High Court

High Court Chuan M/S J Infratech Ltd. Chu Fur Tan Hmain (April) Kawngchhia chu Siam Tha Turin Thu a Pe

05/02/2026
Admin

High Court Chuan M/S J Infratech Ltd. Chu Fur Tan Hmain (April) Kawngchhia chu Siam Tha Turin Thu a PeNimin February ni 4,2026 khan Gauhati High Court, Aizawl Bench-a Justice Marli Vankung leh Justice Mridul Kumar Kalita-te thutna bench chuan Kawnpui leh Sairang inkar kawngpui dinhmun chhe tak chungchanga Mizoram Truck Drivers Association (MTDA)-in PIL a thehluh chu a ngaihtuah.M/S J Infratech Ukil Anil Kumar chuan hnathawktu mi 87 Project-1 ah, mi 96 Project 2 ah an chhawr mek thu court a hriattir a. Heng bakah hian Excavator panga, Back hoe loader panga, tipper sawm pathum, roller pasarih, water tanker pali ten hnathawhna hmun an vil reng thu a hrilh.Court chuan M/S J Infratech Ltd. chu Bilkhawthlir-Kolasib(72-95km), Kawnpui-Khamrang(118-133 km) leh Buichali-Sairang(147.8-159 km) kawng siam thatnaah chuan theihtawp chhuah tur leh hnathawk leh hmanrua belh zel turin thu a pe a, hnathawh chu April 2026 tawp hma ngeia zo turin thu a chhuah bawk.Court chuan M/S J Infratech Ltd chu January ni 22, 2026-a meeting minutes hmanga hrilh an nih anga hmanrua belh a nih dan leh hna kalpui hmasawnna chu additional affidavit hmangin thehlut turin thu a pe a. He thubuai hi March ni 11, 2026-ah ngaihtuah leh turin a ruat nghal a ni. (www.jclalnunsanga.in)(He thubuai hi PIL No.2 of 2025, MTDA Through Lalhmudika Tochhawng Vs State of Mizoram & 11 Ors a ni. Petitioner tan Emily L Chhangte a ding a, NHIDCL tan Samuel Vanlalhriata a ding)

Ui Kaihhnawiha Thenawm Khawveng Intihbuaina Karnataka High Court-in A Ngaihtuah

05/02/2026
Admin

Ui Kaihhnawiha Thenawm Khawveng Intihbuaina Karnataka High Court-in A NgaihtuahNimin ni 4, February 2026 (Nilaini) khan Karnataka High Court chuan ui neitute’n an ui an enkawl that loh avangin court-ah thubuai a tam thu a sawi a. Justice M. Nagaprasanna chuan ui neitute’n an ui an khuahkhirh that loh avangin leh khawlaia an ek te an then fai that loh thin avangin tullo tak a court-ah thubuai ngaihtuah a ngaih thin thu a sawi.He thubuaia chhungkaw pakhat sawi danin, an thenawmte chuan an ui chu an kawngka bulah tak a ek thin thu an sawi a. An ui chetdan an thenawmte hnena an sawi chuan intihbuaina a lo chhuak ta niin an sawi. Ui neitu chuan thubuai thehluttu chu bracelet leh lung hmangin kut a thlak a, thubuai thehluttu chu hospital-ah hruai a ni ta a ni. Hemi hnu hian criminal case chu ui neitu lakah ziah luh a nih hnuah ui neitu hian thubuai thehluttuin kut a thlak thu te, hliam a tawrh tir thu te leh thlamuang taka an awmna a tihchhiat thu te sawiin an lakah hian thubuai a ziaklut ve leh bawk.Thubuai thehluttute hian ui neitu thubuai thehluh titawp turin Karnataka High Court hnenah dilna an thehlut a. High Court chuan thubuai kal lai mek chu a stay a, ui neitu thubuai thehluh atanga chhuizuina kal mek pawh a chawlh tir bawk. He thubuai ngaihtuahlai hian Justice Nagaprasanna chuan zangkhai takin,“Tu nge ui chhuah tir?” tiin a sawi a, ui chu khuahkhirh that a ngaih thu sawiin, “In ui chu khawiah mah chhuahpui tawh suh u,” tiin thurawn a pe.

