Supreme Court

Supreme Court Chuan Youtube Channel-a Sexual Offence Tuartu Hmeichhia Te Nihna Tarlan Chungchanga Hmalak Dan Tur A Hriattir

13/11/2025
JC

Supreme Court, Justice Aravind Kumar leh Justice NV Anjaria te thutna Bench chuan hmeichhia zahmawh rawngkaia pawikhawihna (sexual offence) tuartu te nihna  Youtube Channel-a pholan chungchangah thutlukna an siam a. Supreme Court chuan Rajasthan sawrkar hnenah Bharatiya Nyaya Sanhita, 2023(BNS), Section 72 (Disclosure of identity of victim of certain offences, etc) hnuaia  a tul anga hma la turin a hrilh. Bharatiya Nyaya Sanhita, 2023(BNS) Section 69 (Sexual intercourse by employing deceitful means etc.) hnuaiah hian, mi tupawh, bumna hmang emaw tihhlawhtlin tumna awm miah lova hmeichhia nupuia nei tura intiam a, mipat hmeichhiatna hmanpui hi, pawngsual anga pawikhawihna ni lo mah se kum 10 thlenga lungin tan leh pawisa chawitir a hrem theih a ni. BNS Section 72 hnuaiah hian sexual offence tuartu hmeichhe nihna (identity) phochhuaktu chu a tam berah kum 2 chhung lungin tan leh pawisa chawitir theih a ni. Youtube channel neitu pakhat hian he case-a  a tuartu te nihna, an hming, leh court a thu kaldan te chu a youtube channel-ah a tarlang a. He channel neitu hi Bharatiya Nyaya Sanhita, 2023(BNS) hnuaia Section 69 (Sexual intercourse by employing deceitful means etc.) a hek a ni. Complainant pathum te chuan he thubuai ami, Arpit Narainwal hian nupuia neih tum miah lova inneihpui a tiam thu an sawi a. Arpit Narainwal chuan Section 482 CrPC hmangin High Court hnenah an puhna te sut turin a dil a. Ni 3, June 2025 khan a dilna chu High Court-in a hnawlsak a. Petitioner hian a dilna an hnawlsak chu Supreme Court-ah a thlen nawn leh a ni.Thubuai thehluttu tana ding, Senior Advocate Pinky Anand chuan FIR-a puhna inziak atanga lang chu he thubuaia a tuartu ni a insawi te hian petitioner chu an thlem a, anmahni duh thu ngeiin live-in relationship-ah an awm a ni, a ti. Respondent no. 1 tana ding ukil chuan he case-a  a tuartu ni a insawi te thlalak leh hming te chu youtube channel-ah tarlang a ni, a ti a. BNS 2023 hnuaia Section 72 (Disclosure of identity of victim of certain offences, etc)  hi hemi tana chhanna chu a ni, a ti. Ni 26, June 2025 khan Supreme Court, Justice Sandeep Mehta leh Justice PB Varale thutna Bench chuan hriattirna an chhuah a, chutah chuan petitioner chunga FIR pathuma an puhna chungchangah, intihluihtirnaa hmalakna engmah neih a nih dawn loh thu a hriattir a. Ni 31, October 2025-a he thubuai ngaihtuah a nih khan, respondent no. 2(complainant zinga pakhat) chu court-ah amah a rawn inlan a, court hnenah chuan petitioner hian a vau thu a sawi a . Jurisdictional Officer hnenah complaint a thehluh thu leh, Station House Officer, Surjeet Tholiya, of Pratap Nagar, Bhilwara te chuan a vau thin thu a sawi bawk.Rajasthan sawrkar tana ding ukil chuan a tul anga venhimna kalpui turin kaihhruaina pek vat a tul thu a sawi a ni(www.jclalnunsanga.in)

Eng Vangin Nge Supreme Court-in Nithari Tualthattu-a Puh S.Koli A Chhuah Zalen, Supreme Court Thutluk Thlirletna.

