Gauhati High Court, Aizawl Bench chuan June 11, 2026 khan Bawngkawn leh Durtlang Leitan inkar kawnga in sak thar khapna thupek bawhchhiat chungchanga court-in ama thua thubuai a lak luh (suo motu contempt case) chu a ngaihtuah chhunzawm a.

He contempt proceeding hi July 18, 2024-a Court thupek, hemi huam chhunga in sak thar khapna leh in sak mek chhawng khat pawh la sa zo lo, petrol pump sak tum telin, tihtawp nghal tura a tih chu mi parukin an zawm lo nia a hriat avanga siam a ni. Court thupek hi kenkawh a nih theih nan Aizawl Municipal Corporation (AMC) pawhin July 19, 2024 khan khapna thupek a lo tichhuak ve tawh bawk a ni.

Chief Justice Ashutosh Kumar leh Justice Michael Zothankhuma te Bench chuan he thupek bawhchhiaa puh mi paruk zinga pali hnenah notice pek an ni tawh tih a tarlang a. An zinga pakhat chu a ukil kal tlanga inlanin, chhanna thehlut turin hun a dil a ni. Notice pek tawh mi pathum la bangte chu Court hmaa inlan turin hun dang pek an ni.

Court chuan Amicus Curiae, Joseph L. Renthlei chu a la bang mi pahnihte zawn chhuah leh notice pek kawngah pui turin a hriattir bawk. He thubuai hi July 22, 2026-a ngaihtuah chhunzawm tura ruat a ni a, Bench chuan khapna huam chhungah hian in sak belh a awm a nih chuan na taka hma a lak tur thu a tichiang nghal bawk a ni(www.jclalnunsanga.in)

(He thubuai In Re Intach R/B SH Rinsanga, Convener, Intach Aizawl versus Dr. Vanlalhruaia & 5Ors ah hian Petitioner tan Joseph L Renthlei a ding a; Respondent no.1 tan hian Johny L Tochhawng a ding)