High Court

Bombay High Court : Thingkung Venhimna Dan Chu Khauh Taka Kenkawh Tur A Ni, Dan Zawm Lo Officer-te Chu Hrem Theih An Ni, Thingte hi khawvelin van lama a hla thute an ziakna a ni.

10/02/2026
Admin

Bombay High Court : Thingkung Venhimna Dan Chu Khauh Taka Kenkawh Tur A Ni, Dan Zawm Lo Officer-te Chu Hrem Theih An Ni, Thingte hi khawvelin van lama a hla thute an ziakna a ni.Bombay High Court chuan ni 2, February 2026 khan thing venhimna dan chu khauh tak a zawm tur a nih thu sawiin, “Thingte hi khawvelin van lama a hla thute an ziakna a ni (Trees are a poem which earth writes upon sky)”, tiin an sawi. Court chuan thing kih phalna pek chungchangah sawrkar officer-te ngei ngei pawhin dan an zawm loh chuan Maharashtra (Urban Areas) Protection and Preservation of Trees Act, 1975 hnuaiah khin theih an nih thu an sawi a. Court chuan Pune Municipal Corporation (PMC) in coconut kung pali kih phalna a pek chungchangah kaihhruaina dan awmsa chu an zawm lova, endikna mumal awm lovin duhdah takin phalna an pe niin an sawi bawk.Division Bench, Justice Bharati Dangre leh Justice Manjusha Deshpande te chuan Section 21, Maharashtra (Urban Areas) Protection and Preservation of Trees Act, 1975 in dan bawhchhiatna leh hremna a pek theih chu dan lo a thing kittu mai bakah officer dan zawmlo te pawh a huam thu an sawi. He dan hnuaiah hian dan bawhchhetu chu thing hlutna hu ang pawisa chawi turin leh tan inah kar khat atanga kum khat thleng tan theih a ni bawk. Court chuan he danin a tum ber chu kan chhehvel ram thatna venhim hi a ni a, hemi kalh zawng a thiltih a awm chuan dan ang a na tak a hmalak a ngaih thu an sawi bawk.Court chuan PMC-in a vantlang mipuite hnena hriattirna an pek chhuahah dik lo a awm niin an sawi a. An hriattirna chhuahah chuan thing awmna hmun tarlan a ni lova, thing an kih duhna chhan sawifiah a ni lova, phalna petu tarlan a ni lo bawk a ni. Hriattirnaa thil kimchang tarlan anih loh avang hian hnialna nei duh tan tih hleihtheih a nih loh thu an sawi. Thing chu kih tawh ni mah se, Court chuan Section 21 hnuaiah chuan thuneihtu zinga mawhphurtute chungah dan ang a hmalak a nih theih thu an sawi a. He thubuai chu tih tawp niin, thing kih chungchanga dan awmsa leh Court-in thutlukna a lo siam tawh te chu khauh taka zawm turin an ti bawk(www.jclalnunsanga.in)(He thubuai Abhijeet Mohan Anturkar vs Tree Authority Department Pune Municipal Corporation & Ors. ah hian thubuai thehluttu tan Adv.Abhay Anturkar, Adv. Harshvardhan Suryavanshi leh Adv. Ajinkya Udane te an ding a, PMC tan Adv. Vishwanath Patil a ding a ni)Dan lam kaihhnawih thutharte hi Whatsapp Group siamin update kan post thin a. Hemi Groupa i awm ve duh a nih chuan hemi link-ah hian lo join ve turin kan sawm a che. https://chat.whatsapp.com/BEZzj5EzMLCBEQjtWYRFug?mode=gi_c emaw https://chat.whatsapp.com/DMaRfCsAQimCo6fLFyYNuS?mode=gi_c

“Pasal Neih leh Nau Pai Hi Zirna Ti bahlahtu A Ni Tur A Ni Lo”, MP High Court Chuan College Hnenah Attendance-a Hriatthiamna Nei Turin A Ti

