Supreme Court

Supreme Court Chuan Mizo Chief Council-in Zangnadawmna Vbc 500 Phuta Petition An Thehluh Chu A Hnawlsak

14/03/2026
Admin

Supreme Court Chuan Mizo Chief Council-in Sawrkar Laipui Zangnadawmna Vbc 500 Phuta Petition An Thehluh Chu A HnawlsakNimin ni 13, March 2026 khan Supreme Court chuan Mizo Chief Council te’n, Assam Lushai Hills District (Acquisition of Chief’s Rights) Act, 1954 hnuaiah Lushai Hills(Mizoram) Mizo lalte ram chu zangnadawmna mumal pe lova laksak an ni, tia writ petition an thehluh chu a hnawlsak. Khang hunlai khan Mizo khawtlang hi lal rorelna hnuaia awm a ni a, lalte hian "Ram" neiin an awp ṭhin a. Khawtlang mipuite hnenah lo neihna tur ram an sem ṭhin a, thlai thar, a tlangpuiin buh aṭangin chhiah "Fathang" an la ṭhin a ni. British awp lai pawhin lal rorelna hi kalpui chhunzawm a ni a. India-in zalenna a hmuh hnuah he bial hi Assam hnuaiah a lo awm a, sorkar chuan Assam Lushai Hills District (Acquisition of Chief’s Rights) Act, 1954 siamin, he dan hmang hian Sorkar chuan lalte thuneihna, ram leh rorelna chu a laksak ta a ni. Kum 1955 khan sorkar chuan lalte hnenah hian zangnadawmna Rs 14,78,980 an pe a ni.The Mizo Chiefs Council-te chuan Supreme Court-ah sawrkar laipui chu kum 2014 khan a khing a. He thubuaiah hian Mizo Lalte chuan an chanvo neih thin pek let emaw, zangnadawmna pek an dil a ni. He thubuai Mizo Chief Council Mizoram Thr. President Shri L. Chinzah v. Union of India & Ors., WP(C) 22/2014 hi hun rei tawh tak Supreme Court hian a ngaihtuah tawh a.The Mizo Chiefs Council, Lal 309 awmna te chuan Assam Legislative Assembly-a, The Assam Lushai Hills District (Acquisition of Chief’s Rights)Act, 1954 siam anih hnua an chanvo leh dinhmun tha an hloh tak avangin Court-ah an zual ko a. An thuneihna leh an ram te chu laksak an nih avangin Mizo Lalte hi ram nei mumal lo in an awm a. Mizo Lalte hian tun hmaa an dinhmun pek let an nih dawn loh chuan vbc 500 zangnadawmna (compensation) pe turin court ah hian an dil a ni.Mizoram sawrkar chuan Mizo Chiefs (Lal) te thilphut chu tawm puiin Supreme Court-ah Affidavit an thehluhsak a; amaherawhchu, zangnadawmna pe tura an phut hi a tam tham avangin khatih hunlaia Mizoram sawrkar, Indian National Congress (INC), Pu Lalthanhawla kaihhruai sawrkar chuan zangnadawmna chu sawrkar laipui(central government) pek tur zawk a ni tiin Supreme Court ah hian an tang.He thubuai, WP(C) 22/2014 hi ni 31, August 2025 khan hearing hnuhnung ber neih a ni a. He thubuai hi Supreme Court Judge, Justice JB Pardiwala leh Justice Mahadevan te’n an ngaihtuah a. Hemi ni hian Arguments (Inhnialna) te neih zawh a ni a. Supreme Court chuan ukil te chu written submissions ( thubuai neih te, dan leh dun inghahna te leh finfiahna etc. inziahna) karhnih chhung a pe turin a tih hnu-ah nimin khan thutlukna hi a siam ta chauh a ni.Lalte hian zangnadawmna an pek kha Fathang man chauh a ni a, ram man a tel lo tiin an ṭang a. Tin, Mizo lalte hi India rama rin luh an nih hnua hmanlai princely state lalte hamṭhatna leh privy purse pek an nih ang bawka pek ve tur an ni tiin an phut bawk. Nimahsela, Justice J. B. Pardiwala leh Justice R. Mahadevan-te awmna bench chuan he an ngenna hi an hnawlsak a. Court chuan princely ruler-te hnena privy purse leh hamṭhatna an pek te chu constitution hman hmaa sorkar nena inremna hranpa an lo siam tawh sa anga pek an ni a, pawl dangte'n dan hmanga an chanvo anga an phut ve theih a ni lo tih a tarlang.Court chuan lalte thuneihna tih bo a nih aṭanga kum sawmruk deuhthaw hnua petition thehluh a ni chu a pawm theih a ni em tih ngaihtuah tel bawk a. Court chuan high court ah te kalin sawrkar lam te hian beiseina an pek thin avangin ngaihhnathiamna pein he thubuai hi ngaihtuah phal mah se, a tawpah chuan lalte hian ram chu dan ang taka an ta (legal ownership) a ni tih an finfiah zawh loh thu an sawi a. Finfiahna an thehluh te, chumi zinga mithiamte thuziak leh chanchin ziah dante chuan lalte chu ram neitu pumhlum an ni tih a nemnghet zo lo a ni. Chuvang chuan, Court chuan India Constitution hnuaia lalte ro/ram neih theihna dikna chanvo (property rights) chu bawhchhiat a ni lo a, an fundamental right laksakna a awm lo tiin thutlukna a siam a, an petition thehluh hi a hnawlsak ta ni (www.jclalnunsanga.in). Dan lam kaihhnawih thutharte hi Whatsapp Group i zawm duh chuan a hnuaia link-ah hian i join thei reng ehttps://chat.whatsapp.com/BEZzj5EzMLCBEQjtWYRFug?mode=gi_c https://chat.whatsapp.com/DMaRfCsAQimCo6fLFyYNuS?mode=gi_c