12/11/2025
JC

Supreme Court chuan case investigation fimkhur loh avang leh thil tisualtu tak man loh avangin a lawm lo hle a. Eng anga case lian leh thil sual lian pawh ni se, finfiah a nih loh chuan Court-in a tih theih awm chhun chu thil sual titu a puh chhuah zalen a ni, a ti.  Hmeichhe naupang 19 lai lu ruh leh taksa hmuh aṭanga anmahni pawngsual leh that zui a puh leh, mihring taksa peng hmanga sumdawng (Kidney/Organ Trade) a puh, S. Koli, kum 19 lai lung in a tan hnua vawiina chhuah zalen ni ta kha, Supreme Court-in nimin 11.11.2025 (Thawhlehni) a chhuah zalenna chhan tlangpuite:1. Police Hmaa Tihluih Inpuanna Awm: Supreme Court chuan a Judgment Para 11-ah, petitioner inpuanna (confession) lak a nih danah dik hlel tam tak a awm thu a sawi a. Ni 60 chhung advocate tel lova amaha police kuta a awm hnu chauhvin statement chu laksak a ni a. Chu bakah, a inpuanna chu danin a phut angin Magistrate chuan a kalpui lo a. Investigating Officer, Magistrate hmaa thu a sawi laia hnai taka lo awm ve chuan, S. Koli chuan ama duh thu ngeiin thu a sawi leh sawi loh a chiang lo, a ti. Chu bakah, statement-ah hian sawi dan tur vau lawkna leh  intihluihna a tel tih a lang a. Hei hian Evidence Act hnuaia Section 24 chu a bawhchhia a ni. Court chuan case dangah confession chu pawm a nih loh chuan, Curative petition ngaihtuahna kum 15 mi pawngsual leh thatna  case-ah pawh hian a pawm thei tawh lo, a ti a ni.2. Tualthah Nana Hmanraw Hmante Manna Vantlang Kal Pawh Theih Hmun:Supreme Court thutlukna Para 12-naah S. Koli thiam loh chantirna atana Section pawimawh tak, India Evidence Section 27 hnuaiah an thil hmuh chhuahte chu dan hnuaiah pawm theih a ni lo, a ti a. Court chuan a hun laia thil tihvat vatna a awm loh thu a lo sawi a. Remand paper-te chuan seizure record-te chu a kalh tih a hmu chhuak bawk a ni. Chu bakah, finfiahnaah chuan ruh leh thil dang an hmuh chhuahna hmun chu police leh vantlang te hian S. Koli a hmuna an hruai ve hmain an hriat tawh a nih thu a sawi a. Heng ruh leh thil dangte hi inhawng vekin, laih chhuah sain, S.Koli an hruai hma hian a lo awm sa tawh. Dan chuan heng tualthata puhte hi hremna pek an nih dawn chuan finfiahna an hmuh chhuahna hi vantlangin an kal ve theih lohna a ni tur a ni, a ti a.3. Ukil Tel Lova Police Kuta Awm Rei A Pawi: Supreme Court chuan a thutlukna Para 11 leh 14 -ah  investigation kalpui dan a nih chu a dik lo hle, a ti a. Police kuta rei lutuk a awm te, dan lama ṭanpuina (legal aid) a dawng lo leh investigation chu awn lam nei (bias) a kalpui a nih thu a sawi a. Hengte hian Indian Constitution Article 21 leh Article 14 hnuaia petitioner dikna chavo, hleih nei lova rorelsaka awm (Right to a Fair Trial) leh dan hmaa intluktlanna (Equality before Law)  chu a bawhchhia, a ti a ni.4. Forensic Finfiahna Pawm Tlak Loh: Thutlukna Para 13-ah S. Koli te chenna D-5, Nithari aṭangin mihring hnuhma hmuh a ni lo, a ti. Centre for DNA Fingerprinting and Diagnostics, Hyderabad ten naupang bote chhungkua nen rinzawn theihna hmu chhuak mahse, S. Koli te tih ngei a ni tih chianna evidence a awm lo, a ti. Chemte leh hreite chu thisen emaw, sam emaw a kai tih fiahna tel lova Court-a exhibit a ni. Supreme Court chuan S. Koli chu awmpui satliah mai a ni a, mihring taksa thiam taka chansawm tura thiamna (medical training) a nei tihchianna a awm lo, a ti.Supreme Court hian, Post mortem leh Forensic finfiahna hmuh chhuahte chu rang taka tih a ni lo va, vawn uluk a ni lo va; an thil mante leh an manna hmunte inkaih hnawihna rin zawm a ni lo, a ti a. Police-te hian hemi tichiang tura vantlang thuhretute statement an la lo va, organ trade chungchang pawh an chhui chiang lo, a ti. 5. Eng Anga Case Lian Pawh Ni Se Rinhlelh Vangin Convict Theih Loh:Supreme Court thutlukna Para 17-ah chuan Nithari thil thleng hi a rapthlak hle a, a tuartu chhungte tawrhna pawh sawi thiam chi a ni lo va. Case rei tak chhui a nih laia a tisualtu dik tak, dan angin a phut anga chiang taka fiah theih a ni lo chu pawi a ti a. Rin thu leh ngaihruatnain tu mah convict theih a ni si lo  va. Dan hnuaiah chuan eng anga case lian pawh ni se, rinhlelhna aiin rinhlelhna awm lo khawp a finfiahna (beyond reasonable doubt) chu pawm zawk tur a ni, a ti. (www.jclalnunsanga.in). (He Case Curative Petition No. Diary No.49297of 2025, Surendra Koli Vs State of UP-ah hian Petitioner tan Dr. Yug Mohit Chaudhary leh AoR Sai Vinod an ding a, CBI tan Raja Thakare, ASG a ding bawk a ni.)