09/02/2026
Admin

“Pasal Neih leh Nau Pai Hi Zirna Ti bahlahtu A Ni Tur A Ni Lo”, MP High Court Chuan College Hnenah Attendance-a Hriatthiamna Nei Turin A TiNi 2, February 2026 (Thawhtanni) khan Madhya Pradesh High Court chuan hmeichhiain pasal a neih emaw, nau a pai emaw hian a zirna ti bahlahtu a ni tur a ni lo tiin a sawi. Court chuan attendance neih ngai zat atangin hriatthiamna nei turin leh maternity/child care leave phal sak turin a ti bawk. Division Bench, Justice Vivek Rusia leh Justice Pradeep Mittal chuan hnathawhna hmun a hmeichhiain hamthatna an neih ang chu zirna ina hmeichhia pawhin an nei ve tur a ni, tiin a sawi. Court chuan extra class te, study material te, leh zirnaa puihna a mamawh hrang te chu nau a pai chhung leh a neih hnuah pawh college te’n an pe tur a ni a ti bawk.He thubuai hi Rumaisa Arwa, Hakim Syed Ziaul Hassan Government Autonomous Unani College, Bhopal a zirlaiin a thehluh a ni a. First year a zir zawh hnu chuan pasal neiin fa a nei a, tichuan college atangin maternity leave a dil a. Nimahsela, college lam chuan 10% chin chiah ngaihhnathiamna an pe a. Chumi hnu chuan a attendance chu 56.64% niin, mandatory attendance 75% anih avangin a exam an phal ta lo a. High Court hnenah maternity leave phal sak turin leh semester exam phal sak turin a dil a ni.A dilna thehluh ngaihtuah a nih lai hian Court chuan exam phalsakna interim order a chhuah a, nimahsela, a result erawh chu college-in an pe chhuak lo thung. Thubuai thehluttu hian UGC letter dated 14.10.2021 ah innghatin, hetah hian zirna in zawng zawng te chu hmeichhe zirlaite tana maternity/child care leave policy siam sak turin a ti a ni. Thubuai thehluttu hian Delhi High Court in hmeichhe nau nei te hamthatna hi hmeichia te dikna chanvo a ni tia an sawi chu a tarlang bawk(www.jclalnunsanga.in).(He thubuai Rumaisa Arwa vs. The State of Madhya Pradesh ah hian thubuai thehluttu tan Adv. Ahmad Shahid Hushain a ding a, sawrkar tan Additional Advocate General, Janhavi Pandit a ding)

High Court Chuan M/S J Infratech Ltd. Chu Fur Tan Hmain (April) Kawngchhia chu Siam Tha Turin Thu a Pe

05/02/2026
Admin

High Court Chuan M/S J Infratech Ltd. Chu Fur Tan Hmain (April) Kawngchhia chu Siam Tha Turin Thu a PeNimin February ni 4,2026 khan Gauhati High Court, Aizawl Bench-a Justice Marli Vankung leh Justice Mridul Kumar Kalita-te thutna bench chuan Kawnpui leh Sairang inkar kawngpui dinhmun chhe tak chungchanga Mizoram Truck Drivers Association (MTDA)-in PIL a thehluh chu a ngaihtuah.M/S J Infratech Ukil Anil Kumar chuan hnathawktu mi 87 Project-1 ah, mi 96 Project 2 ah an chhawr mek thu court a hriattir a. Heng bakah hian Excavator panga, Back hoe loader panga, tipper sawm pathum, roller pasarih, water tanker pali ten hnathawhna hmun an vil reng thu a hrilh.Court chuan M/S J Infratech Ltd. chu Bilkhawthlir-Kolasib(72-95km), Kawnpui-Khamrang(118-133 km) leh Buichali-Sairang(147.8-159 km) kawng siam thatnaah chuan theihtawp chhuah tur leh hnathawk leh hmanrua belh zel turin thu a pe a, hnathawh chu April 2026 tawp hma ngeia zo turin thu a chhuah bawk.Court chuan M/S J Infratech Ltd chu January ni 22, 2026-a meeting minutes hmanga hrilh an nih anga hmanrua belh a nih dan leh hna kalpui hmasawnna chu additional affidavit hmangin thehlut turin thu a pe a. He thubuai hi March ni 11, 2026-ah ngaihtuah leh turin a ruat nghal a ni. (www.jclalnunsanga.in)(He thubuai hi PIL No.2 of 2025, MTDA Through Lalhmudika Tochhawng Vs State of Mizoram & 11 Ors a ni. Petitioner tan Emily L Chhangte a ding a, NHIDCL tan Samuel Vanlalhriata a ding)