Supreme Court-in Kum 13 Chuang Nikhaw Hre Lova Awm Tawh Chu Khawl leh Damdawi Hmanga An Enkawlna Titawp A Tih Hlum A Phalsak

11/03/2026
Admin

Supreme Court-in Kum 13 Chuang Nikhaw Hre Lova Awm Tawh Chu khawl leh Damdawi Hmanga An Enkawlna Titawp A Tih Hlum A PhalsakVawiin ni 11, March 2026 khan, Supreme Court chuan kum 13 chuang tehmeuh nikhaw hre lova awm tawh, mipa kum 32 mi Harish Rana chu khawl leh damdawi hmanga an enkawlna tihtawp a, tih hlum (passive euthanasia) a phalsak. He thutlukna hi Justice J. B. Pardiwala leh Justice K. V. Viswanathan-te bench in an siam a. Court chuan a nunna chelh din nana an hmanraw hman zingah chuan, PEG tube hmanga chaw leh tui an pek pawh tihtawp a phal sak a. “Damlo tana tha ber tur” (best interest principle) tih chu innghahnan hmangin, damlo chu that chhuah beiseina a awm tawh loh a, a nunna tiseitu tur ringawt a nih chuan an enkawlna te hi tihtawp theih a ni, tiin Court chuan a tarlang. Hrehawm lutuk lova, zahawm taka a hun tawp a hman theih nan Rana chu All India Institute of Medical Sciences (AIIMS) palliative care department-ah dahluh turin an rel a.He thubuai hi Rana pa in a fapa nunna chelh dinna atana damdawi leh khawl an hmante tihtawp a ngenna, Supreme Court-a a thlen atanga lo irhchhuak a ni a. Kum 2013 khan Harish Rana hi kum 20 mi, B.Tech zirlai niin, an awmna building chhawng li-na atangin a tla a, a thluakah hliam na tak a tuar a. Chu chhiatna a tawh atang chuan a taksa peng zawng zawng chu che thei lovin a awm a, nikhaw hre lovin a awm zui ta reng a ni. Tracheostomy tube, zun dawnna (urinary catheter) leh PEG tube hmanga chaw leh tui pek hmangin a nunna chelh hram hram a ni a. AIIMS atanga medical report in a tarlan danin kum sawm chuang liam ta chhung khan a dinhmunah hma sâwnna pakhatmah a awm lo a ni. Court chuan enkawlna chu tihtawp a phal sakin; India rama hetiang lam hawia dan (law) felfai tak siam turin Union Government a ngen nghal bawk a ni(www.jclalnunsanga.in)(He thubuai hi Harish Rana v. Union of India [MA 2238/2025 in SLP(C) No. 18225/2024] a ni)

