High Court

Thing Zar Tlain Tlak Vanga Zeng Court-in Rs.2.77 crore Zangnadawmna Pe Turin Hriattir

30/09/2026
Admin

Karnataka High Court chuan Greater Bengaluru Authority (GBA) te chu Bengaluru-a mi pakhat, thing zar tla-in a tlak hnua zeng hlen ta chu Rs. 2.77 crore zangnadawmna pe turin a hriattir. He thil hi March 7, 2024 a thleng a ni a, a hnathawhna lam pana a kal laiin Good Shepherd Convent School huamchhunga thing zar chuan a tlak a. Justice Suraj Govindaraj chuan thing chu mimal ram hmuna ding ni mah se, thing zar tla mai thei leh hlauhawm chunga hmalak chu thuneitute mawhphurhna a ni a ti.Thingzarin a tlak avang hian spinal injury nasa tak tuarin, a taksa 85% chu a zeng a. Court chuan hun lo la awm tura a sum lakluh tur a hloh nena ngaihtuahin, a zeng chu 100% angin an chhut a. Damdawi man, a in enkawlna tur, hun lo la kal zel tura a mamawh tur, hna thawh theih loh avanga sum hloh, na leh hrehawm tuar man te telin, zangnadawmna chu Rs. 2.82 crore ni turin a chhut a. BBMP-in Rs. 5 lakh an pek tawh chu paihin, kar 12 chhungin kum tina 6% a pung awmin Rs. 2.77 crore pe turin Court chuan thu a pe ta a ni.Court chuan State sorkar chumipuite himna turin, mipuite tana hlauhawm awm thei te hriat chhuah a, enkawl zui dan tur system siam turin a hriattir bawk. Thing hlauhawmte, kawng khuar te, luikawr khuhna inkhar lo te, wire lawng lang leh mipui chetvelna hmun chhia te hriat chhuah nan camera, vehicle-mounted system leh Artificial Intelligence (AI) te hman theih a ni tiin a sawi a. Mipui tana hlauhawm thei te hi hriat chhuah a nih a, report a nih veleh record a ni anga, endik a ni ang a, mipui tana a him hma chu a enkawltu tur a thuneitu kuta dah a ni bawk ang. He system hi a hmasa berin Bengaluru-ah hman a ni ang a, hemi atan hna thawh tur ang te chu thla ruk chhungin zawh fel tur a ni tiin Court chuan a sawi a ni(www.jclalnunsanga.in)( He thubuai hi Chandan G vs. State of Karnataka & 3 others a ni)

High Court chuan Meth 4.3 kg man sak avanga Special Court, Champhai in thiam loh a chantirna chu Forensic lama sample finfiah danah rinhlelhna a awm avangin thiam chan tir.