MP High Court Chuan Hmeichhia Chu A Uire Tih Finfiahin A Pasalin Inthen a Dilna Chu A Pawmsak; Family Court Thutlukna A Kenkawh

11/12/2025
JC

Madhya Pradesh High Court chuan October ni 28,2025 khan mipa pakhat nupui chu mipa dang lakah a uire tih a hriatchhuah chuan Family court thutlukna chu a kenkawh sak. Justice Vishal Dhagat leh Justice B.P Sharma-te thutna bench chuan a nupui appeal chu hnawlin, trial court thultukna chu a pawmsak a ni.An Buaina Bul:Kum 2009 November thla khan an nupa hian an inneih a. Kum 2010 ah fapa neiin, June 2012 atangin in hrangah an khawsa a . A pasal chuan a nupui chu uire-a puhin Hindu Marriage Act hnuaia Section 13-ah inthenna dilna a thehlut a. Chutih chhung a nupui chuan a pasal lakah thubuai tam tak a thehlut a, chung zingah chuan hmeichhe thuam leh ro chhawm (dowry) tihbuaina FIR, Section 125 CrPC hnuaia maintenance dilna , Domestic Violence Act hnuaia thubuaite leh a dang tam tak a thehlut a.Family Court chuan a pasal then dilna chu phal sakin, a nupui thubuai thehluhte chu heti hian a thutlukna a siam a: Thla tin a fapa kum tlinglo tan Rs.5000/- A nupui tan Rs.3,00,000/- (stridhan)He thutluknaah hian a nupui chu lungawi lovin, appeal a thehlut a. Uire-a an puhna leh court in pawisa a hlan zat chu a sawisel a ni.He thubuai hian electronic finfiahna-saruak thlalak, email-te,chat leh SMS message te a huam tel a. A pasal chuan mipa dang nena an uirena chu a finfiah thu a sawi a. A nupui erawh chuan chat leh email-te chu tihdanglam theih tura thawn a ni a ti a, finfiahna chuan Evidence Act-a Section 65B hnuaia certificate te chu a tlachham tiin a hnial a. A pasal chu key-logger hmanga finfiahna la khawmah a puh bawk a ni.High Court Ngaihdan leh Thutlukna:High Court chuan a hnialna hian family court thutlukna chu a sut thluk theih loh thu a sawi a. Court chuan Family Court Act hnuaia Section 14 chuan family court chu finfiahna eng pawh hmantlak nia a hriat chu a pawm theih thu a sawi.Bench chuan NG Dastane Vs S. Dastane thutlukna chu tarlangin, nupui pasal neih chungchangah chuan rinhlelh rual loha finfiahna ai chuan a dik zawk anga lang hian hnehna an chang (preponderance of probabilities) a ti a. Court chuan uirena chu thil awmdan finfiahna hmanga din a nih thu a sawiin, a nupui chuan he thubuai ngaihtuah a nih lai hian thu pawimawh tam tak a zep thu a sawi bawk.High Court chuan Family court thutlukna chu finfiahna rintlak leh ngaihdan dan dik tak atanga chhuak a nih thu tiin, a kenkawh a. Court chuan a nupui appeal chu hnawlin, an inthenna chu a pawmsak a ni (www.jclalnunsanga.in)(He thubuai hi First Appeal No.101 of 2017 a ni a. Thubuai thehluttu tan Advocate PL Shrivastava a ding a, lehlam tan hian Advocate Kaustubh Shankaer Jha a ding a ni.)

Kum Tlingloin Eng Thil Vang Pawhin Mipat Hmeichhiatna Hmang Turin A Remtihna A Pe Thei Lo: Calcutta High Court