Supreme Court Chuan Ukil Naupang Zawkte Chu Lar Khelh Nana PIL Thehlut Tawh Lo Turin A Hriattir

11/03/2026
Admin

Supreme Court Chuan Ukil Junior Zawkte Chu Lar Khelh Nana PIL Thehlut Tawh Lo Turin A TiSupreme Court chuan ni 9, March 2026 khan ukil la junior deuhte chu lar khelh nana Public Interest Litigations (PILs) theh lut lo turin a ti a. Chief Justice of India Surya Kant leh Justice Joymalya Bagchi te chuan vantlang thil enkawl that loh avanga thihna thleng thei pumpelh na tur chungchanga PIL theh luh chu a hnawl a. Thubuai thehluttu ukil hian he thubuai hi ram pum a buaina a nih thu sawiin, kawng a khuar awm thin avanga chetsual thleng hrang hrang te a tarlang bawk.He thubuai ngaihtuah a nih lai hian, Court chuan thubuai thehluttu chu hemi chungchanga thuneitute hnena eng vanga thehlut zawk lo nge a nih tih a zawt a. Thubuai thehluttu ukil chuan kum 4 chhung a practice tawh thu a sawi chuan Chief Justice chuan a practice kum hmasa lam chu Ukil Senior zawkte hnuaia inzir a, thawk turin a fuih a. Court chuan lawyer thenkhatte chu thubuai innghahna mumal awm lo a, national media leh social media-a lan duh avangin thubuai thehlut tawh lo turin a hriattir bawk. An thubuai thehluh chu a huam chin a zauh em avangin leh an dilna thlen chu tih theih chi a nih loh avangin, Court chuan thubuai thehluh chu a hnawl a, PIL thehluh chu an ngaihtuahna tur chhan tha tak a awm lo niin an tarlang bawk(www.jclalnunsanga.in)(He thubuai Dushyant Sejwal vs. Union of India W.P.(C) No. 000270 / 2026 ah hian thubuai thehluttu tan Adv. Shambhavi Singh, Adv.Simram Chawdhary, Chand Qureshi, AOR leh ukil dangte an ding)

Supreme Court Chuan UCC Hian India Hmeichhiate Dikna Chanvo A Humhalh Theih Thu A Sawi

11/03/2026
Admin

Supreme Court Chuan UCC Hian India Hmeichhiate Dikna Chanvo A Humhalh Theih Thu A SawiSupreme Court chuan ni 10, March 2026 khan Uniform Civil Code (UCC) hian India hmeichhe tam takte dikna chanvo humhimna kawngah nasa takin a pui thei ang tih a sawi thar leh a. He thu hi Muslim Personal Law (Shariat) Application Act, 1937 hnuaia Muslim hmeichhiate inheritance rights (rokhawmna dikna chanvo) chungchang sawiselnna petition an ngaihtuah laiin an tarlang a ni.He petition hian Muslim personal law chu hmeichhiate tan a rualkhai lo hle a, a bik takin rokhawmna thilah an chan a hniam bik hle tih a tarlang a. Mahse, Court chuan sakhua bik te dan zawng zawng vawilehkhata thiah vek chu dan lama innghahna tur awm loin a siam thei tih a sawi thung. Tun dinhmunah hian India-a sakhaw hrang hrangte hian inneihna, ințhenna, rokhawmna leh fa lak chungchangah mahni sakhaw dan (personal laws) țheuh an la hmang a. He thil hi vawilehkhata thutlukna siam mai lovin uluk taka ngaihtuah a ngai a ni tih judge-te chuan an sawi.Chief Justice Surya Kant leh Justice Joymalya Bagchi-te bench chuan hmeichhe thliarhranna hi Muslim personal law-ah chauh a awm lo tih an sawi a. India rama sakhaw hrang hrangte personal law hnuaiah hian hmeichhia tam takin thliarhranna an la tawk tih an sawi bawk. Justice Bagchi chuan Court-in personal law hmanlai a thiah vek chuan, khawtlangah harsatna nasa tak a thleng thei tih a tarlang a. Chuvangin, he thil hi Parliament-in dan a siam (legislation) hmanga a sut kian a fuh zawk hmel tih an sawi a ni. Judge-te chuan sakhaw dan țhenkhata mipa chauhvin ințhenna an kalpui thei (unilateral divorce) te hi khawtlang leh dan (law) lama rualkhai lohna a nih avangin, court chauh chuan a chingfel vek thei lo vang tih an tarlang bawk.He thu an ngaihtuah lai hian, senior advocate Prashant Bhushan chuan Muslim hmeichhiate hian Muslim mipa aiin rokhawmna dikna chanvo an nei tlem zawk tur a ni lo tih a sawi a. Kum 2017-a Shayara Bano v. Union of India thutluknaa, ‘triple talaq’ chu dan kalh a ni tia Court-in a puan tawh kha chu a tarlang a. Bhushan-a chuan 1937-a dan kha thiah a nih chuan, Indian Succession Act, 1925 chu hman a nih ve tawh mai dawn avangin mipa leh hmeichhiain rokhawm chungchangah dikna chanvo inang an nei thei tawh ang tih a sawi a. Mahse, Court chuan hmanhmawh lutuka dan thlak anih chuan Muslim hmeichhiate'n dikna chanvo an lo neih tawh sa pawh a tihchhiat palh theih thu a sawi a. Chuvangin, petition theh luttu hi an petition siamțha a, kawng dang awm thei turte ngaihtuah leh phawt turin a hrilh a ni(www.jclalnunsanga.in)

