November ni 3,2025-a Chief Justice (Gauhati High Court) Ashutosh Kumar leh Justice Michael Zothankhuma te ṭhutna bench-in thu a lo pek tawh angin, Sawrkar chuan Lengpui Airport siam ṭhat leh tihchangtlun hna thawh mek chungchangah November ni 7 khan report a theh lut a. Report chuan “Improvement/Upgradation of Operational and Non-Operational Facilities of Lengpui Airport (Renovation of Terminal Building)” Project-a November ni 1, 2025-a an hmalakna chin a tarlang a ni. 

Affidavit-a tarlan danin, siam ṭhat hna thawh tur tam tak chu zawh fel a ni tawh a. A chhawng khatna chu 5,167.35 sq. m. a zau niin structural, flooring, ceiling, partition, plumbing, leh a dangte chu tihfel vek a ni tawh a. Chutiang bawkin, ground floor chu 4468.99 sq. m.-a zau a ni a, check-in area 540 sq.m a zau tih loh chu khawih fel vek a ni tawh a ni. Hna hmabak hi check-in area chei thar leh toilet block thar siam a ni a. Amaherawhchu, check-in counter hi first floor-a an hmun ruat thara sawn a nih hma loh chuan khawih ṭan theih a ni rih lo, an ti a ni. Heng hna la awmte hi tihfel a nih theih nan thla thum vel a ngai dawn niin an chhut a. Sawrkar chuan February ni 28, 2026 hmain project pumpui hi zawh fel a nih theih an beisei a ni. 

KR Construction lam pawhin, Court-in a hna thawh chin affidavit hmanga sawifiah tura a tih angin March, 2025 aṭangin Department lamin an thawh tawh thu a sawi.

July ni 3, 2025-a Court-in thu a lo chhuah tawh angin, respondent no. 6 (second contractor) hnenah court-a insawifiah tura notice pek tawh ni mah se, court hmaah a la inlan lo va. Court chuan a lungawi lohna lan tirin contractor lakah warrant of arrest (bailable) thu a chhuah hmanga court lehah chuan inlan ngei turin a hriattir. He thubuai hi November ni 18,2025-ah ngaihtuah leh turin ruat a ni a.

Lengpui Airport chei ṭhat nan hian  Sawrkarin Rs 19,58,99,822/- a dah a. Airport hi chei ṭhat a nih mek laiin ni 10 March, 2022 khan a slab a chim a. A satuten an hna an thawk ṭha tawk lo tiin High Court-in Airport chei hna hi vil zui se tiin Pi Vanramchhuangi hian PIL hi High Court-ah ni 12.7.2022 khan a pu lut a ni. 

Meghalaya High Court lamah pawh an Airport (Umroi) chungchangah PIL 4 of 2021 a kal ve mek a. Tun hnaia Court hearing an neihah Rs 600/- Crore vel Umroi Airport zauh nan ruahman a nih thu Court hi hriattir a ni. Guwahti Airport pawh Rs 2,000/- Crore hmanga terminal thar siam a ni. (www.jclalnunsanga.in).

(He thubuai PIL No. 8 of 2022, Vanramchhuangi Vs State of Mizoram & Ors-ah hian thubuai thehluttu tan Joseph Lalchhanhima Renthlei a ding a. Sawrkar tan Mary L. Khiangte dingin, M/s KR Construction Firm tan hian JC Lalnunsanga a ding a ni).