High Court

In Chhunga Tawngtai Inkhawm Neih Khapna Dan A Awm Lo, Thuneitute Phalna Lak Pawh A Ngai Lo: Chhattisgarh High Court

01/04/2026
Admin

Chhattisgarh High Court chuan ni 24 March, 2026 khan mi mal in chhunga ṭawngṭai inkhawm neih khapna dan a awm lo tih a sawi a. Court chuan hetiang inkhawmna hi remna leh muanna hnuaia neih a nih a, dan kalh engmah a awm loh chuan thuneitute phalna lak hmasak a ngai lo tih a sawi bawk. Nimahsela, bengchheng leh mi tibuai thei emaw, dan leh hrai kalha thil tih a awm a nih erawh chuan thuneituten dan hmanlai mekte tlawhchhanin hma an la thei thung ang.He thubuai hi Godhna khua, Janjgir-Champa District-a ram nei tute’n an thehluh a ni a. Kum 2016 aṭang khan an chenna in chhunga hall-ah Kristian te hian tawngtai inkhawm hi an lo nei tawh ṭhin a. Harsatna engmah an siam ngai loh thu leh dan kalh thil engmah an tih ngai loh thu an sawi a; mahse, tualchhung police-te’n tawngtai inkhawm titawp tura hriattirna vawi tam pein, an tiduhdah nia tarlan a ni bawk. Petitioners-te sawi danin, Gram Panchayat-in “No Objection Certificate” (NOC) an lo pek tawh pawh hnuhdawh sak an nih thu an sawi bawk.Petitioners-te hian an ṭawngṭai inkhawm neih thin thlavang hauhsak tura Court an pan hnuah, Justice Naresh Kumar Chandravanshi chuan hetiang hian a sawi a ni:“Petitioners-te hi kum 2016 aṭanga an chenna in chhunga Kristian ṭawngṭai inkhawm an lo neih tawhna hmun neitute an ni a. Mi mal in chhunga ṭawngṭai inkhawm neih khapna dan engmah a awm lo a. Inkhawmnaah chu dan kalha thil tih engmah a awm loh chuan thuneitute phalna lak hmasak a ngai lo bawk. Inkhawm avanga bengchheng emaw, dan leh hrai kaihhnawih harsatna emaw a awm a nih erawh chuan thuneituten dan hmanlai mekte tlawhchhanin hma an la thei ang. Chuvangin, thuneitute leh police-te chu petitioners-te dikna (civil rights) tibuai lo tur leh, thil chhui anga langin emaw, chhuanlam dang siama tiduhdah lo turin hriattir an ni.”(www.jclalnunsanga.in)

Orthodox leh Jacobite buaina: Biak in laksak tura Sorkar thupek chu High Court-in a thiat

25/03/2026
Admin

Ni 24, March Kerala High Court chuan sakhaw thila inbeihna avanga sorkar thuneituten biak in an laksak tura thupek chu court-in a pe thei lo tih a nemnghet a. Justice Anil K. Narendran leh Justice Muralee Krishna S. te Division Bench chuan kum 2024-a Single Judge-in thupek a lo chhuah tawh chu an thiat a ni. Chu thupek hmasa chuan Ernakulam leh Palakkad District Collector-te chu Orthodox leh Jacobite pawl hnih inkara buaina awmna biak in parukte laksak turin a lo hriattir a. Court chuan chutiang thupek chu sakhaw thila sorkar thuneihna piah lam a nih thu a hrilhfiah a ni.Court hrilhfiahnaah chuan biak in chhunga inrelbawlna chungchang, a bik takin 1934 Constitution hnuaia awmte chu, sorkarin a kuta la loin dan ang zela chinfel tur a ni. Court thupek zawm lohna leh dan leh thupek thila harsatna a awm fo a nih pawhin, High Court chuan police-te hmanga venhimna pein muanna a thlen thei a; mahse, hei hian thuneituten biak in an enkawl thei tihna a ni lo a, inkhawm leh sakhaw thiltihte erawh mumal taka a kal theih nan hma an la thei a ni.Orthodox leh Jacobite pawl hnih inkara buaina hi kum 1910-a Malankara Church a inthenna atanga intan a ni a. Kum 2017 khan Supreme Court chuan K.S. Varghese case-ah inrelbawlna thuneihna chu Orthodox faction-te hnenah a lo pe tawh a ni. Chu mi hnuah, kum 2023 khan High Court chuan Orthodox member-te tana venhimna pe turin thu a lo chhuah leh a. He thupek hi zawm a nih loh avangin 'contempt petition' siam a ni a, biak in laksak tura thupek pawh hi a lo chhuah phah a ni; mahse, tunah hian chu thupek chu thiah a ni ta a ni(www.jclalnunsanga.in)

Zirlai Chu Attendance Leh Internal Test-a Tlak Chuan ‘Promote’ Theih A Ni Lo: Madhya Pradesh High Court