nikhatah Rs 3,74,00,000/- a la lut

09/03/2026
Admin

Supreme Court Senior Advocate Abhishek Manu Singhvi Chuan A Nupui Nena An Hausakna Intawm Hlutna Chu Vaibelchhe 2860.36 Nih Thu Sawi, Kum 2024-25 ah phei chuan vaibelchhe 374-ah a pung chho a, nikhatah Rs 3,74,00,000/- a la lutSupreme Court -a Senior Advocate leh Indian National Congress hruaitu ni bawk, Abhishek Manu Singhvi chuan Telangana Rajya Sabha inthlanaa affidavit a thehluhah, a nupui nena an thil neih intawm hlutna chu vaibelchhe 2,860.36 a nih thu a sawi a. Kum 2024-2025 ah vaibelchhe Rs 374 a income niin nikhatah Rs 3,74,00,000/- a la lut tih a ni.He affidavit aṭang hian kum nga liam ta chhung khan Singhvi-a sum lakluh zat chu pung nasa hle tih a hmuh theih a. A sum lakluh chu kum 2020-21 ah vaibelchhe 158 a ni a, 2021-22 ah vaibelchhe 290-ah pungin, 2022-23 ah vaibelchhe 359 a tling a ni. Kum 2023-24 ah hian vaibelchhe 333-ah niin, 2024-25 ah phei chuan vaibelchhe 374-ah a pung chho leh a ni. A vaiin kum nga chhunga a sum lakluh tarlan hi vaibelchhe 1,516 aiin a tam a ni.He lehkhaah hian Singhvi chuan milem ziah leh siam (artworks and paintings) vaibelchhe 25 man chuang a nei tih a lang bawk a, hei hi a thil neih tarlan zinga a langsar zual a ni a. He affidavit-ah hian a hausakna leh a sum peipun dan (investments) kimchang takin a tarlang a ni.Thil danglam tak pakhat chu, Singhvi hian a ro neih dan list kimchang tak a tarlang tel hi a ni a. Ro hlu liantham bakah, in chhung bungrua leh office hmanruate pawh a hlutna kiam dan chhutin a tarlang a. Entirnan, affidavit-a computer pakhat a tarlan chu tunah hian Rs.163 man anga chhut a ni a, hei hi 2024 a hlutna Rs. 454 aṭanga tlahniamin, hun inher liam zela a hlutna kiam dan a tarlang a ni.He a thil puanzar zinga chhinchhiah tlak tak pakhat chu Singhvi hian rulh hmabak ba eng mah a neih loh thu a tarlang hi a ni. He ukil leh politics tuipuitu kum 67 mi, University of Oxford aṭanga doctorate degree neitu hi, tun dinhmuna Rajya Sabha inthlan chuh tura candidate hausa berte zinga mi a ni a.He inthlannaah hian, candidate dang Vem Narender Reddy chuan a chhungkaw thil neih chu vaibelchhe 41 a nih thu a puang a, a lakah thubuai (criminal cases) eng mah a awm lo tih a tarlang bawk.Hetih lai hian, independent candidate Kante Sayanna nomination chu a hming rawn rawttu awm zat tur a tlin loh avangin inthlan buatsaihtute chuan an hnawl sak a. Hemi avang hian Abhishek Manu Singhvi leh Vem Narender Reddy te chu khingtu awm lovin Rajya Sabha MP atan thlan tlin an ni ta a ni(www.jclalnunsanga.in)