Ui Kaihhnawiha Thenawm Khawveng Intihbuaina Karnataka High Court-in A Ngaihtuah

05/02/2026
Admin

Ui Kaihhnawiha Thenawm Khawveng Intihbuaina Karnataka High Court-in A NgaihtuahNimin ni 4, February 2026 (Nilaini) khan Karnataka High Court chuan ui neitute’n an ui an enkawl that loh avangin court-ah thubuai a tam thu a sawi a. Justice M. Nagaprasanna chuan ui neitute’n an ui an khuahkhirh that loh avangin leh khawlaia an ek te an then fai that loh thin avangin tullo tak a court-ah thubuai ngaihtuah a ngaih thin thu a sawi.He thubuaia chhungkaw pakhat sawi danin, an thenawmte chuan an ui chu an kawngka bulah tak a ek thin thu an sawi a. An ui chetdan an thenawmte hnena an sawi chuan intihbuaina a lo chhuak ta niin an sawi. Ui neitu chuan thubuai thehluttu chu bracelet leh lung hmangin kut a thlak a, thubuai thehluttu chu hospital-ah hruai a ni ta a ni. Hemi hnu hian criminal case chu ui neitu lakah ziah luh a nih hnuah ui neitu hian thubuai thehluttuin kut a thlak thu te, hliam a tawrh tir thu te leh thlamuang taka an awmna a tihchhiat thu te sawiin an lakah hian thubuai a ziaklut ve leh bawk.Thubuai thehluttute hian ui neitu thubuai thehluh titawp turin Karnataka High Court hnenah dilna an thehlut a. High Court chuan thubuai kal lai mek chu a stay a, ui neitu thubuai thehluh atanga chhuizuina kal mek pawh a chawlh tir bawk. He thubuai ngaihtuahlai hian Justice Nagaprasanna chuan zangkhai takin,“Tu nge ui chhuah tir?” tiin a sawi a, ui chu khuahkhirh that a ngaih thu sawiin, “In ui chu khawiah mah chhuahpui tawh suh u,” tiin thurawn a pe.

MP High Court Chuan Hmeichhia Chu A Uire Tih Finfiahin A Pasalin Inthen a Dilna Chu A Pawmsak; Family Court Thutlukna A Kenkawh

11/12/2025
JC

Madhya Pradesh High Court chuan October ni 28,2025 khan mipa pakhat nupui chu mipa dang lakah a uire tih a hriatchhuah chuan Family court thutlukna chu a kenkawh sak. Justice Vishal Dhagat leh Justice B.P Sharma-te thutna bench chuan a nupui appeal chu hnawlin, trial court thultukna chu a pawmsak a ni.An Buaina Bul:Kum 2009 November thla khan an nupa hian an inneih a. Kum 2010 ah fapa neiin, June 2012 atangin in hrangah an khawsa a . A pasal chuan a nupui chu uire-a puhin Hindu Marriage Act hnuaia Section 13-ah inthenna dilna a thehlut a. Chutih chhung a nupui chuan a pasal lakah thubuai tam tak a thehlut a, chung zingah chuan hmeichhe thuam leh ro chhawm (dowry) tihbuaina FIR, Section 125 CrPC hnuaia maintenance dilna , Domestic Violence Act hnuaia thubuaite leh a dang tam tak a thehlut a.Family Court chuan a pasal then dilna chu phal sakin, a nupui thubuai thehluhte chu heti hian a thutlukna a siam a: Thla tin a fapa kum tlinglo tan Rs.5000/- A nupui tan Rs.3,00,000/- (stridhan)He thutluknaah hian a nupui chu lungawi lovin, appeal a thehlut a. Uire-a an puhna leh court in pawisa a hlan zat chu a sawisel a ni.He thubuai hian electronic finfiahna-saruak thlalak, email-te,chat leh SMS message te a huam tel a. A pasal chuan mipa dang nena an uirena chu a finfiah thu a sawi a. A nupui erawh chuan chat leh email-te chu tihdanglam theih tura thawn a ni a ti a, finfiahna chuan Evidence Act-a Section 65B hnuaia certificate te chu a tlachham tiin a hnial a. A pasal chu key-logger hmanga finfiahna la khawmah a puh bawk a ni.High Court Ngaihdan leh Thutlukna:High Court chuan a hnialna hian family court thutlukna chu a sut thluk theih loh thu a sawi a. Court chuan Family Court Act hnuaia Section 14 chuan family court chu finfiahna eng pawh hmantlak nia a hriat chu a pawm theih thu a sawi.Bench chuan NG Dastane Vs S. Dastane thutlukna chu tarlangin, nupui pasal neih chungchangah chuan rinhlelh rual loha finfiahna ai chuan a dik zawk anga lang hian hnehna an chang (preponderance of probabilities) a ti a. Court chuan uirena chu thil awmdan finfiahna hmanga din a nih thu a sawiin, a nupui chuan he thubuai ngaihtuah a nih lai hian thu pawimawh tam tak a zep thu a sawi bawk.High Court chuan Family court thutlukna chu finfiahna rintlak leh ngaihdan dan dik tak atanga chhuak a nih thu tiin, a kenkawh a. Court chuan a nupui appeal chu hnawlin, an inthenna chu a pawmsak a ni (www.jclalnunsanga.in)(He thubuai hi First Appeal No.101 of 2017 a ni a. Thubuai thehluttu tan Advocate PL Shrivastava a ding a, lehlam tan hian Advocate Kaustubh Shankaer Jha a ding a ni.)

