High Court

SBI-in Dik Lo Taka Rs.19.90 Lakh An Transfer Avangin Courtin Zangnadawmna Rs.1 Lakh Pe Turin Leh Pe Let Leh Vek Turin Ti

18/09/2026
Admin

Ni 10, September 2026 khan Allahabad High Court chuan State Bank of India (SBI) chu hmeithai pakhat fixed deposit atanga a pasal loan ba rulhna atana Rs. 19,90,693/- dan kalh a an lakchhuah chu pe kir leh turin thupek a chhuah. Division Bench Justice Shekhar B. Saraf leh Justice Abdhesh Kumar Chaudhary te chuan bank chu zangnadawmna Rs. 1 lakh pe tel a, fixed deposit rate pangngai ang zela interest nen sum chu a account-a dah let leh turin thu an pe bawk. Court chuan a nupui chu co-borrower, guarantor, surety leh loan agreement-a tel ve a nih loh avangin SBI-in a account atanga sum lakchhuah theihna an neih loh thu an sawi a. A pasal boral tawh ba chu bank-in rulh tir a duh a nih pawhin dan angin kal tur a ni a, hmeithai account atanga duh duha sum lakchhuah theih a ni lo tiin an sawi.Thubuai thehluttu pasal, Lucknow-a Assistant Professor ni thin chuan November 2020 khan SBI atangin Rs. 15 lakh personal loan a lo puk a. May 6, 2021 khan COVID-19 avangin a boral a, loan pawh a la rul zo lo a. Kum 2025-ah SBI chuan lehkhathawn thawnin, loan ba Rs. 13.87 lakh leh a interest nen pe let turin an ngen a. Bank chuan a salary account pawh an freeze hman a, mahse RBI Ombudsman kaltlangin an sut tir leh a. Inbiakremna kalpui mek laiin, SBI chuan a fixed deposit chu Ashiyana Branch atangin a pasal loan account awmna Jankipuram Branch-ah an sawn phei a, Rs. 19,90,693 chu la chhuakin, account chu Branch hlui lamah an sawn kir leh a ni.High Court chuan bank chet dan chu nasa taka demin, an thil tih dan zawng zawng chu thil tha lo leh dik lo tak a tih a nih thu an sawi a.Court chuan mi dang pawisa vawngtu an nihna anga rinawmna an neih loh thu a tarlang a. SBI chuan dan pangngai angin a rokhawmtute hnen atangin loan chu an la rulh tir thei tih sawi chiang mah se, duh duha dan bawhchhia leh dan kalh a zalen taka chet an remtih loh thu an sawi bawk(www.jclalnunsanga.in)(He thubuai hi Neha Mishra vs. Reserve Bank Of India Thru. Governor Central Office Building Mumbai And 5 Other a nia. Thubuai thehluttu tan Adv Syed Mohammed Haider Rizvi, Adv. Mohammad Hasan leh ukil dangte an ding a, a leh lam tan Adv Anurag Srivastava a ding)

SSA Thawkte Nghehna Tur A High Court Thupek La Tih Hlawhtlin Loh Avangin Sawrkar hotute Court-ah mimala Insawifiah Turin a ti.

