Kum 2015 khan Republic Vengah Mizo-te chanchina thu lungchhiat thlak leh rapthlak tak mai a thleng a, Pu Sangliansiama te chhungkua chu Misualin luhchilhin mi 5 ngawt mai a that a nih kha. Kha chanchin khan mitin min thawnga, Zoram mipuiu-te kan thin a rim em em a niH kha. Veng neitu Repblic Veng pawhin Tualthattu kha khai hlum ve ngei an duh a, chu chu Zoram mipui duh dan pawh a ni. Chutih laiin Pu HTC Lalrinchhana, Addl. District & Session Judge chuan damchhung tang turin a hrem ta zawk a ni.

Kha thil thleng hnuah pawh khan a khat tawkin kan ramah hian tualthahna rapthlak tak tak leh rawva tak tak a thleng ta fo mai a, mi neih it vang leh mipathmeichhiatna rawngkai tualthahna a thlen rualin chutiang pawh ni chuang lo, suahsual vang hrim hrim pawhin a thleng fo mai. Hmanni lawka tleirawl duhawm tak mai. Ramdinpuii thihna te kha a rapthlakin mitin min thawng a nih kha. Amah laichin hnai ngei maiin dimdawina tel miah lovin an that tawp mai a nih kha. Hetianga rawng taka tualthattu hi chu mipui pawhin khaihlum kan duh fur awm a sin maw le.

India danah hian tualthattu khaihlum (Death Penalty) pek a harsatzia hi kan suangtuah phak lo mai thei a ni. Thi tura hremna pe theitu chu Session Court an ni a, Session Court tih hian an hnuaia Addl Session Court a huam tel tih kha rilruah lo awm ta sela. Session Court hi criminal case a trial khawih theih Court sang ber a ni a, ngaihtuah theih loh khawpa case sang a awm lo a ni ber mai, Special Court ngaihtuah bik tura danin a ruahman a nih si loh chuan....

Session Court rorelna chu a taka kengkawh tur chuan High Court-in a pawmpui a ngai a, High Court-in a pawmpui a nih pawhin Supreme Court-ah ama sumsen ngai lo pawhin appeal theih a la ni ta fo a. Supreme Court pawh chuan thi tura hremna chu lo nemnghehpui pawh nise, President of India hnenah ngaihdam a la dil leh theih a, chumi hnuah meuh chuan kum tak tak a lo liam tawh thin a ni. Khatianga case a kal lai khan lo khaihlum ngawt thei a ni lo. Tichuan, kum tam a lo liam hnuah chuan Thi tura tih pawh, mi then khat chu damchhung jail tan (Life Imprisonment) a thlak sak an ni leh mai thin a, khaihlum tak tak chu tlemte an ni.

Kan hriat tur chu damchhung jail tang tura tihte hi chi hnih ang deuh hian a kal leh a; pakhatna chu damchhung tihah pawh thih hma zawng ( which may extend to imprisonment for life, which shall mean imprisonment for the remainder of that person’s natural life ) tih leh a pahnihna, dam chhung (shall be punished with death or imprisonment for life) tih awm a ni. Tualthat (Murder case) hi a pahnihna zawkah khian a awm a, chutih laiin Pawngsual (Rape) leh kum tling lo mimat hmeichhiatna hmanpuiah pawh hremna na ber chi ah chuan pakhatna hi hman tur a ni thung.

A pahnihna zawk khi kum 25 velah chuan chhuah zalen mai theih an ni tawh a ni. Australia Missionary Graham Stain a te pafa that a, motor nena halhtu pawh kha kum 25 a tling tawh hnuah a chungchang Sate Sawrkar-in a ngaihtuah duh loh avangin tunah hian Supreme Court chuan natakin a kar a, an ngaihtuah loh chuan an mahniin an ngaihtuah mai tur thu an sawi a ni.

Pu Sangliansiama te chhungkua thattute chungchang ngaihtuahtu Pu HTC Lalrinchhana kha a lo fingthiam ngawt mai. Mipui-te pawhin khaihlum tura an duh lai khan a ni chuan damchhung tang turin a ti a, mahse pawisa a chawi tur (Fine) kha a tam hle mai a, ka chiang ta chiah lova Rs. 80 lakhs vel lai a ni. Kha kha a pek theih loh chuan damchhung bakah kum 80 a tan bel dawn tihna a ni. Kan sawi tak ang khan Pu HTC Lalrinchhana khan khaihlum turin lo rel ta sela, High Court/Supreme Court emaw President of India pawhin dam chhung tang turin lo thlak sak ta sela chuan, kum 25 velah chuan a rawn chhuak heu mai dawn a ni. Mahse, Pu HTC Lalrinchhana rorelnaah chuan kum 25-ah lo chhuah theih pawh nise, a chawi tur ai kha kum 80 a tan belh tho tho dawn tihna a ni. Fine pek theih loh avanga jail tantir hi chu Court sangin a tidanglam a nih loh chuan tihdanglam theih tawh loh a ni.

Heng atang hian thi tur meuha inhrem harsatzia a chiang thei mai awm e.- Lalrinchhunga, Advocate.

(Pu Lr Chhunga ti a hriat lar a facebook wall a post ama phalna a chhuah chhawn a ni e)