Supreme Court Chuan India Rama Tualthatna Rapthlak Ber Nithari Inthahnaa Tualthattua Puh S. Koli Chu A Chhuah Zalen Ta

11/11/2025
JC

Vawiin ni 11, November 2025 (Thawhlehni) khan, Nithari-a hmeichhe naupang  pawngsual leh thattua puh, S. Koli chu Supreme Court-in a case la chinfel loh awm chhunah thiam a chantir a. Judge-ten mipui veng thawng (Media Trial) taka case an kalpui chu ṭha an ti lo. Case dang vanga a tang a nih loh chuan, a case dang 14-a thiam a chan tawh avangin chhuah nghal turin a ti. Nithari Tualthahna rapthlak:  December 2006 khan, saiip chhunga dah naupang leh hmeichhe ruhro tam tham tak mai chu, Noida-a veng pakhat Nithari-ah,  sumdawng hausa Moninder Singh in hnung kawrah hmuh chhuah a ni a. Hemi avang hian Moninder Singh leh a ina hnathawk, S. Koli te chu thubuai siamsakin man an ni a. Hetih hun lai hian India ram mai ni lo khawvel a deng chhuak a; naupangte phei chu pawn chhuah an ngam lo a ni. Kidney (Kal) hmanga sumdawnna avanga naupang leh hmeichhia te hi thah nia ngaih a ni. Hmeichhe naupang pahnih bo aṭangin : Nithari venga awm mi pahnih chuan kum 2 kal taa hmeichhe naupang pahnih bo an hmuh thu police an hrilh a. Police-te chuan an thil hriat chu an ngaihven ṭhat duh loh avangin khawtlang hruaitute an hrilh a. Kut bung an hmuh chu police hnenah an hriattir a. Hmeichhe bo pahnih nu leh pate chuan an fate thlalak nena kalin finfiah a ni a. Police-te sawi dan chuan, an chhui zelnaah S. Koli te chuan an tih a nih ngei thu sawiin, naupang 6 leh nula kum 20 mite chu mipat hmeichhiatna hmanga tihbawrh ban an nih hnuah an thah thu an inpuang. December ni 30-ah police pahnih, a tira case lo ngaihsak duh lotute pawh kha suspend an ni nghe nghe. Mipui pung khawmin police-te nen an inkarah buaina lian tham tak a chhuak a. Ruhro tam zawk hmuh chhuah zel a nih avangin Kal hmanga sumdawnna niin mipuite chuan an ngai. A tuartute : Nula Payal kum tling tawh chu a tuartu langsar leh hriat chian hmasak ber pawl a ni a. Mi dangte hi hmeichhe naupang an ni tlangpui ni a rin a ni. Post Mortem report-a a lan dan chuan lu ruh 17 hmuh chhuah a ni a; 11 chu hmeichhia ni ngeia rin an ni.  India ram damdawi in lian ber AIIMS-in February ni 6, 2007-a a report dan chuan, lu ruh hi 19 hmuh chhuah niin an taksate hi chan sawm niin a sawi. CBI hmuh chhuah : CBI sawi dan chuan Koli hian hmeichhe naupangte hi thiam takin an ina kal turin a thlem ṭhin a. Mipat-hmeichhiatna hmanpuiin an that a, an taksa hi an tichhe ṭhin an ti.  Kum 2005 leh 2007 inkara thil thlengah  pawngsual leh tualthah case 16 siam a ni. CBI hian tualthahna atana hmante an recover niin an sawi. He case-a CBI ṭan chhan berte chu magistrate hma-a Koli inpuanna (Sec 164 CrPC) leh tualthahna hmanrua recover (Sec 27 of Indian Evidence  Act) te an ni. High Court thutlukna : Kum 2009 leh 2017 inkar chho khan Sessions Court-in S. Koli leh M.Singh Pandher te hi case hrang hrangah thiam loh a chantir a. Koli hi case 12-ah thiam loh chantir a ni a, a pu hi case pahnihah thiam loh chantir a ni thung. Case 10-ah phei  S. Koli hi khai hlum tura tih a ni. A thiam loh channate Allahabad High Court-ah a appeal ve leh a. Kum 2023 October thla khan High Court chuan an case hi Police lamin rinnglelh awm lo (beyond reasonable doubt) khawpin an finfiah lo, tiin thiam a chantir a. CBI investigation chu investigation hmanhmawh leh phuai luai tak tiin a sawisel. Tualthah nachhan ber nia an