17/09/2026
Admin

Vawiin ni 17 September khan Gauhati High Court chuan Mizoram SSA Teachers Association chuan sorkar hotuten an nghehna tura High Court thuchhuak ni 17.03.2023 (WPC 128/2019) ami tun thleng a an zawm loh chungchanga contempt case chu a ngaihtuah a. Justice Kalyan Rai Surana chuan sorkar hotute chu tun thlenga court thu chhuak tih khawtlai avangin October 27, 2026-ah zing dar 10:30-ah mimalin Court-ah in sawifiah a, in lan turin thu a pe.He case hi WP(C) No. 128/2019-a March 17, 2023-a Court thupek la tih puiltin loh chungchangah contempt petition Compt Case No. 17/2023 kal zel a ni a . Court chuan kum 3 leh a chanve aia tam sorkar lamah thupek zawm tura hun pek tawh mahse, court thu chhuak chu a la ti hlawhtling lo tih a sawi.Sorkar lam chuan Mizoram Regulation of Centrally Sponsored Scheme (CSS) Employees Scheme, 2024 chu June 18, 2024-ah an lo duang a. He Scheme hmang hian Centrally Sponsored Scheme hnuaia thawktute, SSA members-te pawh telin, regularisation process kalpui dan tur policy an siam tih an sawi a.He process kalpui tur hian CSS Performance Evaluation Committee hnuaiah Study Team din niin, eligibility thli thlai leh verify turin mawhphurhna pek a ni. Court-ah sorkar lam chuan Study Team hian a din tirh atangin vawi 50 a thukhawm tawh tih an sawi.Regularisation process chu phase hrang hrangah kalpui niin, Phase-I-ah Special Educator, Phase-II-ah Primary School Teacher, Phase-III-ah Upper Primary School Teacher, Phase-V-ah Lecturer leh Senior Secondary School Teacher te an tel. Phase dangah Hindi Teachers, Despatch Rider/Dak Runner, Grade-IV, Headmaster leh Resource Persons-te pawh an tel.Phase-I Special Educator-te tan list pathum siam a ni tih sawiin, Special Educators (Elementary under SSA) – mi 25, Special Educators (Secondary under SSA) – mi 41, leh Resource Persons (CWSN) – mi 51 an ni. Elementary Special Educator list-ah petitioner association member mi 3 an tel a; list dang pahnihah petitioner association member an tel lo.SSA lam ukil te chuan Phase-I-a regularisation exercise hi he contempt case-a Court thupek zawmna ni lovin, Supreme Court judgment, Rajneesh Kumar Pandey v. Union of India & Ors., zawmna avanga kalpui a ni tih an sawi. Chuvangin, petitioner association member-te tan Phase-I-ah hlawhtlinna an neih loh thu an sawi.Court chuan sorkar lamah process kalpui dan chu a muang lutuk a, March 17, 2023-a WP(C) No.128/2019 thupek chu la kalpui kim lo tih a tarlang. Sorkar lamin thupek zawm turin assurances an pe tawh mahse, Court-in hun rei tak a nghah hnuah pawh duh thu sam a la thlen lo tih Court chuan a tarlang. Chuvangin, Court chuan respondents zawng zawng chu Dar 10:30 AM, October 27, 2026-ah ah mimalin Court-ah in sawifiah a, in lan turin thu a pe.(www.jclalnunsanga.in)Dan lam kaihhnawih thutharte hi Whatsapp Group siamin update kan post thin a. Hemi Groupa i awm ve duh a nih chuan hemi link-ah hian lo join ve turin kan sawm a che.Mizo Law Update-I : https://chat.whatsapp.com/BEZzj5EzMLCBEQjtWYRFug?mode=gi_cMizo Law Update-II https://chat.whatsapp.com/DMaRfCsAQimCo6fLFyYNuS?mode=gi_c(He Contempt Case ah hian SSA lam tan Victor L Ralte a ding a, sawrkar lam tan Mary Lalruatkimi a ding)

Ukil Tam Takin SCC Online Emaw Manupatra Emaw Lei Turin An Tlin Vek Lo: Delhi High Court

17/09/2026
Admin

Delhi High Court-in Nilaini khan ukil tam tak chuan Manupatra leh SCC Online ang a man to leh hmantlak law research website-te chu an lei pha lo a, court thutluknate en nan Indian Kanoon ang a thlawna website hman theih te chu an innghahna ber a ni tih an sawi. Justice C Hari Shankar leh Vinod Kumar te Division Bench chuan right to be forgotten pawm a single-judge thutlukna chungchanga Indian Kanoon-in appeal a thehluh an ngaihtuah laiin hemi thu hi an sawi chhuak a ni. Court chuan dan zir chhuak te tan, a bik takin khaw te zawka thawk leh mimal thubuai buaipuitute tan court thutluknate hriat chu a pawimawh hle a ni, a ti.Thutluknate hi a thlawna website en theihna atanga paih bo a nih a, man chawia hman theihna platform-ah chauh a awm ta a nih chuan lawyer tam tak tan harsatna a thlen thei a ti bawk.He thubuai hi June 1-a Justice Sachin Datta thutlukna atanga chhuak a ni a, he thutlukna hian right to be forgotten a pawm a, mi thenkhatte chu an duh hunah court record zawn zung zung theihna atanga an hming paih bo turin an dil theihna a siamsak a ni. Indian Kanoon chuan he thutlukna hi dodalin, hetiang thuneihna hian court thutlukna hmuh theihna a tichhe thin tiin an sawi. Senior Advocate Akhil Sibal chuan thutluknate chu search method dang leh man chawia hman theih website-te atangin a la hmuh theih reng tho a ni, tiin a sawi a. Nimahsela, Bench chuan case number emaw ni zat (date) emaw hmanga zawn chu a harsat thu leh paid database chu lawyer tam tak tan a man a to lutuk a ni tiin an sawi thung. Court chuan he thubuai hi September 21 ah an ngaihtuah leh ang(www.jclalnunsanga.in)

