High Court

Delhi Excise Policy Thubuai Ngaihtuahtu Judge Inhnukdawk, Social Media-a Intihhmingchhiatna Avangin Contempt Case A Siam Dawn Tih A Sawi

14/05/2026
Admin

Vawiin ni 14 May, 2026 khan Delhi High Court Judge Justice Swarana Kanta Sharma chuan Excise Policy thubuaia Social Media-a an tihhmingchhiat chungchangah Contempt Case siam a tum thu a sawi a. Tin, Excise policy case judge atangin a inhnukdawk bawk. Justice Sharma hian Delhi excise policy thubuai-a AAP hruaitu Arvind Kejriwal leh Manish Sisodia te piah lamah, thubuaia inhnamhnawih mi 23-te thiamchantirna chungchanga CBI-in an khinletna chu a ngaihtuah a.Kejriwal, Sisodia leh thubuaia inhnamhnawih mi dangte chuan Justice Sharma hi he thubuai appeal hi ngaihtuahtu judge atanga inhnukdawk (recuse) turin an lo ngen tawh a. Nimahsela, judge hian April 20 khan an ngenna hi lo hnawlsakin, politician-te chu judiciary rinhlelhna siam phal sak an nih loh tur thu a lo sawi tawh a ni. Justice Sharma-in an dilna a hnawl hnu hian, appeal case a tel thenkhat zing a mi thenkhat chuan Justice Sharma hmaa thubuai ngaihtuahna chu boycott (tel loh) an tum ta a ni.Justice Sharma chuan he thubuai hi ka ngaihtuah chhunzawm zel anih chuan Arvind Kejriwal leh midangte hian amah huatna ka nei emawni an lo ti thei a, hemi avang hian he thubuai hi chu Bench dangin an ngaihtuah dawn a ni, tiin a sawi.He excise policy thubuai hi kum 2022 a, CBI-in Delhi Excise Policy 2021-22 chu zu zuartu hlawkna tura thlak danglam a ni tiha FIR an ziah luh atanga intan a ni a. CBI chuan AAP hruaitute hian policy siamremna kaltlangin thamna (kickbacks) an dawng ngei tih a sawi a. Enforcement Directorate (ED) pawhin he thila sum thianghlim lo hman (money laundering) thubuai a file zui bawk. Kumin February thla khan trial court chuan he thubuaia a case neite zawng zawng hi a lo chhuah zalen tawh a, mahse CBI chuan he thutlukna hi Delhi High Court-ah a khing let (appeal) leh a ni(www.jclalnunsanga.in)

Bar Council of India Chuan Mamata Banerjee Ukil Thuam Haa Calcutta High Court-a A Inlan Chungchangah West Bengal Bar Council Hnenah Sawifiahna Pe Turin Lehkha A Thawn

14/05/2026
Admin

Vawiin ni 14 May, 2026 khan West Bengal Chief Minister hlui, Mamata Banerjee chu Calcutta High Court-a ukil thuam haa a inlan chungchangah Bar Council of India (BCI) chuan Bar Council of West Bengal hnenah lehkha a thawn a. He lehkhathawnah hian Bar Council-a Mamata Banerjee-i hming ziahluh (enrolment) leh ukil hna a thawh dante chipchiar taka pe turin a ngen a ni.BCI chuan Banerjee-i hian kum 2011 atanga 2026 thleng khan West Bengal Chief Minister hna a lo thawk tawh tih a tarlang a. BCI hian Banerjee-i Chief Minister a nih chhung khan ukil hna a thawh rih loh tur thu (voluntarily suspending or stopping) Bar Council a hriattir leh hriattir loh chungchang hriat a duh bawk. Hemi hnu hian ukil hna thawh leh phalna dilna a thehlut leh em, a dilna chu pawmsak a ni em tih te a zawt bawk a ni.Court-a a inlan kha dan anga phalsak a nih leh nih loh chungchangah ngaihdan engmah siam rih lo mah se, Council chuan a hming ziahluhna leh ukil hna thawh theihna dikna a neih dante tihchian phawt a duh thu an sawi a ni.Council chuan Banerjee-i hnenah hian ukil hna thawh phalna (certificate of practice) pek a nih leh nih loh tarlang tur leh, chu chu tunah hian a la nung em, nge tihtawp rih a ni zawk tih te hriat a duh bawk a.State Bar Council hi ni hnih chhunga an thil dilte thehlut tur hian hriattir an ni a, May 16 hma ngeia thehluh tur a ni.Banerjee hi tun hnaiah Supreme Court a ukil anga in thuamin a case ah thu tlem a sawi ve. Media te ngaihven a hlawh hle. Tun hma in ukil hna a thawh hriat a ni lo a, hetia tun hnaia ukil anga a awm hi BCI chuan a ngai thu tak hle a ni.(www.jclalnunsanga.in)

