Supreme Court

Supreme Court-in Cancer Damdawi Hralhna Man To Lutuk Chungchang Ngaihtuah

24/09/2026
Admin

Supreme Court chuan ni 22 September 2026 (Thawhlehni) khan cancer damdawi thenkhat retailer-te hnena hralhna man zat leh mipuite hnena hralh theihna zat to ber (MRP) inthlau lutuk chu thil ngaihtuah ngai tak a nih thu an sawi a. Thubuai thehluttu hian damdawi man thununna ṭha zawk siam tur te, damdawi chu generic prescrition hmanga chawh tur te leh damdawi in enkawlnaa hmanraw hman thin te man zat chu bithliah phutin ngenna a thlen a ni.Division Bench, Justice Vikram Nath leh Justice Sandeep Mehta te chuan he ngenna hi an ngaihtuah a. Bench chuan cancer damdawi thenkhat retailer-te'n Rs. 2,700-a an lak theih lai a, mipuite hnena Rs. 27,000 MRP-a hralh a ni thin chu mak an tih thu an sawi a. Justice Mehta chuan hetiang damdawi lakna man leh hralh chhuahna man inthlau lutuk hi damlo-te chunga ‘chhun en lai a ruk rukna a ni’ a ti a, retailer te’n damdawi man tlawmtea an lak chu to taka damlo-te hnena hralh a ni chu pawi an ti hle a ni.Hetiang damdawi man thunun tur hian thuneitute'n hma an la na tawk lo chu mak an tih thu a sawi a. Mi tam takin an nunna chhan nan an in leh bungrua te an hralh a ngaih hial chang a awm thin thu sawiin, Rs. 100 man damdawi Rs. 2,000-a hralh hi dan kalha pawisa inhnehchhuhna lo chu eng dang nge a nih ang tiin a zawt bawk.Pharmaceutical industry aiawha inlan, Senior Advocate Kapil Sibal chuan damdawi man inthlau nasa lutuk hi stockist, retailer leh hospital atanga hralh chhuahnaa thleng a nih hmel thu a sawi a. Hemi avang hian stockist-te hnena damdawi hralhna man pawh hi enfiah tel a ni tur a ni a ti a. Sawrkar laipui pawhin he thil siamṭha a, mipui hnenah man tlawm zawka damdawi thlen turin hma lak a inhuam thu an sawi bawk. He thubuai hi ngaihtuah chhunzawm leh turin September 29 ah dah ni(www.jclalnunsanga.in) (He thubuai hi Kishan Chand Jain vs Union of India a ni)

Supreme Court-in Chief Election Commissioner leh Election Commissioner Te Ruatna Dan (2023 Act) Khinletna Thubuai A Ngaihtuah

24/09/2026
Admin

Vawiin ni 24 September 2026 khan Supreme Court chuan Chief Election Commissioner leh Other Election Commissioners (Appointment, Conditions of Service and Term of Office) Act, 2023 (2023 Act), hnuaia Chief Election Commissioner leh Election Commissioner te ruat dan khinletna chu an ngaihtuah a. He thubuai hi Division Bench, Justice Dipankar Datta leh Justice Satish Chandra Sharma-te chuan an ngaihtuah a. Hemi chungchangah hian an ngaihdan pawh a inang lo hle a ni. 2023 Act hnuaiah hian Chief Election Commissioner(CEC) leh Election Commissioner (EC) te thlangtu tur selection committee siam a ni a. He committee-ah hian Prime Minister, Leader of Opposition, leh Prime Minister-in a ruat Union Cabinet Minister te an tel a. He 2013 Act hian CEC leh EC thlanna atan Central Government chu thuneihna a pe nasa lutuk tiin thubuai hi an thlen a. He dan chungchanga thutlukna tawp an siam hma hian Court chuan he thubuai hi 5-judge Constitution Bench hnena hlan a ṭul leh ṭul loh a ngaihtuah hmasa phawt a ni. Justice Dipankar Datta chuan he thubuai hi Constitution Bench-a hlan a ngaih loh thu a sawi a. Inthlanna dik leh fair neih hi Constitution innghahna pawimawh tak a nih thu leh Election Commission chu executive thuneihna ata lak hran a ni tur a ni tih chu Constitution Bench chuan a lo rel fel tawh thu a sawi a. A ngaih dan chuan, tun a thubuai hi chu chung thutlukna lo siam tawh te 2023 Act-a hman chhuahna hun angah a ngai a ni. Hemi rual hian, Prime Minister-in Cabinet Minister a ruat chuan selection process-ah daltu awm lova ngaihdan hrang pek a harsat tur thu a tarlang bawk.Justice Satish Chandra Sharma erawh chuan a pawm ve lo thung a, 2023 Act hi dan dik a nih leh nih loh chungchangah constitutional question thar leh lian tham a chawh chhuah avangin Constitution Bench ngaihtuah tur a ni a ti a. He thubuai hi Constitutional Bench kuta hlan a ngai em tih chungchangah Judge pahnihte ngaihdan hi a inan loh avangin, Bench chuan he mi chungchang ngaihtuah a, Constitution Bench din a ṭul leh ṭul loh rel turin Chief Justice of India chu an ti a. Hemi rual hian, constitutional reference ngaihtuahna hun rei lutuk thin chu ngaihtuah thain, constitutional case pawimawh tak takte awlsam zawka ngaihtuah thuai anih theih nan permanent 5-judge Bench din mai turin rawtna an siam bawk a ni(www.jclalnunsanga.in)