Mizoram Atangin Bar Council Executive Member Hmasa Ber Linda Fambawl Kan Nei Ta

17/09/2026
Admin

Mizoram atanga Bar Council of Assam, Nagaland, Mizoram, Arunachal Pradesh, Nagaland & Sikkim Executive Member hmasa ber ni turin Linda L. Fambawl chu ruat a ni. Supreme Court-in ni 4, August 2026-a Writ Petition (Civil) No. 581 of 2024 (Yogamaya M.G. Vs Union of India & Ors.) with Writ Petition (Civil) No. 1060 of 2025 a thutlukna a siam angin, State Bar Council-ah hmeichhe member pahnih (2) nomination leh co-option chungchang sawiho turin, Gauhati High Court Chief Justice, Ashutosh Kumar chuan Assam, Nagaland, Mizoram, Arunachal Pradesh leh Sikkim Bar Council-a elected member zawng zawngte meeting a ko a. He meeting-ah hian State Bar Council-a hmeichhe member pahnih dah/thlanna tur chungchang sawiho a ni a. Hemi hnu hian Mizoram atangin Linda L Fambawl hi ruat a ni ta a ni.Linda L.Fambawl hian kum 2005 khan Campus Law Centre, University of Delhi atangin LLB a zir zo a. Kum 2008-ah Assistant Public Prosecutor (Asst. PP) leh Assistant Government Advocate (Asst. GA) atan Aizawl-ah a thawk tan a. Kum 2012-ah Government Advocate (GA) leh Additional Public Prosecutor (Addl. PP) atan Gauhati High Court, Aizawl Bench-ah a kai chho a. Kum 2024 atanga vawiin ni thleng hian Additional Advocate General (Addl. AG) leh Public Prosecutor (PP) atan High Court-ah ruat a ni(www.jclalnunsanga.in)

Tripura Human Rights Commission Thutluknaah Tripura High Court Inrawlh; Commission Thutlukna A Stay Sak

16/09/2026
Admin

Tripura High Court chuan Tripura Law University Registrar, Nachiketa Mittal chungchanga Tripura Humans Right Commission thutluknaah inrawlhin, ni 14 August 2026-a commission thutlukna chu a stay rih a ni. Ni 1, September 2026 khan Division Bench, Justices Ramachandra Rao leh Biswajit Palit te chuan Commission thutlukna anga an thil kalpui zawng zawng te chu stay hrih vek turin a ti bawk.Bench chuan Mittal-a laka complain-tu hi hriat/tarlan a nih loh avangin Regulation 9 of Tripura Human Rights Commission Regulation anga he thubuai hi reject a nih theih leh theih loh ngaihtuah a ngaih thu an sawi a. Tin, complaint-a thu ziah atanga a lan dan chuan mihring dikna chanvo (human rights) bawhchhiatna engmah awmin an lan loh thu an tarlang a. Hetih rual hian, complaint-tu an awm chuan an puhna a zirin he thubuai hi chu Sexual Harrasment of Women at Workplace (Prevention, Prohibition, Redressal) Act, 2013 emaw Bharatya Nagarik Suraksha Sanhita, 2023 hnuaiah a awm theih thu leh chutiang anga ngaihtuah theih a nih thu an sawi thung.Court chuan Tripura Human Rights Commission leh Investigation Wing-te chu insawifiahna pe turin a ti a. Ni 18, November 2026-a ngaihtuah leh turin an dah a ni(www.jclalnunsanga.in)(He thubuai hi Prof. Nachiketa Mittal vs Tripura Human Rights Commission & Ors WP(C) 646/2026 a ni a, thubuai thehluttu tan Advocate Sankar Lodh, a ding a, a Commission tan Kohinoor N Bhattacharjee, G.A. a ding)