Delhi High Court Chuan India Rama FIFA World Cup 2026 En A Nih Theih Nana Ngenna Thehluh A Ngaihtuah

13/05/2026
Admin

Ni 12, May, 2026 khan Delhi High Court chuan Prasar Bharati kaltlanga India rama FIFA World Cup 2026 en a nih theih nana petition thehluh chungchangah notice a chhuah a. Justice Purushaindra Kumar Kaurav chuan Central Government leh Prasar Bharati-te chu hemi chungchangah hian chhanna pe turin hriattirna a pe a.Hemi chungchang hi May 20-a ngaihtuah leh turin Court chuan a dah a ni.He ngenna hi ukil Avdhesh Bairwa-a thehluh a ni a, senior advocate Vaibhav Gaggar leh advocate Ankit Konwar-te an dinsak. Ngenna thehluttu chuan thuneituten he inkhelha opening match, quarter-finals, semi-finals, leh final-te hi man chawi kher loa en a nih theih nan Court chu thu pe turin a ngen a. Tin, FIFA World Cup 2026-a inkhel vawi 104 awm zawng zawngte pawh en a nih theihna tur telecast rights ngaihtuah turin a ngen bawk. He inkhel hi June 11 atanga July 19, 2026 chhunga neih tur a ni a, United States, Canada, leh Mexico-ten an thleng dawn a ni.Petitioner chuan kum 1998 atang khan India-ah FIFA World Cup chhuahtu an awm ziah thin thu leh, kuminah erawh media rights la tu tur an la awm lo tih a tarlang a. India chu FIFA en tamna ber pawl a nih thu leh, kum 2022 World Cup liam taah khan mi maktaduai 745.7 chuangin an en thu a sawi bawk. Ngennaah hian Court-in hmanhmawh taka hma a lak loh chuan, India rama en duh mi maktaduai tam takten he infiamna ropui en theihna dikna (fundamental right) an chan dawn a ni tih a tarlang bawk a ni(www.jclalnunsanga.in)

High Court-in Tender Lak Dan Dik Lo Chungchanga PIL Thehluh a Ngaihtuah

08/05/2026
Admin

April ni 29, 2026 khan High court chuan State sawrkarin tender lak leh hna thawh tur a kalpui dan chungchanga thil dik lo tarlanna hrang hrang PIL chu a ngaihtuah a . He thubuai hian tender bid hmaa "duh duh thlan bikna"(pick and choose)chu state sawrkar hian a kalpui thu a tarlang a ni .Thubuai thehluttu sawi danin, Finance Department-in July ni 15,2024-a a thuchhuah hian sawrkar tender reng rengah hna chhut chhuah sa (estimated cost) atanga 5% aia tlawma bid a khap tlat a. Entirna pein hna pakhat hlutna chu Cheng 100 crore ni ta se, tender thehluttute chuan Cheng 95 crore aia tlawmin an bid thei tawh lo a ti a ni. Thubuai thehluttu chuan he khuahkhirhna hi thil dik lo tak a nih thu sawiin, a tlangpuiin, tender-ah hian inelna thianghlim a awm theih nan contractor-te hian hna chhut chhuah sa atanga 10%, 20%, emaw 30% in an bid thin a. Amaherawhchu, 5% aia tlawm theih loh tih a nih takah chuan inelna tak tak a awm thei tawh lo a, man tlawm zawk thlan tur a awm thei tawh lo phah a ni.Sawrkar hian 5% lower cap chhunga tender thehluttute zingah hian, thuneituten an duh duh an thlang thei nia hriat a ni a. Thubuai thehluttu chuan hetianga thlan chhuah dan turah hian "duh thlan bik" (pick and choose) kalpui a ni a ti a ni.High Court chuan notice chhuahin, interim relief chungchangah erawh kar hnih hnua ngaihtuah leh turin a ruat a ni.(www.jclalnunsanga.in)

Gauhati High Court Chuan Assam Rifles Hmun Hluia Thingkung Kih Chungchanga PIL A Ngaihtuah