puh, taksa peng hmanga sumdawnna chu, an awmna bul lawka doctor pawh hetiang case-a man a nih laiin chhui zui uluk a ni lo, a ti bawk. Case pakhat (tuna Supreme Court-a curative petition-a ngaihtuah), hmeichhe kum 15 mi pawngsual leh thah thu-ah chuan thiam loh chantir tho a ni a; hei vang hian vawiin tlengin a la tang. Supreme Court ah zual ko: High Court-in hetia thiam a chantir avang hian CBI leh a tuartu hian appeal 14 lai Supreme Court-ah an file a. Supreme Court chuan heng an appeal-te hi a hnawlsak vek a ni.  Supreme Court-a ngaihtuah a nih lai hian Chief Justice Gavai chuan M. Singh Pandher a in, ruhro an hmuhna vel hi vantlang pawhin an kal theihna reng a ni a; danah chuan, heng tualthata puhte hi hrem an nih dawn chuan heng an hmuh chhuahna hi vantlangin an kal ve theih lohna a ni tur a ni, a ti. Court hnuai lama judge-ten mipui mit mei veng (media trial) taka case an kalpui hi a dik lo a ti bawk.M. Singh Pandher hi Jail aṭangin chhuak tawh mahse, S. Koli hi kum 2009-a hmeichhe naupang kum 15 pawngsual leh thah case-ah dam chhunga tang tura hrem nih avangin a la tang a. Chumi case avang chuan Supreme Court-ah S. Koli hi a kal a ni. Supreme Court chuan S. Koli appeal hi ni 15.02.2011 khan a lo hnawl tawh a. Chumi hnawlna chu Review a theh lut leh a. Chumi Review pawh chu Supreme Court hian ni 28.10.2014 vek khan a lo hnawlsak tawh a ni. Supreme Court-a thil thleng zen zen lo, S. Koli hian a case Supreme Court-a a appeal  chu kum 2011-ah hnawl ni tawh mahse, hemi hnu hian a case dang 12-ah thiam a chang leh si a. Hei vang hian kum 2011-a Supreme Court-a a case hnawl ni tawh chu ngaihtuah ṭhat leh a dil (Curative petition) leh a. Supreme Court chuan a curative petition chu ngaihtuahin, kum 2011-a Supreme Court vekin thiam loh a chantirnaah thiam a chantir leh a, chhuah zalen nghal tura tih a ni. Curative Petition/Case chu eng nge?:  Miin High Court-a thiam loh an chan hian Supreme Court-ah an appeal ṭhin a. Chu appeal-a thiam loh an chan chuan Review an theh lut leh ṭhin a. Review a thiam loh an chan leh chuan Curative petition an theh lut leh ṭhin. Heng Review leh Curative petition te hi hlawhtling an awm ngai lo tia sawi ṭhin a nih laiin, India rama tualthattu hming lar S. Koli erawh chuan hnehna changin, chhuah zalen a ni dawn. Supreme Court-in S. Koli, High Court-in thiam loh a chantirna dika a pawmna, a appeal a hnawlna Judgment dt. 15.02.2011 leh, S. Koli case Supreme Court-in a hnawl hnua a hnawlna ngaihtuah ṭhat a dil lehna Review pawh Supreme Court-in a Judgment dt. 28.10.2014 hmanga a hnawlna te chu vawiin khan Chief Justice BR Gavai te, Justice Surya Kant (Nov ni 24 aṭanga CJI ni tur) te, Justice Vikram Nath te awmna Bench chuan, a ṭum thum nana S. Koli Curative Petition hmangin a ṭhiat leh vek a, thiam a chantir ta zawk a ni. Case dang vanga tang a nih loh chuan rang taka jail aṭanga chhuah tura tih a ni.Pawngsual leh tualthattua puh S. Koli hi Supreme Court-ah thiam chang mahse kum 19 dawn chu jail-ah a tang tho a ni. He case hi BBC documentary-in 'Slumdog Cannibal' tiin kum 2012-ah a siam a, kum 2017 khan Netflix-ah pawh 'The Karma Killings' tiin pek chhuah a ni bawk. Nikum lamah Netflix lamah 'Sector 36' tiin movie hlawhtling tak an siam thar leh bawk( www.jclalnunsanga.in).(He case Diary No.49297 of 2025-ah hian Dr Yug Mohit Chaudhary leh a AoR Sai Vinod te S. Koli tan an ding a, CBI tan Raja Thakare, ASG a ding)