Kum Tlingloin Eng Thil Vang Pawhin Mipat Hmeichhiatna Hmang Turin A Remtihna A Pe Thei Lo: Calcutta High Court

11/12/2025
JC

Ni 9, December 2025 khan Calcutta High Court, Division Bench, Justice Rajasekhar Manthar leh Justice Ajay Kumar Gupta chuan kum tlinglo naupang chuan mipat hmeichhiatna hman avanga thil thleng thei te an hrethiam lo tiin, Protection of Children Against Sexual Offences Act, 2012 (POCSO Act) hnuaia mipa kum 23 mi thiamlohchantirna chu a pawmpui a. Dan hnuaiah chuan kum tlinglo naupang chuan a remtihna a pe thei lo, tiin an sawi.Thubuai chungchang:He thubuaia pawikhawihtu hi mipa kum 23 mi a ni a, hmeichhe naupang kum 12 mi nen an inngaizawng a. Pawikhawihtu hian a tuartu hmeichhe naupang hi nupuia nei tura intiamin mipat hmeichhiatna a hmanpui thin a. A tirah chuan naupang hian a duh lo thin a, pawikhawihtu hian an inngaihzawnna chu chhunzawm zel turin a thlem a. Kum 2017 khan hmeichhe naupang hi kum 15 mi niin a rai ta a. Pawikhawihtu leh a chhungte hian he thil thleng chungchang hi an pawm duh lova, a tuartu, hmeichhe naupang chhungte hian POCSO Act hnuaiah thubuai an thehlut ta a ni.Pawikhawihtu dinna:Pawikhawihtu hian an puhna te chu a pawm lova. Thubuai chu kum 2 laiin thehluh tlai a nih thu leh hemi avang hian an a tuartu te thusawi chu a rinhlelhawm thu a sawi a. A tuartu kum chu finfiah a nih loh thu leh, DNA report chu a rin tawp theih a nih loh thu a sawi.Finfiahna chungchanga Court dinna:Thubuai thehluh tlai chungchangah chuan Court chuan a hriatthiam thu a sawi a. A tuartu hian pawikhawihtu hi a thinlung takin a lo duh ve hle a, an inngaihzawnna chuan inneihna a thlen dawn emawni tiin, thubuai chu a rai tih a hriatchhuah hnuah chauh a thehlut a. Court chuan naupangin mipat hmeichhiatna hman avanga a hnu a thil thleng thei te an hrethiam lo a ti a ni.Remtihna chungchangah chuan Court chuan a tuartu hmeichhia hi kum tlinglo a ni a, dan hnuaiah chuan a remtihna a pe thei lova. Hmeichhe naupangin an inneih a rin avanga mipat hmeichhiatna hman a remtih chu pawm theih a ni lo, tiin an sawi.A kum zat finfiahna chungchangah chuan Court chuan a birth certificate chu tha taka vawn a nih thu a sawi a. Court chuan a kum zat chu pawmpuiin, kum tlinglo a nihna chu finfiah a ni ta a ni. DNA chungchangah chuan oral evidence nen tangkawpin finfiahna tling a nih thu an sawi.High Court thutlukna:Calcutta High Court chuan Trial Court-in Section 5(j)(ii) leh 5(l), POCSO Act hnuaia thiamloh a chantirna chu a pawmpui a. Section 6 hnuaiah hrem theih niin, Trial Court-in hremna a lo pek tawh, dam chhung lungin tan leh cheng nuai hnih a chawitirna chu a pawmpui bawk. Pawikhawihtu hian pawisa chawitir hi a pek mai loh chuan State Legal Services Authority(SLSA) in Rs. 1,80,000 chu ni 15 chhungin an pe tur a ni a. Pawikhawihtu hian a hnuah a pek leh chuan SLSA hnenah pek let leh tur a ni ang. SLSA hian an pawisa(funds) atangin Rs. 2 lakh an pe bawk tur a ni a. Trial Court chuan a tuartuin zangnadawmna te chu a dawng ngei a ni tih an lo endik tur a ni, tiin Court chuan thutlukna a siam(www.jclalnunsanga.in) (He thubuaiah hian thubuai thehluttu(appellant) tan Advocate Sabir Ahmed, Andvocate Ayan Chakraborty leh ukil dangte an ding a. Sorkar tan Advocate Rituparna Ghosh leh Advocate Afreen Begum te an ding a. A tuartu(victim) tan Advocate Shounak Mondal a ding a ni)

DISCLAIMER