24/04/2026
Admin

Ni 20 April, 2026 khan Gauhati High Court chuan Bazar Bungkawn atanga Treasury Square inkar kawng meter 14-a tih zau tumna avanga Assam Rifles hmun hlui a thing lian leh upa tak tak kih thluk tum chungchanga PIL chu a ngaihtuah a. Gauhati High Court tana ding Senior Counsel, TJ Mahanta leh Mizoram Additional Advocate General, P Bhattacharyya-te hnen atanga thupawimawhte a ngaihthlak hnuin, Court chuan he thil a mawhphurtu (respondents) hnenah notice a chhuah a. Thutlukna siam hma atana hmalak lawkna atan, Court chuan thutlukna dang a siam hma chu Mizoram sorkar chu he lai hmuna thingte hi kih chhunzawm lo turin thupek a chhuah nghal bawk a. He thubuai hi Division Bench, Justice Michael Zothankhuma leh Justice Kaushik Goswami-te’n an ngaihtuah a. Thubuai ngaihtuah leh hun chu May 18, 2026-ah an ruat nghal bawk.He hmalakna hi environmental activist Saizampuii Sailo-in Centre for Environment and Social Justice (CESJ) aiawha March 25, 2026-a ziaka thu a thehlut atanga intan a ni a. Saizampuii chuan Mizoram sorkarin thing 174 vel kih a tum thu leh, heng thingte hi khawpui tana boruak thianghlim petu pawimawh tak an nih thu a tarlang a. Aizawl khawpui chu in leh building-in a khat tawh hle a, heng thingte kih thluk hian kan chhehvel boruak a tichhe zual dawn hle a ni tih a tarlang bawk.Court chuan April 2026-a The Times of India, The Assam Tribune, leh Aizawl Post-a chanchin thar lo chhuahte pawh a ngaihtuah tel a. Heng chanchinbu-ah hian he lai hmunah hian thing 400 chuang a awm thu leh, chung zinga 174 chu kih thluk tura chhinchhiah an nih thu ziah a ni. Heng thing zinga thenkhat hi kum 100 zeta upa an ni tawh a, thing pakhat phei chu kum 1850-a phun tawh kha a ni nghe nghe. Court chuan helai hmunah hian kum 1897-a sak tawh ‘heritage site’ chhiar theih ‘barrack’ a awm bawk tih a sawi.(www.jclalnunsanga.in)(He thubuai PIL(Suo Moto)/1/2026 XXX vs In Re The State of Mizoram & 4 Ors Rep by the Chief Secretary, Mizoram Secretariat ah hian petitioner tan TJ Mahanta, SC, GHC a ding)

Gauhati High Court chuan vawiin khan Mizo ukil pathumte Senior Advocate designation a pe.

24/04/2026
Admin

Gauhati High Court chuan vawiin 24.14.2026 khan Mizo ukil pathumte Senior Advocate designation a pe. Heng Senior Advocate designation a pekte hi Pi Dinary T Azyu, Pu C Zoramchhana leh Pu F Lalengliana te an ni.Pi Dinary T Azyu hun rei tak High Court a sawrkar ukil lo ni tawh thin , private practice thlang ta zawk a ni a. All Mizoram Women Federation a Secretary ni lai niin Mizo hmeichhe zinga Senior Advocate Designation nei hmasa ber a ni. A pa Pu A Zakia (L) pawh hi Padma Shri leh National Teacher Award lo dawng tawh a ni.Pu C Zoramchhana hi MNF sawrkar laia Addl Advocate General ni thin kha niin tunah hian NIA, NIT, MRB, NCB ah Standing Counsel ni lai mek a ni. Pu F Lalengliana hi experience tha tak nei niin an kohhran Seven day a rawngbawlna a nasa taka in hmang thin mi a ni a. Mizo Adventist Choir Conductor leh hlaphuah thiam lar tak niin HDFC Bank, Bank of Baroda leh Indusind Bank tan a ding a ni.India-a Senior Advocate hi ukil chhuanawm, Supreme Court emaw High Court emawin an thiamna, an hmingthanna, leh dan hriatna thuk tak an neih avanga an title pek te an ni. Senior Advocate-te hi zah an kaiin an thusawite pawh hi judge te hian an ngai pawimawh thin. Court a an din pawhin ukil pakhatin a dinpui ve zel tur a ni. An gown hakte pawh hi ukil dangte hak loh ang an ha thin. Ukil rawihna lehkha vakalatnama an ziak/file ve a ngai lo a. Amaherawh chu client te direct in an kawm ve phalsak an ni lo a. Drafting an tih ve a thiang lo bawk.Tun dinhmunah hian ani pathum bakah hian mizo zingah Pu RC Thanga, Pu LH Lianhrima leh Pu C Lalramzauva te kan neih mek te an ni.

DISCLAIMER