Environmetal Laws Chungchanga Pi Vanramchhuangi PIL Thehluh Gauhati High Court Aizawl Bench-in Ngaihtuah; PIL Thehluha Thu Thlen Chu A Chian Loh Thu Leh A Huap Zau Lutuk Niin Court Chuan An Sawi
- Jun 17, 2026
- Admin
Environmetal Laws Chungchanga Pi Vanramchhuangi PIL Thehluh Gauhati High Court Aizawl Bench-in Ngaihtuah; PIL Thehluha Thu Thlen Chu A Chian Loh Thu Leh A Huap Zau Lutuk Niin Court Chuan An Sawi
Ni 12, June 2026 khan Gauhati High Court, Division Bench Chief Justice Ashutosh Kumar leh Justice Michael Zothankhuma te chuan kan chhehvel ram leh boruak venhimna dan chungchanga Pi Vanramchhuangi PIL thehluh chu an ngaihtuah a. He PIL-ah hian Aizawl khawpuia bawlhhlawh sawngbawl dan leh hmunhma tibaltute chungchanga inkaihhruaina leh dan ṭha zawk a awm theih nan, kan chhehvel venhimna dan leh inkaihhruaina hrang hrangte khauh taka kengkawh turin thuneituten hma la se tiin a ngen a ni.
He PIL-ah hian Pi Vanramchhuangi hian bawlhhlawh paihna kawngah inkhuahkhirhna mumal a awm loh thu leh, single-use (vawi khat hman) plastic-te hman zui a la ni zel tih a tarlang a. Hetiang taka kan chhehvel ram tihchhiatna hi Constitution-a Article 21-na hnuaia mihringte’n nung tura dikna chanvo kan neih chu a bawhchhia tih a sawi bawk. Tin, sorkar thuneitute chu Aizawl khawpui bawlhhlawh sawngbawlna, kan chhehvel ram tihchhiat a nih zel chungchangah leh infrastructure harsatnate chingfel tura hma la turin a phut a ni. Nimahsela, Court chuan he PIL-a ngennate hi a chian loh thu leh a huap zau mah mah thu an sawi a, dan bawhchhiatna hmun bik leh Court thutlukna mamawhna hmun bik tarlan a nih loh thu a sawi thung.
Hetiang a nih lai hian, Court chuan respondent te chu an chhanna thehlut turin a hriattir a. Additional Advocate General Samuel Vanlalhriata Chhangte chuan sorkar aiawhin he thubuai ngaihtuah leh a nih hmaa chhanna hi an thehluh tur thu Court a hrilh a, respondent dangte pawh an affidavit thehlut turin hun pek an ni bawk.He thubuai hi ni 1 July,2026 a ngaihtuah leh tur a dah a ni(www.jclalnunsanga.in)
(He thubuai Vanramchhuangi v. The Chief Secretary and 9 Others (PIL No. 2 of 2026)ah hian dilna thlentu tan Advocate Rosalynn L. Hmar a ding a; sorkar tan Addl Advocate General Samuel Vanlalhriata leh Adv Johny L Tochhawng te an ding)
Recent Post