11/12/2025
JC

Ni 9, December 2025 khan Calcutta High Court, Division Bench, Justice Rajasekhar Manthar leh Justice Ajay Kumar Gupta chuan kum tlinglo naupang chuan mipat hmeichhiatna hman avanga thil thleng thei te an hrethiam lo tiin, Protection of Children Against Sexual Offences Act, 2012 (POCSO Act) hnuaia mipa kum 23 mi thiamlohchantirna chu a pawmpui a. Dan hnuaiah chuan kum tlinglo naupang chuan a remtihna a pe thei lo, tiin an sawi.Thubuai chungchang:He thubuaia pawikhawihtu hi mipa kum 23 mi a ni a, hmeichhe naupang kum 12 mi nen an inngaizawng a. Pawikhawihtu hian a tuartu hmeichhe naupang hi nupuia nei tura intiamin mipat hmeichhiatna a hmanpui thin a. A tirah chuan naupang hian a duh lo thin a, pawikhawihtu hian an inngaihzawnna chu chhunzawm zel turin a thlem a. Kum 2017 khan hmeichhe naupang hi kum 15 mi niin a rai ta a. Pawikhawihtu leh a chhungte hian he thil thleng chungchang hi an pawm duh lova, a tuartu, hmeichhe naupang chhungte hian POCSO Act hnuaiah thubuai an thehlut ta a ni.Pawikhawihtu dinna:Pawikhawihtu hian an puhna te chu a pawm lova. Thubuai chu kum 2 laiin thehluh tlai a nih thu leh hemi avang hian an a tuartu te thusawi chu a rinhlelhawm thu a sawi a. A tuartu kum chu finfiah a nih loh thu leh, DNA report chu a rin tawp theih a nih loh thu a sawi.Finfiahna chungchanga Court dinna:Thubuai thehluh tlai chungchangah chuan Court chuan a hriatthiam thu a sawi a. A tuartu hian pawikhawihtu hi a thinlung takin a lo duh ve hle a, an inngaihzawnna chuan inneihna a thlen dawn emawni tiin, thubuai chu a rai tih a hriatchhuah hnuah chauh a thehlut a. Court chuan naupangin mipat hmeichhiatna hman avanga a hnu a thil thleng thei te an hrethiam lo a ti a ni.Remtihna chungchangah chuan Court chuan a tuartu hmeichhia hi kum tlinglo a ni a, dan hnuaiah chuan a remtihna a pe thei lova. Hmeichhe naupangin an inneih a rin avanga mipat hmeichhiatna hman a remtih chu pawm theih a ni lo, tiin an sawi.A kum zat finfiahna chungchangah chuan Court chuan a birth certificate chu tha taka vawn a nih thu a sawi a. Court chuan a kum zat chu pawmpuiin, kum tlinglo a nihna chu finfiah a ni ta a ni. DNA chungchangah chuan oral evidence nen tangkawpin finfiahna tling a nih thu an sawi.High Court thutlukna:Calcutta High Court chuan Trial Court-in Section 5(j)(ii) leh 5(l), POCSO Act hnuaia thiamloh a chantirna chu a pawmpui a. Section 6 hnuaiah hrem theih niin, Trial Court-in hremna a lo pek tawh, dam chhung lungin tan leh cheng nuai hnih a chawitirna chu a pawmpui bawk. Pawikhawihtu hian pawisa chawitir hi a pek mai loh chuan State Legal Services Authority(SLSA) in Rs. 1,80,000 chu ni 15 chhungin an pe tur a ni a. Pawikhawihtu hian a hnuah a pek leh chuan SLSA hnenah pek let leh tur a ni ang. SLSA hian an pawisa(funds) atangin Rs. 2 lakh an pe bawk tur a ni a. Trial Court chuan a tuartuin zangnadawmna te chu a dawng ngei a ni tih an lo endik tur a ni, tiin Court chuan thutlukna a siam(www.jclalnunsanga.in) (He thubuaiah hian thubuai thehluttu(appellant) tan Advocate Sabir Ahmed, Andvocate Ayan Chakraborty leh ukil dangte an ding a. Sorkar tan Advocate Rituparna Ghosh leh Advocate Afreen Begum te an ding a. A tuartu(victim) tan Advocate Shounak Mondal a ding a ni)

Hmeichhiate’n An Taksaa Danglamna An Neih Avangin An Hnaah Harsatna Thlensak Tur A Ni Lo: Karnataka High Court Chuan Menstrual Leave Chungchang January 2026-ah Ngaihtuah dawn