Judge Sawichhetu YouTuber-in Ngaihdam Dil; Supreme Court-in Fimkhur Tura Vau Lawkin, A Thubuai Tih Tawp Sak

09/03/2026
Admin

Judge Sawichhetu YouTuber-in Ngaihdam Dil; Supreme Court-in Fimkhur Tura Vau Lawkin, A Thubuai Tih Tawp SakNi 9, March 2026 khan Supreme Court chuan Chandigarh-based YouTuber leh Varpad Media-a Editor-in-Chief ni bawk Ajay Shukla laka kumina Supreme Court-in an thuneihnaa thubuai an siamsak chu an titawp ta. He thutlukna hi Shukla-an Supreme Court judge hlui pakhat laka a thu sawi avanga ngaihdamna a thehluh hnuah siam a ni ta a ni. He thubuai hi Justice Dipankar Datta leh Justice Satish Chandra Sharma-te thutkhawmna (bench) hmaah ngaihtuah a ni a. Court chuan Shukla-a ukil, Advocate Eesha Bakshi kaltlanga ngaihdam dilna thehluh chu pawmsakin, he thubuai hi a titawp ta a ni. Nimahsela, bench chuan Shukla hi nakin zela fimkhur tawh turin a vau lawk a, hetiang thil hi a thlen nawn leh chuan hremna na tak a hmachhawn tawh dawn tih an sawi tel bawk.He buaina hi Shukla-an YouTube channel ‘The Principle’ (Varprad Media ta) a video a dah atanga intan a ni a. He video-ah hian Justice Bela M. Trivedi sawichhiatna leh thuthang dik lo a siam ni a hriat a ni a. Tin, he video hian Supreme Court hmingchhiatna a thlen thei tih hriain, Court chuan May 30, 2025 khan a thubuai thehluttu awm lo mah se a thuneihna hmangin(suo motu) thubuai hi a siam sak a. Khatih laia bench-a thu te chu Justice BR Gavai, Justice AG Masih leh Justice AS Chandurkar te an ni.Court chuan India Constitution-in zalenna (freedom of speech and expression) min pe mah se, chu zalenna chu bituk chin nei a nih thu a tarlang a. Mi tu mahin judge-te hmingchhe tur leh judiciary zahawmna tichhe thei zawnga sawichhiatna an phuahchawp a thiang lo tih a sawi bawk.Thubuai ngaihtuah a nih chhung hian Court chuan Shukla, YouTube, Attorney General for India leh Solicitor General of India-te hnenah hriattirna (notice) a lo chhuah tawh a. Thutlukna hnuhnung siam a nih hma khan YouTube pawh video-a sawichhiatna awmna chu paih turin a lo hriattir tawh bawk a ni.Shukla-a ngaihdam dilna chu ngaihtuah a nih hnuah, Supreme Court chuan he thubuai hi a titawp ta a, mahse hetiang thil hi a ti leh a nih chuan hremna na tak pek a ni tawh dawn tiin a vau lawk a ni(www.jclalnunsanga.in)(He thubuai hi In Re: Scandalous Remarks made by Mr. Ajay Shukla, Editor-in-Chief, Varprad Media Pvt. Ltd. a digital Channel Vs/SMC(Crl) No. 1/2025 Diary No. 30681/2025 a ni)

DISCLAIMER