An Man Chhan An Hrilh Loh Vangin Bail-in Chhuak; Supreme Court Chuan Man Chhan Ziaka Hrilh Hi Tih Ngei Ngei Tur A Ni A Ti

10/11/2025
JC

Supreme Court, Chief Justice BR Gavai leh Justice Augustine George Masih te thutna bench chuan ni 6 November, 2025 khan mi tupawh man an nih chuan man an nih chhan chu ziaka hrilh tur a ni a ti a; an tawng hriatthiam ngei a pek tur a ni a ti bawk. Supreme Court chuan man an nih chhan ziaka, an tawng hriatthiam ngei a hrilh an nih loh chuan man an nihna te leh tanin a an khungna(remand) kal zel te chu dan kalh ang a ngaih theih ani a ti a. He dan hi a mantu te’n an zawm lo a nih chuan, an mi man chu chhuah zalen theih a ni a ti bawk.Supreme Court chuan man an nih chhan chu a lian emaw a te emaw, ziaka pek an ni ngei ngei tur a ni a ti. Tin, ziaka an pe nghal thei lo a nih chuan , tawngkain an hrilh nghal tur a ni a; a rang thei ang berin Magistrate hmaa an inlan hma darkar 2 la awmin ziak ngeiin an pe tur a ni a ti bawk.He thubuai hi ni 25 November, 2024 a Bombay High Court a Justice Bharati Dangre  thutlukna lo siam tawh, Mihir Rajesh v. State of Maharastra case atanga thu kal zel a ni a. He case- a thubuai puluttu hian ni 7 July,2024 khan BMW -in mi pakhat suin a tlanchhe zui a; Article 22(1) leh Section 47 BNSS hnuaiah man a ni ta a ni. Tichuan, man a nih hnuin thubuai thehluttu hian danin a sawi anga, man a nih chhan te ziaka hrilhhriat a nih loh thu sawiin Court hnenah a thlen a. Bombay High Court chuan thubuai kalpui danah dik tawk lo a awm tih pawm mah se, a pawi khawih a len avangin man anihna chu a pawmpui a ni. Tichuan, thubuai thehluttu hian an man dan chu dan kalh a ni tiin Supreme Court hnenah a thlen leh a, thubuai thehluttu hi Supreme Court erawh chuan bail-in a chhuah ta a ni. Supreme Court Judge, Justice Augustine George Masihi chuan India Danpui, Article 22(1) a mi tupawh man a nih chuan, man a tawh nachhan a rang thei ang bera hrilh a ni tur a ni tih inziak hi dan zawhkimna pangngai mai ni lovin, India Danpui Article 21 hnuaia mimal zalenna chanvo venhimna atana a innghahna lungphum a ni a ti(www.jclalnunsanga.in).

Supreme Court in Motor Accident Tuartu-te Thlavang a Hauh; Zangnadawm Court a Dil Tlai Avangin Hnawl Tur a Ni Lo a Ti