20/03/2026
Admin

Madhya Pradesh High Court chuan zirlaiten attendance (class kal ngai zat) leh internal assessment (class-a test neih)a an tlin loh chuan ‘promote’(pawl sawn) theih an ni lo tih thutlukna a siam a. Court chuan “Year Down” rule chu thlawpin, zirlai chu exam a dilna phalsak a nih avangin, attendance-a a tlin lohna kha a reh nghal tihna a ni lo tih a tarlang a. Justice Jai Kumar Pillai chuan zirna in dan leh hrai hi khauh taka zawm tur a ni a, Court-te pawhin an dan leh hrai te thlahdul tir turin a inrawlh tur a ni lo, a ti.He thubuaiah hian Symbiosis University of Applied Sciences-a zirlai pakhat chu attendance-a a tlin loh avangin leh unit test-a a tlak avanga “Year Down" category-a dah a ni a. He zirlai hian Court-in semester 3-na exam hmachhawn a phalsak tawh avangin, University chuan a result tichhuaka a zirna an chhunzawm tir tur a ni tiin a sawi a. University-in exam a hmachhawn tir khan promote a ni tawh ngei dawn tih rinna a siamsak niin a argument-ah hian a tarlang a ni.Court chuan heng a thil sawite hi a hnawlsak a, University thutlukna chu a thlawp tlat thung a ni. He zirlai hian attendance ngai zat chu 75% a nih lain, a attendance chu 30% pawh a tling lo va, internal assessment a pawh a nei zo lo bawk a ni. Court chuan attendance leh internal assessment test te chu thil hran anih thu an sawi a, a pawimawh ve ve thu leh, exam result nen a in an loh thu an sawi a ni. Exam lailawk phalna hian zirnaa a hlawhtlin lohna a thaibo loh thu an sawi a. Thiltih dik loh engmah a awm loh avangin Court chuan he dilna hi a hnawlsak a, Article 226 hnuaiah tanpuina pek theih a nih loh thu a tarchhuak ta a ni(www.jclalnunsanga.in)(He thubuai Parth Singh Rajawat vs State of Madhya Pradesh & Ors ah hian thubuai thehluttu tan Adv. Ashish Choubey a ding a; a leh lam tan Kushagra Singh Deputy Government Advocate, Sr. Adv. Vivek Sharan leh Adv. Rahul Maheshwari an ding)

Mahindra and Mahindra Financial Services Ltd. Car Loan Cheng Vbc 150 Vel Tihchingpen Thubuai Kal Zel High Court-ah Ngaihtuah A Ni

19/03/2026
Admin

Vawiin ni 19, March 2026 (Ningani) hian Gauhati High Court, Aizawl Bench chuan Mahindra car loan cheng vbc 150 vel tih chingpen thubuaia, District & Sessions Judge, Aizawl-in Anticipatory Bail dilna, Bail Application No. 28/2024-a bail phalna a lo pek tawh thiah dilna chu a ngaihtuah leh a. He thubuai hi Justice Sanjeev Kumar Sharma thutna bench-ah ngaihtuah a ni a. Mahindra thubuai kaihhnawiha petition hrang hrang thehluh te chu a rual ngaihtuah a ni. Anticipatory Bail order dt.27.5.2024 thiah dilna chungchangah hian objection(hnialkalhna) chu thehluh a nih tawh thu court hnenah thlen a ni a. He thubuaia hi kar li hnu, ni 20.4.2026 emaw atanga ngaihtuah leh tur dah a ni, thubuai ngaihthuah leh ni hian hearing neih a ni ang. Court chuan affidavit la thehluh loh te chu hearing neih hma ni 3 la awmah thehlut fel vek turin a hriattir bawk.Mahindra hian ni 29.3.2024 khan Crime and Economic Offences Police Station-ah car loan tih chingpen chungchangah hian FIR an thehlut a, thubuai case no.3/2024 chu section 34/120B/408/419/466/467/468/471/472/477A IPC hnuaiah ziah luh a ni a. He thubuaia motor dealer, Paul Zothanpuia chuan anticipatory bail hi dilin, District & Session Judge hian a dilna phalsakna order chu 27.5.2024 khan a chhuah a. Mahindra hian Section 439(2) r/w Section 482 CrPC, 1973 hnuaiah he order dt.27.5.2024 hi High Court-ah thiah dilna an thehlut ta a ni. He thubuai hi ni 20.6.2024 atangin ngaihtuah tan a ni a, kum hnih chuang kalpui a ni tawh a ni(www.jclalnunsanga.in)

New Capital Complex-Chawnpui Kawn Kawngpui Sira Ram Inchuhna Thubuai Gauhati High Court-ah Ngaihtuah A Ni