30/09/2026
Admin

Vawiin khan Justice Sanjeev Kumar Sharma, Gauhati High Court chuan Abdul Mukit, methamphetamine 4.3 kg man sak avanga Special Court, Champhai in thiam loh a chantirna chu a Forensic lama sample finfiah danah rinhlelhna a awm avangin thiam chan tir a ni.He case hi February 22, 2021 khan Champhai-Zokhawthar road-a Hringlangtlang Junction-ah police ten random checking an neih laia Alto car pakhat an check avanga dam dawi an man chhuah chungchang a ni. Car chhunga polythene dum pakhatah chhungah methamphetamine kilogram 4.372 vel a rit an man a. He thil man hi local market-ah ₹1.2 crore velah an chhut a ni.High Court hian thiam a chantir chhan ber chu chu dam dawi man te Forensic a thawn dawn a dah that loh avang a ni. Damdawi mantu chuan damdawi-te chu Champhai Police Station Officer-in-Charge hnenah a hlan thu a sawi mahse, prosecution chuan malkhana register emaw receipt emaw, seized articles-te malkhana-ah an dah ngei tih finfiahna chu Court-ah an ti chiang lo. High Court chuan, seized articles-te chu O.C. hnenah hlan a nih thu chauh hmanga NDPS Act hnuai a hrem chu a dik lo a ti a. Damdawi man-te chu Magistrate hmaah a thlen hma zawkah engtiangin nge safe custody-ah dah an nih tih finfiahna pawh a awm lo.High Court chuan damdawi man sample-te chu February 23, 2021-ah Magistrate hmaah lak, pack leh seal niin, FSL chuan March 1, 2021-ah a dawng tih a sawi. Heng ni 7 (sarih) chhunga sample-te chu tu kutah nge awm tih leh engtiangin nge safe custody-ah dah an nih tih prosecution witness-in an sawi chiang lo. Magistrate-in sample-te chu seal-in a rawn thlen tih a certify mahse, sample-te chu ama hmaah seal an nih tih chiang taka a certify lo a ti.High Court chuan, FSL-in sample-te chu sealed condition-in a dawng a, seal chu sample seal nen a inang tih report a awm mahse, sample-te safe custody-a an awm dan chungchangah evidence tha a awm loh chuan seal chu an inthlak emaw an rawn tihdanglam emaw theihna a awm tih a sawi.High Court chuan damdawi man chu Magistrate hmaah thlen leh FSL-a sample test a nih thlengin, tih danglam a a ni lo tih finfiahna record fel tak a awm ngaih thu a sawi. a nih thu a sawi. High Court chuan Supreme Court in a sawi angin FSL report chu pawm tlak tur chuan damdawi man an lak atanga atanga FSL-ah an thlen thlengin thil thlen dan in dawt fel tak leh sample pack chhin chhiah that a finfiah a ngaih thu a sawi.He case-ah chuan sample-te FSL-ah tu nge thawn tih pawh chiang taka sawina witness a awm lo. Chuvangin prosecution chuan damdawi man leh FSL sample-te inlaichinna fiahna a awm loh avangin Abdul Mukit, methamphetamine 4.3 kg man sak chu thiam chan tir a ni.(He case Criminal Appeal No. 7 of 2026, Abdul Mukit v. State of Mizoram & Anr ah hian Mukit tan S Vanlalhriata a ding a, sawrkar tan Mary Lalruatkimi a ding)

