Ni 14 (Zirtawp) leh 15  (Inrinni), November khan Arbitration Case No.2/2022, JV NEIP Company/Contractor  in Mizoram sawrkar Rs 63.45 Cr chawi tura a khinna chu final hearing Nitibagh, Arbitration Centre, New Delhi-ah neih a ni a.  He Arbitral Tribunal ah hian Presiding Judge hi Gauhati High Court Judge Justice BD Agarwal Rtd a ni a, Co-arbitrator pahnih awmin Mizoram sawrkar tan hian Pu Saingura Sailo, MJS Rtd (District & Session Judge-I) chu Co-Arbitrator atan ruat a ni a. JV NEIP Company/Contractor lam hian R.S Negi IAS Rtd, Delhi Chief Secretary lo ni tawh chu an ruat.

Hemi ni te hian  JV NEIP lam ukil hian ni 14 (Zirtawp) nileng leh Inrini chawhma lamah a argument hmawr bawkna a nei a. Dan tan chhan leh thuhretu te tanchhanin inhnialna neih a ni a. Mizoram sawrkar chuan High Tension Line phalna an neih loh avangin Ropeway an siam thei lo a. Hemi bakah ropeway siam nana Durtlanga Pu Chhawnthuama'n a ram nena buaina awm avangin hna an thawk thei loh thu an sawi a. An hna 30 chuang chu hman theihin an peih vek thu sawiin Skywalk pawh a siam chhunzawmna tur sawrkarin an pek loh avangin an chhunzawm loh thu an sawi. Bungrua engemaw an order na leh an bill tang te chu pe ngei turin court hi an dil. Sawrkar chuan an hna te a that avangin pawisa an pe a, chumi tih chianna pawh UC (Utilization Certificate) Central sawrkarah pawisa dil leh nan an thawn thin tiin an tang.

Mizoram lamin chhanletna nei ve leh in he hna buaina bul chu Mizoram Consultant Satisth Pathania chu JV NEIP sangawi zawnpui a lo ni a. Sawrkar in amah an rin avangin JV NEIP te thawh turin Ropeway pawh siam theih a ti a. Harsa awm thei engmah a sawi loh avangin harsatna an tawk an ti. JV NEIP te chu an pawisa dawn tawh Rs 34.20 Cr leh an hna thawh zat chu a inphu lo a. He hna inremna ni 30.08.2017 a ziak chu nasa taka an bawhchhiat avangin court/tribunal a an dil hi pek theih a nih loh thu an sawi. Mizoram sawrkar lam hian an argument hmawr bawkna leh an khin letna tanchhan te ni 29 November hian Guwahati-ah an chhunzawm ang.

Swadesh Darshan-2 hnuaiah hian Sawrkar laipui chuan  ni 27.3.2017 khan Rs 99.07 Cr man hu Development of Eco-Adventure Circuit Project chu Mizoram tan a ruahman a. Civil hna 120  leh adventure lam hna  32 te hmun hrang hrang 10 ah a awm a. Heng hna zinga lian zual chu Durtlang- Chaltlang Ropeway Rs 2482.58 lakhs man hu sak zawh tura ruahman  leh Sakawrhmuituai tlang hna Rs  485 lakhs man a siam zawh tura ruahman te an ni. Heng zingah hian  Durtlang – Chaltlang Ropeway chu High Tension Line (HTL) a awm avangin Power Grid lam atangin phalna an hmuh theih loh avangin siam a ni lo a. Sakawrhmuituai Skywalk pawh siam  zawh a ni lo.

Mizoram sawrkar in JV NEIP Company/Contractor  te hi an hna thawk tura nasa taka a nawr laiin an ni lam hian Mizoram sawrkar in pawisa min pek loh avangin hna kan thawk thei lo tiin bill tang leh thil dang neuh neuh nen Rs 63.45 Cr lai chu Arbitral Tribunal-ah hian an khin a zawk a. Mizoram sawrkar in an pawisa pek tawh chu an hnathawh nen inphu lo tiin Ropeway siamna tura an pawisa pek tawh leh engemaw zat hna an thawk chhiat avangin dil let (counter claim) ve thung a ni.

(JV NEIP Company/Contractor te hian Ahmed & Co Law Firm ruaiin  Mohammed Faris a ding a, Mizoram Sawrkar leh Mizoram Tourism Development Authority tan JC Lalnunsanga a ding)