Hmeichhia Te Thi Neih Laia Hriselna Tha An Neih Theihna Atana Hma La Tura Thupek State Hrang Hrangin Zawm That Loh Vangin Supreme Court Lungawi Lo

22/09/2026
Admin

Supreme Court-in Central sorkar leh state sorkarte chu sikul-a hmeichhiate thi neih laia thianghlimna leh hriselna tha an neih theih nana hma la tur a hriattir aṭanga thla riat vel a liam hnu pawh a, state tam tak leh Union Territory-te'n Supreme Court thupek an zawm tha lo hle tih thlen a ni a. Court chuan sikul-ah mipa leh hmeichhe tan zunin leh ekin hran ve ve leh tui thianghlim, sanitary napkin a thlawn a pe tur leh bawlhhlawh paih dan tur tha buatsaih turin thupek a lo chhuah tawh a. Sorkar laipui atanga report thar berah chuan state tam takin zunin leh ekin dinhmun an siamṭhat laiin, sikul hrang hrangah tifaitu tur staff an la awm tha tawk lo hle tih tarlan a ni a.Arunachal Pradesh-ah chuan sikul 2,400 chuangah tifaitu tur tumah an awm lo a, Jharkhand-ah erawh chuan sikul zawng zawng 1% velah chauh tifaitu an awm thu thlen a ni a. State 15-te chuan tifaitu tur ruat an nih dan chin hi an la report lo a ni. Sanitary napkin a thlawna pek chungchanga report pawh an la dawng kim lo hle tih an tarlang a. Chandigarh chauh chuan napkin a thlawna pekna tur ruahmanna a kimchangin an report a, Puducherry-ah chuan vending machine a awm na a, free napkin hi an sikul 36.2% ah chauh hmuh tur a awm thung.Supreme Court chuan hmeichhia te thi neih laia an hriselna hi India Dan Pui Article 21 leh 21A hnuaia nungdama awm tura an dikna chanvo, an zahawmna leh zirna chanvo pawimawh tak pakhat a ni tih a lo sawi tawh a. He thupek hi sorkar sikul leh private sikul pahnihte a huam vek a, thla thum chhung a zawm vek turin Court chuan state-te hi a lo hriattir tawh a ni. August thlaa state hrang hrang atanga thuchhuak lakkhawm aṭanga report thar ber chuan hma lakna tha tak a la awm lo hle tih tarlan a ni a. State paruk chauhvin bawlhhlawh bawm khuhna nei dah a nih tawh thu hi an report a. Court chuan District Education Officer-te chu zirtirtu pawl siamin sikul-ah te hian surprise inspection nei turin thupek a chhuah a. Petition file-tu ukil pawhin hma lakna kalpui dan enpui turin committee hranpa din turin a ngen bawk a ni(www.jclalnunsanga.in)

"Sakhaw Thil Avanga Vande Mataram Sa Duh Lo Tute Chungah Dan Ang A Hremna An Hmuh Loh Kan Beisei" Tiin Supreme Court-in Central Sorkar Hrilh