Sorkar Tender Chhang Hniam Thei Ber Pakhat Aia Tam An Awm A Thlan Dan Tur Chungchangah Court-in Thutlukna Siam

09/09/2026
Admin

Vawiin ni 9, September 2026 (Nilaini) khan Gauhati High Court chuan sorkar tender chhang hniam thei ber pakhat aia tam an awm a, hnathawktu tur thlan dan tur chungchanga a thutlukna a tichhuak a. High Court-a he thubuai put luh a ni hnuin, 19th August 2026 khan sorkar-in tender chhang hniam thei ber pakhat aia tam an awm a, tender changtu thlan dan tur kaihhruaina chu a siam a. Court chuan he kaihhruaina hi a pawmpui a. He thubuaia an buaina ber sorkar-in a chinfel tak avangin he thubuai hi Court chuan a titawp zui ta a ni. Hemi bakah hian thupek lailawk a lo chhuah tawh te chu a titawp nghal bawk.He thubuai hi Vanlalruata Sailo put luh a ni a. Sorkar tender chhang hniam thei ber pakhat aia tam an awm a, hnathawktu tu thlan dan tur chhungchangah kaihhruaina mumal engmah a awm lo va, thuneitute kuta nghah tawp chu dik lovin a hria a. Kaihhruaina mumal awm lova thuneitute kuta nghah tawp chuan an duhsak zawng te pek mai zel theihna a siam niin a hmu a. Inthleina leh intluktlan lohna a thlen phah thei niin a hria a. Tichuan, he thubuai hi High Court-ah a pu lut ta a ni. He thubuaiah hian tender chhang hniam thei ber zinga, a changtu tur thlan dan turah kaihhruaina siam a phut a ni.July 2024 khan, Mizoram Sorkar chuan tender chhan dan chungchangah dan a siam a, tender chhang tute tan a hniam berah estimated cost aia 5% hniam leh a sang berah 10% aia tam lo turin notification a ti chhuak a. September 2025-ah Finance Department chuan Standard Bidding Documents a ti chhuak leh a, hetah hian tender chhang hniam ber thlan chhuah a nih hnua, an zing atanga hnathawktu tur thlan dan turah kalphung fel tak siam lovin thuneitute kutah dah tawp a ni a. Inkaihhruaina langtlang tak a awm loh avang hian Vanlalruata Sailo chuan kumin kum tir khan Public Interest Litigation (PIL) a thehlut ta a ni. He tender chhan dan kalphung hian duh sak zawng te tender pek zel theihna kawng a siam lian hle niin a hmu a ni.Finance Department chuan August 19, 2026 khan tender chhang hniam thei ber te zing a, hnathawktu tur thlan dan tur inkaihhruaina notification a ti chhuak a. Hemi hnuaiah hian contractor te chu hna an lo thawh tawh dan te, thubuai an neih dan te, khawl leh hmanrua an neih dan te, hnathawktu neih dan leh pawisa neih dan te endik a ni ang. Thubuai thehluttu vui vaina chu Sawrkar-in a sutkian tak avangin High Court chuan he PIL hi a titawp ta a ni(www.jclalnunsanga.in)Dan lam kaihhnawih thutharte hi Whatsapp Group siamin update kan post thin a. Hemi Groupa i awm ve duh a nih chuan hemi link-ah hian lo join ve turin kan sawm a che.Mizo Law Update-I : https://chat.whatsapp.com/BEZzj5EzMLCBEQjtWYRFug?mode=gi_cMizo Law Update-II https://chat.whatsapp.com/DMaRfCsAQimCo6fLFyYNuS?mode=gi_c(He thubuai hi Vanlalruata Sailo vs State of Mizoram & 2 ors PIL 1/2026 a ni a. Thubuai thehluttu tan hian Adv Kartik Jain a ding a, Mizoram sorkar tan Advocate General Biswajit Deb leh Addl Advocate General Linda L Fambawl te an ding)

DISCLAIMER