Gauhati High Court-ah Bualpui H Ram Compensation Thubuai Ngaihtuah A Ni

24/09/2026
Admin

Gauhati High Court, Aizawl Bench chuan ni 21 September, 2026 khan Bualpui H Village Council leh ram neitu mi 139 te’n an ram compensation chungchanga an thubuai thehluh thar chu a ngaihtuah a. He thubuai hi Justice Mridul Kumar Kalita chuan a ngaihtuah a. Thubuai thehluttute chuan kawng laihna atanga compensation chu an hmu tawh a, nimahsela, Right to Fair Compensation and Transparency in Land Acquisition Act, 2013 hnuaia an dawn zat tur dik tak 100% solatium leh 12% interest pek tur chu pek an la nih loh thu tih an thlen a. Hemi chungchangah hian state sorkar leh sorkar laipui tana inlan ukil te chuan thurawn lak nan hun an dil a. An dilna hi Court chuan pawmsakin, he thubuai hi 6th October, 2026-a ngaihtuah leh atan dah a ni.He thubuai hi Thingsai-Bualpui H-Saisih-Pangkhua inkar kawng laih tur atana ram lakna atanga intan a ni a. He kawng laih hna hi Ministry of Defence hnuaia 74 Road Construction Company (GREF) te’n an thawk a. Ram neitute hian compensation an dawng tawh nangin, High Court-ah hian an compensation dawn dan chu an khing let a. Ram man chhut dan hi Mizoram Land Acquisition Act, 2016 hmanga chhut a ni a; nimahsela, ram neitute tana hlawkna tha zawk pe theitu Right to Fair Compensation and Transparency in Land Acquisition Act, 2013 (2013 Act) hmanga chhut tur a ni zawk e tiin an thlen a ni.Ni 21 November 2024 khan hetiang ang thubuaiah hian Justice Nelson Sailo kaihhruai Bench chuan Mizorama ram lakna chu 2013 Act zui tur a ni tiin thutlukna a lo siam tawh a. Court chuan District Collector chu compensation chu chhut tha leh turin a ti a, pawisa pek tawh sa paih hnuah 100% solatium, interest, leh dan in a phût anga a ngai dangte chu telh turin a hriattir a ni. He thutlukna hian thuneitute chu 2013 Act anga hmalakna nei tur leh compensation an dawn theih zat chu chhut tha leh turin a lo ti tawh bawk a ni.Tin, ni 25 November 2024 khan Gauhati High Court chuan hetiang tho Bualpui H kawng laih kaihnawih compensation thubuai dangah pawh thutlukna inang chiah hi a lo siam bawk. Court chuan an thubuai leh an thu thlen te chu a inang vek thu sawiin, thutlukna hmasa zawk chu zawm turin a lo hriattir tawh bawk.Tun tum a Bualpui H-in compensation thubuai an lo thehluh thar lehah pawh hian ram neitute chuan, kawng laihna atana an ram an lakna compensation chu chhut that a nih hnuah pawh 100% solatium leh 12% interest an la dawn loh thu an sawi a, chu vang chuan compensation atanga an pawisa dawn tur an la hmuh loh te chu an dawn theih nan High Court-ah thubuai hi an thehlut leh ta a ni(www.jclalnunsanga.in)(He thubuai hi Village Council, R/b its President Sh. MC Lallawmawma and 139 Ors. Vs State of Mizoram & 6 ors WP(C)/126/2026 a ni. Bualpui H ram neitute leh VC tan hian Senior Advocate F. Lalengliana, Advocate Lalruatfela Chawngthu leh ukil dangte an ding a, Mizoram sorkar tan Government Advocate Vanneihsiami a ding a, Sorkar laipui tan Central Government Counsel Zairemsangpuii a ding)

Karnataka Sorkar-in ‘Vande Mataram’ Chang Hnih Chiah Sa Tura Thupek A Chhuah Dodalna Thubuai Karnataka High Court-in Ngaihtuah

24/09/2026
Admin

Karnataka High Court chuan ni 22 September, 2026 khan Karnataka sorkar-in 'Vande Mataram' chang hnih chiah sa tur a thupek a lo chhuah tawh dodalna thubuai chu a ngaihtuah a. He thubuaiah hian Karnataka Sorkar thupek, sorkar pisa leh hna thawhnaah, President, Vice-President, Prime Minister emaw Governor an tel loh chuan ‘Vande Mataram’ hi a chang hmasa ber pahnih chauh sak tur a ni tih thuchhuah chu an khinglet a. He thubuaia an thu thlen te ngaihtuah a nih hnu hian, Supreme Court-ah hetiang tho thubuai a la awm avangin, thutlukna tawp siam mai lovin, Supreme Court thurel nghah phawt Court chuan a tum a ni. Thubuai thehluttu erawh hi chuan Sorkar thupek hi a dodal a, Central Sorkar chuan Vande Mataram chang ruk chu National song anga a pawm laiin, Karnataka Sorkarin chang hmasa ber hnih chauh sa tura thu chhuah a siam chu a dik loh thu a thlen a. National song chu sorkar laipui remruatna chauhva kalpui tur a ni a, State hrang hrangin an duh dan anga an kalpui chuan ram pumah buaina a thlen thei a ni tiin a sawi. Centre lam pawhin he ngaihdan hi thlawpin, kum 2026 July thlaa an thupek chu State zawng zawng tan zawm tur a nih thu leh hun bikah chuan chang ruk a sak tur a nih thu a sawi a. Karnataka Sorkar chuan National Anthem ang lo takin, Vande Mataram sak hi a danin a phût lo tih an sawi bawk. High Court chuan tu zawk nge dik tih chu a rel lo va. Supreme Court-in he thubuai an ngaihtuah huna an thu kalpui dan chu an High Court hian a nghak hrih phawt dawn a ni. Vande Mataram sak chungchanga Supreme Court-in thubuai a ngaihtuahnaah chuan National song chu eng nge a nih tih chu Court ngaihtuah tur a ni lo tih an lo sawi tawh a, nimahsela, Vande Mataram sakhaw thil avanga duh lotute chu thubuai leh hremna hmachhawn tir lo turin an beisei thu an lo sawi tawh a. He thubuai ngaihtuah leh hun atan hian 15th October 2026 chu an dah bawk(www.jclalnunsanga.in) (He thubuai hi Girish Bharadwaj v/s State of Karnataka & Ors. WP 29423 of 2026 a ni)