19/03/2026
Admin

Ni 17, March 2026 khan Gauhati High Court, Aizawl Bench chuan New Capital Complex-Chawnpui kawn kawngpui sira ram chungchanga thubuai a ngaihtuah leh a. He thubuai hi Justice Nelson Sailo thutna bench-ah ngaihtuah a ni. Court chuan thutlukna dik leh felfai siam anih theih nan Land Revenue & Settlement Department atanga chhanna (response) lak a ngai tih an sawi a. Additional Advocate General ngenna angin, Court chuan counter-affidavit file nan kar thum chhung hun a pe a. He thubuai hi 20 April 2026-ah ngaihtuah leh tura tih a ni a, chumi hma zawng chu ‘interim order’ lo chhuah tawh chu hman chhunzawm a ni ang.Thubuai thehluttute hi inhlawhfa, rawra chhu a eizawng an ni a. An sawi danin, kum 2014 atang khan New Capital Complex-Chawnpui Kawn kawngpui sira ram awl chu rei lo te chhung atan an lo luah tawh a ni. Hun a kal hnuah thlam te sa-in, a hnuah Assam-type in an sa chhunzawm a, kum sawm dawn helai hmunah hian an cheng tawh a ni. He ram hi kum 1985 khan respondent (lehlam pawl) hmingin Land Settlement Certificate (LSC) siam a lo ni tawh a. Mahse, kum 2002 khan Mizoram Sorkar chuan kawng siam nan he ram thenkhat hi a la a, respondent no. 5 hnenah hian zangnadawmna Rs. 2,20,948/- a pe tawh a ni. Kum 2014 khan sorkarin ram a lak tawh bak zawng atangin LSC No. Azl 3194/1985 thar (modified) pawh siam a ni bawk.Ram neitu hian kum 2019 khan ‘Eviction Suit No. 4/2019’ thehlutin, thubuai thehluttute hi phalna lova ram luahtu an nih thu a sawi a. February 26, 2020 khan court chuan ram neitu hi thiam a chantir a. Chumi hnuah Execution Case No. 52/2020 file a ni leh a, 30 October 2025-ah court chuan a lo pawmpui leh a ni. Heng thutlukna hmasa te hi bumna hmanga lak a ni tiin, petitioners-te hian Article 226 hnuaiah High Court-ah an zualko a, heng court thutlukna te hi thiah an dil ta a ni(www.jclalnunsanga.in)(He thubuai WP(C ) 142/2025, Ngurdailova & 2 Ors vs. State of Mizoram & 4 Ors. ah hian thubuai thehluttu tan Sr. Adv. C Lalramzauva a ding a, sorkar tan addl GA/AG Samuel Vanlalhriata Chhangte a ding)

Fate DNA Test Chu Nupui Uire Finfiah Nan Hman Phal A Ni Lo: Andhra Pradesh High Court

18/03/2026
Admin

Andhra Pradesh High Court chuan pasalin a nupui uire a ni tih finfiah nan an fate DNA test a hmang thei lo tiin thutlukna an siam. Justice Tarlada Rajasekhar Rao chuan mipa ngenna chu hnawlin, a hmaa trial court thutlukna lo siam tawh chu a pawmpui a ni. Court chuan nupui chu lo uire ngei a ngaih pawh lo nise, pasal chuan fate DNA test a phut thei lo a, a bik takin fate chu he thubuai nen a inkaihhnawihna an neih lo mai bakah, inchawmna (maintenance) an ngen miah loh phei chuan tih theih a ni lo, a ti.He thubuai hi kum 59 miin a nupuiin a chhuahsan (desertion) tia puhin, Hindu Marriage Act Section 13(1)(ib) hnuaia inthen a dil atanga inṭan a ni. Thubuai ngaihtuah a nih lai hian, fate chu ama fa an ni lo tia finfiah nan Indian Evidence Act Section 45 hnuaiah DNA test tih a dil a. Mahse, trial court-in he ngenna hi a hnawl a, High Court pawhin chu chu a thlawp ta a ni. Court chuan uire tia inpuhna hi finfiahna (evidence) dang hmanga finfiah tur a ni a, ṭul lova naupang inhnamhnawih tir tur a ni lo tih a sawi.Court hian Supreme Court thutlukna ṭhenkhat a ṭanchhan bawk a, chung ho a tarlan a nih danin DNA test hi a tih mai mai tur a ni lova. Dan ang thlapa inneihna pangaia nau piang chu fa dik tak (legitimate) anga pawm turin danin naupangte dikna chanvo a humhalh nasa hle a. Chhan ṭha tak awm lova hetianga test nei tura thupek hian naupang zahawmna leh a mimal nun (privacy) a tichhe thei a ni. Court chuan rorelna dik nei tura dikna chanvo (right to a fair trial) leh naupang mimal zalenna humhalh (right to privacy) te chu khaikhinin, naupang dinhmun venhim chu a thlang ta zawk a ni(www.jclalnunsanga.in)

DISCLAIMER