11/12/2025
JC

Karnataka High Court chuan January 2026-ah state sorkarin registered industrial establishment zawng zawnga hmeichhe hnathawkte tan thla khata ni khat chhung paid menstrual leave pe tura hriattirna chungchanga petition thehluh chu ngaihtuah a remti a. Court chuan hemi chungchang hi “ vantlang mipui tana thu pawimawh tak” tiin a sawi.Thubuai intanna:Ni 20, November 2025 khan sorkar chuan Menstrual Leave hman tur chungchang hriattirna a pe chhuak a. Hei hi industrial establishment zawng zawng a a ngheta thawk , contract, leh mi chhawr hrim hrimte a huam a, hei hian hmeichhe hnathawkte hnenah thla khatah paid menstrual leave day ni khat pe turin a hriattir a. He thupek hi Labour law hrang hrang hnuaia registered establishment-te hman tur a ni a, chung zingah chuan Factories Act, Shops and Establishments Act, Plantations Labor Act, Beedi and Cigar Workers Act, leh Motor Transport Workers Act hnuaia mi te pawh a huam tel.He notification dodalna chu thehluh a ni ta a. Petition hi Bangalore-a hotel-te leh AFL Connectivity Systems Ltd. te’n an thehlut a. An Petition-ah chuan Notification tihchhuah hi labor law engmahah tarlan anih loh thu an sawi a. Dan awmsa chuan hnathawh dan tur, chawlh, hnathawh hun chhung, kar tin chawlh leh a dangte a huam a. Model Standing Orders (Clauses 9 & 10) chuan chawlh neih dan bik leh ni 10 chhunga casual leave neih dan nen a sawi. Menstrual leave atan hian dan anga ruahmanna a awm loh avangin sorkar chuan executive order hmangin a dah thei lo, tiin an sawi. Sorkarin he notification an pek chhuah hi an thuneihna piah lam a nih mai bakah dan kalh a ni a, Article 14 (equality) a bawhchhiat thu an sawi a. Menstrual leave chu employers’ HR policy-ah dah tur a ni, tiin thubuai thehluttute hian an sawi.Thubuai ngaihtuahna chungchang:Ni 9, December 2025 khan Justice Jyoti M chuan an thupek chhuah chu stay order a pe rih a. Hun eng nge maw tih hnuah chuan stay order chuan Supreme Court thutlukna a bawhchhia a ni, tiin Advocate General (AG) chuan a sawi a. AG Shashi Kiran Shetty chuan interim relief chungchangah court-ah amah ngeiin thu a sawi dawn tih a sawi.Ni 10, December, 2025 khan thubuai ngaihtuah a ni a. Sorkar lam chuan Notification hi sector zawng zawngah hman theih a nih thu an sawi a. India Danpui Article 42 (mihring hnathawh dan) leh 15(3) (hmeichhia tana venhimna bik) in an thlawp thu an sawi a. Khawvel pum huapa hmasawnna kal zel rual a ke penna a nih thu leh Law Commission chuan he thu hi zirchiangin, a fawng vuantu hrang hrangte chu rawn an nih thu an sawi. “A kimchangin kan kalpui ang,” tiin AG chuan a sawi. Thubuai thehluttute chuan sawrkar thuneihna chu an dodal lo va, hmantir an tum dan chu an dodal zawk thu an sawi a. Menstrual leave chu dan behchhan nei a siam a nih loh chuan hman ngei ngei theih a nih loh thu an sawi. Sawrkar-in menstrual leave policy chungchanga a sawi: • Menstrual leave hi hmeichhiate’n an hnathawhna hmuna thlawpna tha tak an neih theih nan te, mi zawng zawng huapzo, leh intluktlanna tha tak a awm nana siam a ni. • Hmeichhiate thla tin thi neih laia an hriselna lama harsatna an tawh loh nan. • Thi neih chungchanga thlir dan dik lo tihziaawmna tur te, hriselna tihhmasawnna tur te, hmeichhiate chu zahawm taka hnathawh leh tha taka an zir theih nan te. • Policy hi khawvel huap zo leh hun rei tak chhunga thi neih chawlh nei ramte nen a ruala hmasawnna ni.Sorkar chuan Article 14, 15(3), 21 leh 42 in he hriattirna hi a thlawp thu an sawi a. He policy hi dan tha tak a nih thu a sawi a, chutianga hriselna leh thatna tura kaihhruaina siam chuan dan hran a mamawh lo niin an sawi. Policy siam dan chungchangah chuan technical expert-te rawn hnua siam a nih thu leh mipui ngaihdan, dodalna, leh a fawng vuantute inrawnkhawm hnu a siam a nih thu an sawi. State chuan India Danpui nen a inkalh loh thu leh a hman theih thu an sawi(www.jclalnunsanga.in)(He thubuai Bangalore Hotels Association (R) vs State of Karnataka WP 36659/2025 c/w WP 37122/2025 ah hian thubuai thehluttu tan Adv. Prashanth B. K. a ding a, a leh lam tan AG Shashi Kiran Shetty & AAG Prathima Honnapura te an ding)