Delhi High Court-in Social Media App-a Addict Theihna Tur Thil Awmte Thunun Turin Policy Siam An Tum Em Tih Central Sorkar A Zawt

18/09/2026
Admin

Delhi High Court chuan Social Media app hrang hrang addict theihna tur a thil awmte thunun turin policy siam an tum em tih Central sorkar chu a zawt a. Social media platform hrang hrang a tawp chin nei lova scroll zel theihna te, autoplay ang chi te leh mi chelhbet tlat theitu features hrang hrang te khuahkhirhna dan siam a tum em tiin a zawt a ni.He thubuai hi law professor, Vikas Kathuria petition thehluh, public interest litigation (PIL) a ni a. Petition-ah hian social media app-te chu mi hip beh nan leh a bik takin tleirawl leh thalaite darkar tam tak hip bet tura duan an nih thu a sawi a. Personalized feed leh notification thleng reng thei te chuan social media-a hun tam zawk hmang turin min hip bet awlsam em em a ni, a ti a. Thubuai thehluttu chuan kum 18 leh 24 inkar thalaite chuan social media-ah ni tin darkar tam tak hun an hmang thin a, chu chuan tleirawl te zingah depression leh mahni intihhlum duhna a thlen nasat thu a thlen bawk.Thubuai thehluttu hian Court chu central sorkar leh National Commission for Protection of Child Rights te hnena social media min ti addict theitu hrang hrang - tawp chin nei lova scroll char char theihna te, autoplay te, mimal mil zawng zawng post hrang hrang insiamrem thin te leh notification thleng reng thin chungchangah te chuan khuahkhirhna dan siam tur a ti turin a ngen a. Addl Solicitor General Chetan Sharma chuan hetiang thil chungchangah hian sorkarin policy duan a tum em tih chu a la hriat loh thu a sawi a, court chuan thuneitute rawn a, chhanna pe leh turin kar thum hun a pe a ni(www.jclalnunsanga.in)

Tripura High Court-in Police Station-a CCTV Enkawl Zui Turin Officer-in-Charge Te A Ruat

18/09/2026
Admin

Tripura High Court chuan police station tin a CCTV camera-te tha taka a thawh a, a record te vawnhim a nih a, backup leh enkawl zui a nih theih nan police station-a Officer-in-Charge (OC) te chu mawhphurhna pein, enkawltu tur ni turin thupek a chhuah. Division bench, Chief Justice M.S. Ramachandra Rao leh Justice Biswajit Palit te chuan thubuai chhui chiannaah CCTV footage chu thil pawimawh tak a ni tih an sawi a. Camera vuah ringawt chu tawk lova hriain, mawhphurtu tur chiang taka ruahman a ngaih thu an sawi a. CCTV chu a los chhia a nih chuan OC chuan District Level Oversight Committee (DLOC) hnenah rang taka hriattirin, a siamthat hma chu an mi man te leh thu zawhfiahna zawng zawng record te chu a thehlut zel tur a ni tiin an sawi bawkHe thupek hi Ratna Roy-a thubuai thehluh an ngaihtuah hnu a an chhuah a ni a. Ratna Roy-a chuan a fapa Saikat Saha chu April ni 4-5, 2026 khan East Agartala Police Station-ah hruai phei a nih thu a sawi a, police station-ah chuan lainatna tel miah lova sawisak a ni tih a sawi a, hemi hnu hian Court chuan CCTV footage la khawmin SIT (Special Investigation Team) pawh a din a ni(www.jclalnunsanga.in)

DISCLAIMER