22/09/2026
Admin

Vawiin ni 22, September 2026 khan Supreme Court chuan Vande Mataram sak chungchanga Carnatic musician, T.M. Krishna thubuai thehluh a ngaihtuah a. Thubuai thehluttu hian Prevention of Insults to National Honour Act hnuaia 2026 amendment chu India Danpui kalh a nih thu a thlen a. Amendment-ah chuan National Song chu official function tinah a chang kim a sak zel tura tih a ni a.Thubuai thehluttu hian 'Jana Gana Mana' chu Constituent Assembly-in January 24, 1950 khan National Anthem turin a pawm a, Article 51A(a)-ah pawh chiang taka tarlan a ni a; chu chuan mipuite chu National Flag leh National Anthem zah turin a phût a ni. Chutih laiin, 'Vande Mataram' erawh chu Constituent Assembly-in "National Song" tia a pawm bik a ni lo a, Article 51A(a)-ah pawh tarlan a ni hek lo, tin, kum 50 chuang zet chu 1971 Act hnuaiah venhimna pawh a nei tel lo a ni, tiin a sawi a.Chief Justice Surya Kant, Justice Joymalya Bagchi leh Justice V. Mohana te Bench-in he thubuai hi an ngaihtuah a. Amendment Act-ah hian eng chu nge National Song tia sawifiah nih loh thu thlen a ni a. Justice Bagchi chuan hman ata tawh dan anga kan lo kalpui thinah chuan Vande Mataram hi National song angin ngaih vek a nih thin thu a sawi a. Nimahsela, Bench chuan National Song chu eng ber nge tih a ngaihtuah dawn loh thu leh an ngaihtuah theih a nih loh thu a sawi a. An thu ngaihtuah tur ber erawh sakhaw thil avanga Vande Mataram sa duh lo te chu Constitution-in venhimna a pe em tih nih thu an sawi a ni.Krishna chuan Vande Mataram stanza hnuhnung pali-ah Hindu pathian nu, Durga, Lakshmi leh Saraswati te sawina a awm a. Chuvangin mipuite chu heng stanza te sa tura tih luih chu an chhia leh tha hriat thiang tak hmang tur a an zalenna leh India Danpuia sakhaw zalenna kalh a ni a ti a. Krishna ukil, Senior Advocate Dr. S. Muralidhar chuan amendment-ah hian National Song hi chiang taka hrilhfiah a nih loh avangin dan hman sualna a thlen thei bawk a ti.Solicitor General chuan Krishna ngenna thu chu a dodal a, amendment-ah chuan dik lohna a awm loh thu a sawi a. Justice Bagchi chuan sakhuana avanga Vande Mataram sa duh lo tute chu tu mah dan hmanga hremna tuar lo turin Court-in a beisei a ti a. Supreme Court chuan Union Government hnenah an insawifiahna thehlut tur a ti a, he thubuai hi ngaihtuah chhunzawm leh tur a tih a ni(www.jclalnunsanga.in)(He thubuai hi TM Krishna v Union of India W.P.(C) No. 1183/2026 a ni a, he thubuai hi AOR Prasanna kaltlanga thehluh a ni)

"Sum Leh Thuneihna Chuan He Ramah Engkim A Neih Tir Thei Che" Tia Post-tu Bail Thiah Dilna Supreme Court-in Hnawlin, A Bail Thiahsak Remti Lo

