Dan Zirna lehkhabu, Dr. K. Remruatfela, Advocate ziah chu vawiin ni 7, October 2026 khan Dr. Vanlalsiama Chhangte, chuan Transformation Hub, Temple Square, Aizawl-ah a tlangzarh a, Tlangzarhna inkhawm hi Dr Lalbiakmawia Ngente, President, Mizoram Transformation Movement (MTM) in a kaihruai a ni.

Lehkhabu tlangzarh zawh hian "Rule of Law vs Mob Rule" tih thupui hmangin sawihona neih zui a ni a, dan hre mi leh mi hrang Pu Rualkhuma Colney, Upa R Lalianzuala, Advocate JC Lalnunsanga, Pu Laldingluaia leh Pu C Laizawna ten thu sawiin, dan rorelna vawnnun pawimawhzia leh lungawilohna te dan hmanga chin fel a pawimawhzia leh dan tha neih a pawimawhzia te an sawi a ni. Dan rorelna a that ber rualin 'Mob rule' pawh hi fimkhur taka hman a nih chuan tangkai hun te pawh a nei ve thei tih ngaihdan nei an awm bawk.

Dr. Lalbiakmawia Ngente, President, Mizoram Transformation Movement chuan:

"Dan hriat loh avangin dan hremna lak atangin himna a awm chuang lova, dan hnuaia dikna chanvo kan neih ang chiahin midang pawhin an nei tih hriain, midang dikna palzut lo turin dan hriat theuh i tum ang u' a ti a ni.

Dr. K. Remruatfela hi KL Chhuanvawra leh C.Biakmawii te fa tlum ber ni turin ni 12 July, 1990 khan Serchhip Vengchungah a piang a. Thiamna lamah chuan M.A.(Public Administration); LL.M (Corporate Law) leh Ph.D (Copyright Law) a ni. Eizawnna lamah chuan Gauhati High Court, Aizawl Bench hnuaia Court hrang hrangah te Advocacy (Advocate) hna a thawk mêk thung. A lehkhabu hmasa ber hi 'Finna Rahbi' tih a ni a, kum 2006 khan tlangzarh a ni. Tin, kum 2025 khan 'Mizo Lalte thubuai rem dan a lai tawk em?' tih chu a lo chhuah tawh bawk. Vawiina a lehkhabu thar ber 'Dan Zirna' nen hian avaiin lehkhabu 22 lai a ziak ta a ni. A lehkhabu ziah tam zawk hi Dân lam hawi leh Mizo political history kaihhnawih a ni tlangpui. Tunah hian nupui fanau nein Luangmual, Aizawlah an chêng mek a ni(www.jclalnunsanga.in)