrkarin May ni 13,2025 khan MP leh MLA-te chu zirtirtu sawn kualnaa rawtna siam theih thuneihna lehkha a lo chhuah tawh bawk a. Zirtirtute chu lungawi lovin court hmaah hian an zualko ta a ni.Court-a An Inhnialna:He thubuai hi Justice Dixit Krishna Shripad hmaah ngaihtuah a ni a. Court chuan eng dan hnuaiah nge sawrkar lehkha hi chhuah a nih thu chu hmuh turin a hriattir a. Sawrkar ukil chuan dan engmah chu a kawhhmuh thei lova, lehkhaah ngei pawh hian dan lam leh thuneihna engmah an sawi tel lo a ni.Sawrkar chuan MP leh MLA rawtnate chuan Transfer Committee thutlukna a phuar lo a ti a. Thubuai thehluttute chuan politician rawtna phalsak rikngawt pawh hi dan kalh a ni an ti a, zirna kalphungah (education system) tul lo taka political influence a thlen theih thu an ti a ni.Court Hmuh Dan:Justice Shripad chuan zirtirtu sawnna-a politician-te inrawlh phalsak chu tul lo a ti a, zirtirtute chu politics atanga hla taka an awm a ngai a ti. Court chuan Representation of People Act hnuaia Section 159 leh RTE Act hnuaia Section 27-te tarlangin zirtirtute chu election, census duty emaw disaster relief –te a nih loh chuan zirna lam hawi bak lo hna an khawih thei lo a ti a. Court chuan heng dante hi politics leh zirtirtute-a inthununna hrisel lo venna atan a awm tih a sawi.Sawrkar chuan MP leh MLA rawtna siamte chuan zirtirtu sawn dan a phuar lo a ti a. Amaherawhchu, MP leh MLA-te rawtna siam atanga thutlukna siam insawnna order tam tak chu court chuan a kawhhmuh a. Heng insawnna order ho hian Transfer Guidelines engmah an zawm lo a. Court chuan heng rawtna te hi thupek angin a lang fo avangin official-te chungah nawrna nasa tak a siam tih a sawi tel bawk a ni.High Court Thutlukna:High Court chuan May ni 13,2025-a sawkar lehkha chhuah chu a dan anga kalpui a nih loh avangin a thiat a. Politician rawtnaa zirtirtu sawnna order siam zawng zawng chu a thiat nghal bawk.Amaherawhchu , court chuan zirlaite tihbuai an nih loh nan sawrkar chu tun academic session hman mek tawp thleng nghah a phalsak a, chumi hnuah chauh chuan zirtirtute chu a tira an thawhnaah let leh turin a ti . Heng rawtna avanga zirtirtu khawih sawn ho chu kum 2025-2026 academic session tawp atanga kar khatah chuan hmun ngai luahtir leh turin a hriattir a, tihkhawtlai a nih chuan court-in a lak thutak hle tur tih a vaukhan bawk(www.jclalnunsanga.in).(He thubuai hi WP(C) No.20875 of 2025, Ranjan Kumar Tripathy & Ors Vs State of Odisha & Ors a ni.)

Sex Toys Hmanga Sumdawngte Zarbuai Vangin Delhi High Court-in Customs Department A Khak

01/12/2025
Admin

Ni 24, November 2025 khan Delhi High Court chuan Customs Department-in ni 13, November 2025 a sex toys chungchanga an thutlukna review petition(ennawn tura ngenna) thehluhah thutlukna a siam a, he review petition hi Delhi High Court chuan ennawn nachhan tur a awm lo tiin a hnawl a ni.Ni 30, October 2025 khan Delhi High Court chuan ‘sex toys’ laluttu leh pechhawngtute diklo taka an zar buai vangin Customs Department chu Customs Department, Assistant Commissioner hlawh atanga paih turin Rs. 25,000 a chawitir a. Customs Department hian an bungraw hrensak nena in ang chiah dangte pawh dodalna awm lovin lakluh(import) an phalsak a, hemi avang hian Delhi High Court chuan an bungraw hrensakte pek chhuah lailawk phalna a pe a.Customs Department-te dinna:Customs department-te sawidanin sex toys an chhuhsak chu Techsync(a laluttu) te chuan sex toys ani tih thupin body massager tiin an sawi a. Hei hi Section 11 of the Customs Act, 1962, hnuaia 1964 a notification-in zahmawh rawngkai bungrua (obscene products)a sawi anih avangin a khap thu an sawi. Review Petition thehluhah hian Customs Department-te chuan Techsync leh Debanjan Impex te’n a an bungraw lakluh hi Drug Controller General of India (DCGI) atanga license/ certificate an neih a ngaih thu an sawi bawk. Tin, Customs lam chuan Battery Waste Management Rules, 2022, hnuaia Extended Producer Responsibility Registration Certificate, battery hmang bungruain an neih tur chu an neih loh thu an sawi bawk.Company-te dinna:Company lam erawh chuan Central Drugs Standard Control Organisation (Medical Devices Division) Medical Devices, ‘Frequently Asked Questions’ section a intarlan danin massager chu intihhahdamna emaw taksa tih zangkhaina hmarua atana hman tura tih a ni a, damdawi atana hman tur a ni lova, chuvang chuan he regulation hnuaiah hjan a awm thei lo a ni, an ti thung. EPR (Extended Producer Responsibility) certificate pawh hi bungrua pek chhuah anih hnuah dil leh theih ani, tiin an sawi bawk.Court thlirna leh thutlukna:Ni 30, October 2025-a Delhi High Court order atanga a landanin, hemi chungchangah hian Court chuan intluktlanna awm lovin an hria a, Central Board of Indirect Taxes and Customs (CBIC) te chu body massager emaw sex toys emaw pawh ni se, intluktlang taka phalna emaw phallohna chungchanga rorel dan a awm theih nan, sorkar department hrang hrang inrawnna (interministerial consultation) nei turin a ti a ni.Justices Prathiba Singh and Justice Shail Jain te chuan Customs department hnenah zawhna an zawt a. Company te bungrua an chhuhsak ang tho, Reckitt Benckiser of Durex brand te telin, Customs department-te chuan dodalna tellovin lakluh an phalsak thu an sawi a. Bench chuan Customs Department-in thubuai thehluttute chu tul lo tak leh chhan leh vang lova an zarbuai thu an sawi a. Delhi High Court chuan customs department chu Rs 25,000 an chawitir a, he an pawisa chawitir hi Customs Department, Assistant Commissioner, Jainendra Jain hlawh atanga paih theih a ni tiin thutlukna an siam(www.jclalnunsanga.in)

DISCLAIMER