07/11/2025
JC

Supreme Court chuan Motor Accident Claims Tribunals (MACTs) leh High Court-te chu Motor Vehicles Act, 1988-a Section 166(3) hnuaia hun bituk (limitation period) chhunga zangnadawmna court a dil hman lo thubuai thehluhte chu hnawl lo turin interim order a chhuah. Hei hian court thupek dang a awm hma chuan hun bituk hnua thubuai thehluhte chu a hnawl theih rih lo tihna a ni. Justice Aravind Kumar leh Justice N.V. Anjaria-te thutna bench chuan he thubuai WP(C) No.166 of 2024 an ngaihtuah mek laiin interim order hi an chhuah a. He thubuai thehluttu  hian kum 2019-a amendment-in a telh thar Section 166(3) chu a challenge a. Thla ruk hun chhung  chu zangnadawmna court a dil tur a bituk a ni. He provision bik hi April ni 1, 2022 atang khan hman tan a ni. Thubuai thehluttu hi ukil niin Motor Vehicles Act, 1988 hnuaia hun bituk hi a mumal loh leh dan kalh a nih thu a sawi a. Chetsualna tuartute chanpual leh dikna chanvo chu a khuahkhirh a ti a ni. Motor Vehicles Act-in a tum ber - chhawmdawlna leh zangnadawmna pek theihna hamthatna dan (welfare law) a nihna chu a chhawm zo lo a ti a. Amendment hian Indian Constitution hnuaia Article 14, 19, leh 21 a bawhchhia tiin tihtawp a ngaih thu a sawi. Tin, amendment siam a nih lai hian a tulna chhan(justification) hai lanna Law Commission report hriattirna emaw, Parliamentary debate emaw inrawnna engmah a awm lo a ti a . Thubuai thehluttu chuan he amendment hi atthlak tiin dan mumal a ni lo tih court hnenah hian a thlen tel bawk a ni. Court chuan hmun hrang hrangah hetiang thubuai eng emaw zat thehluh a nih thu a ngaihtuah chuan a tawpa a  thutlukna siam chuan ram pum huapin nghawng a neih dawn thu a sawi a. Chumi avang chuan, he thubuai hi rang taka ngaihtuah a ngaih thu a sawi a, party-te pawh kar hnih chhungin chhanna te thehlut fel turin a hriattir bawk. Court chuan he thubuai ngaihtuah a nih lai hian eng Tribunal emaw High court in Section 166(3) hnuaia thubuai thehluh chu hnawl lo turin a ti a. He case November ni 25,2025-ah ngaihtuah leh turin a ruat a ni (www.jclalnunsanga.in). (He thubuai Bhagirathi Dash v. Union of India & Anr., WP(C) No. 166/2024-ah hian thubuai thehluttu tan Senior Advocate Jay Savla leh Renuka Sahu, AoR te an ding a ni). 

Supreme Court Chuan Rs. 3000 Crore Chuang Digital Arrest Case-a Cyber Kaltlanga Inbumna Chu Khauh Taka Buaipui A Tum

04/11/2025
JC

Nimin ni 3 November, 2025 khan Supreme Court chuan vaibelchhe 3000 chuang cyber kaltlanga dan lo anga pawisa inlaksakna, a bik takin digital arrest case-ahte a thleng tih a hriat chuan mak a tihzia a sawi a. Kum upa lamte chuan hetianga inbumna hi an tuar nasa zual niin a sawi. He buaina do tur hian khauh taka hma lak a ngai a ti bawk. Hemi chungchang chhuina kal zel dan chu Solicitor General, Tushar Mehta chuan Supreme Court a hrilh hria a. Supreme Court chuan ni 10 November, 2025 hian a ṭul anga hma lak dan tur a pe ang.Eng nge Digital Arrest chu?: Email hmangin court summons emaw, police lehkha ang takin mi hnenah an thawn a. Chumi chin felsak leh case tihtawp nan pawisa an dil ṭhin. Police hma emaw, Court-a inlan tura hmun hla taka kal ai chuan pawisa lo pe mai an awm ṭhin.An Buaina Bul:Ambala, Haryana-a cheng hmeichhe kum upa lam tawh chuan Chief Justice of India kal chhuak ta, BR Gavai hnenah lehkha a thawn a. Chu lehkhaah chuan amah leh a pasal chu Court order lem hmanga “digital arrest” -a an awm thu a hrilh a. A tuartu (victims) -te sawi danin, anmahni bumtute hian video conference leh telephone hmang tein CBI, Intelligence Bureau leh Court lama thuneitu anga insawiin an biak ṭhin thu an sawi a. September thla khan Rs. 1.5 crore chuang an laksak thu an sawi bawk a ni.Supreme Court Thusawi:Supreme Court Division Bench, Justice Surya Kant leh Justice Joymalya Bagchi ṭhutna chuan he thil thleng hi khauh taka buaipui a ṭul a ti a. Court chuan cheng vaibelchhe 3000 chuang a tuartu (victim) -te hnen aṭanga laksak tawh a ni chu mak a ti hle a. Thupek khauh leh khirh tak an pek loh chuan he buaina hi a lian zel dawn a ni, a ti. He buaina hi khauh takin an buaipui tur thu court chhungah ṭawngkain an sawi a ni. (www.jclalnunsanga.in).

DISCLAIMER