Naupang Kut Vawn Sak A, Hursualna Kawnga Awmpui Tum Vanga Pawisa Pek Chu POCSO Act hnuaiah ‘Sexual Assault’ A Ni: Bombay High Court

09/12/2025
Admin

Ni 4, November 2025 khan Bombay High Court (Nagpur Bench), Justice Nivedita P Mehta chuan hmeichhe naupang kum tlinglo kuta kaih a, hursualna kaihhnawiha awmpui tum vanga pawisa a pek chu Section 7 POCSO Act hnuaia ‘Sexual Assault’ a nih thu leh Section 8 hnuaiah hrem theih a nih thu a sawi. Justice Nivedita P Mehta chuan mipa kum 25 mi appeal thehluh chu a hnawl sak a, thiamloh an chantirna chu pawmpuiin, a pawikhawih a len em avangin probation a dilna chu a hnawl sak bawk.Thubuai chungchang:Kum 2015 October thla khan he thubuaia pawikhawihtu hian a tuartu hmeichhe naupang kum 13 mi chu hursualna kaihhnawihah vawihnih lai a nu leh pa te awm loh hlanin a thlem a. A vawikhatnaah chuan hmeichhe naupang hnenah chuan tui in tur dilin, Rs. 50 pek a tum a, mutpui turin a sawm bawk a. A vawihnihnaah chuan mutpui tura sawm lehin a kutah a vawn sak a. Hmeichhe naupang chuan a kut chu paihthlak sakin midang hnenah a hrilh ta a, Section 354 leh 354-A leh Section 8 POCSO Act hnuaiah FIR ziahluh a ni ta a ni.Kum 2019 khan Additional Sessions Judge-2, Yavatmal chuan kum 3 chhung lungin tang turin thutlukna a lo siam tawh a. Trial Court-in thiamloh an chantirna hi Bomaby High Court-ah a appeal leh ta a ni. A ukil chuan prosecution lam hian kut a vawn sak nachhan chu mipat hmeichhiatna hmanpui tumna vang a ni tih an finfiahthei lova, chuvangin Section 8 POCSO Act chu a din chan theihloh thu an sawi a. Kut invawn sak ringawt chu POCSO Act hnuaia dan kalh a chetna anih loh thu an sawi.High Court thutluknaJustice Nivedita P Mehta chuan hmeichhe naupang kumtling lo kuta kaih a, hursualna kaihhnawiha awmpui tum vanga pawisa a pek chu Section 7 POCSO Act hnuaia ‘Sexual Assault’ chhungah a awm thu a sawi a. Pawikhawihtuin hmeichhe naupang kut a vawn a, mipat hmeichhiatna hmanpui tumna a neih khan Section 7 leh 8 POCSO Act hnuaiah dan kalha a chet thu a sawi a. Judge chuan POCSO Act hi naupangte hursualna kawnga venhim an nih theih nan a dan siam a ni a, hei hian kawng tinreng a venhimna a kawk a, tumna ringawt emaw chetziaa thlemna emaw pawh a kawh tel thu a sawi a. Trial court-in a kum 3 chhung lungin tang tur a a lo tih tawh chu a pawmpui a, probation neih pawh a phal sak ta lo a ni. Court chuan pawikhawihna tuartu thusawi pawimawhzia sawiin, he thubuai a hmeichhe naupang kum 13 mi thusawi chu a chiang a, a ngai reng a, a dik bawk thu sawiin, a rilru puakchhuak sawi ve mai mai anih loh zia a sawi a ni. Court chuan Section 354 leh 354-A IPC hnuaiah pawh hrem theih anih thu a sawi bawk. ( He thubuai Sheikh Rafique Sk. Gulab vs State of Maharashtra ah hian thubuai thehluttu tan Advocate Shyam R. Jaiswal a ding a, a leh lam tan Additional Public Prosecutor Amit Chutke a ding)

DISCLAIMER