21/09/2026
Admin

Supreme Court chuan mi thah thubuai-a bail-a a chhuah hnu a, social media-a "sum leh thuneihna chuan he ramah hian eng pawh a neih tir thei che" tia sawitu bail thiahsak tura dilna chu a hnawl. Justice Vikram Nath, Justice Augustine George Masih, leh Justice Sandeep Mehta-te Bench chuan pawikhawihtua puh Vishal-an chhuah zalen anih hnua chutiang thil a sawi chu a lawm vang mai nia ngaihsakin, a bail thiatsak tura ngenna chu an hnawl sak a ni.He thubuai hi October 2022-a Haryana-a Berla khuaa ram chungchang buaina atanga chhuak a ni a. He intihbuainaah hian Vishal-a chuan mi pakhat chu hmanraw hriamin na takin a luah a vua a, hemi hnu hian a hliam tura lovin a thi zui ta anga sawi a ni a. He thihnaah Vishal-a chu pawikhawihtua puh a ni a. Hemi avang hian October 28, 2022 khan Vishal-a hi man a ni. Trial court leh High Court-ah vawi 4 lai a bail dilna chu an hnawl hnuah, kum 3 leh thla 5 chuang jail-a a tan hnuah April 23, 2026 khan Punjab & Haryana High Court chuan bail hi a lo pe ta a ni.High Court chuan postmortem report-ah hriamhrei hnuhma hmuh tur a awm loh thu leh, thihna thlen tu nia puh pawh thildang a nih zawk thu an sawi a; tin, mit a hmutu mi 31 zinga mi 8 chauh thu zawhfiah an la ni a. Taninah hian hun rei tak chhung a lo tang tawh a. Article 21 hnuaia hun tiam chhunga thubuai chinfel theih loh a nih avangin bail hi pek a ni a ti. Hetianga bail a hmuh hnu hian pawikhawihtua puh chuan social media-ah chapo taka video rawn post-in, "Sum leh thuneihna chuan he ramah hian engpawh a neih tir thei che" tiin a rawn sawi a. He video avang hian Rajbala chuan Supreme Court-ah a bail hi sut sak turin ngenna a thehlut a, mahse Supreme Court chuan bail a hmuh avanga a lawmna satliah angah a ngaihsak a, High Court thutlukna chu pawmpuiin, bail chu a thiahsak duh ta lo a ni(www.jclalnunsanga.in)(He thubuai hi Rajbala v. State of Haryana a ni)

Police Officer-in Ziaka Man Chhan Hrilh Lova Mi A Man Chuan A Lakah Departmental Enquiry Kalpui Ngei Tur A Ni: Supreme Court

21/09/2026
Admin

Ni 21, September 2026 khan Supreme Court chuan police officer-in ziak a man chhan hrilh lova mi a man chuan a lakah departmental enquiry kalpui ngei tur a nih thu an sawi. Justice Ujjal Bhuyan leh Justice Atul S. Chandurkar-te Bench chuan, India Dan Pui Article 22(1) hnuaiah mi man apiangte chu man an nih chhan ziaka, an tawng hriat thiam ngeia hriattir chu an fundamental right a nihzia a sawi a. Court chuan hei hi zawm a nih loh chuan man an nihna chu dan kalh a nih thu an sawi.He thubuai hi Punjab-a a thil thleng atanga intan a ni a. Jaskaranjit Singh-a chuan hmeichhe naupang kum tlinglo chungah hursualna kawngah pawikhawihna a thlen tia puh a ni a, he thubuai avang hian man a ni. District Court chuan man chhan ziaka pek a nih loh avangin man anihna chu dan kalh a ni tih a lo puang tawh a, nimahsela chu thupek chu Punjab & Haryana High Court chuan a stay a. Supreme Court a thlen hnu chuan, judge-te chuan man anihna chu India Dan Pui kalh a ni tih an nemnghet a, dan lova mi man leh man nawn leh dan tur chungchanga dan zawm tur te an sawifiah a ni.Court chuan police-in dan lova mi an man tawh hnu, man nawn leh an duh a nih chuan, chumi kawnga zawm tur venhimna dan a siam bawk. Police-te chuan dan lova mi an man, chhuah zalen tawh chu an man leh hmain, a hmaa an man chhan chu ziaka an pek hmasak phawt a ngai a, engvanga a hmaa man chhan chu pe lo nge an nih an sawifiah tur a ni a ti a. Tin, Magistrate hnen atangin phalna an la hmasa tur a ni bawk. Court chuan chhui zuina chu officer dang hnenah hlanchhawng turin a ti bawk a, dan lova mi mantu officer chu departmental enquiry hmachhawn tir tur a nih thu an sawi bawk. Departmental Enquiry-a a thiam lohna an hmuchhuak a nih chuan departmental action la in, officer service record-ah ziahlan tur a ni. He thutlukna hi State leh Union Territory tina Directors General of Police hnenah thawn a ni tawh bawk(www.jclalnunsanga.in)(He thubuai hi Jaskaran Jeet Singh vs Sate of Punjab Crl.A. No. 4234/2026, thubuai thehluttu tan Siddharth Aggarwal, Sr. Adv. Leh Yoginder Handoo, AOR leh ukil dangte an ding; a leh lam tan Gopal Sankaranarayanan, Sr. Adv. leh Ajay Marwah, AOR leh ukil dangte an ding)

DISCLAIMER