Supreme Court chuan March ni 25,2026 khan Ministry of Home Affairs-in sorkar thil tihna leh zirna in hrang hranga 'Vande Mataram' thunawn zawng zawng sak tur chungchanga hriattirna (circular) a tihchhuah duh lohna thubuai thehluh chu a hnawl. Court chuan he hriattirna hi thurawn ang chauh a nih thu leh tihmakmawh a nih loh thu a sawi.

Chief Justice Surya Kant, Justice Joymala Bagchi leh Justice Vipul Pancholi-te thutkhawmna bench chuan he circular a "may" (thei) tih thumal hman hi thupek ni lovin, mahni thutlukna (discretion) a kawk zawk tih an tarlang a. Chutih rualin, he hriattirna zawm loh vanga hremna tur (penal consequences) tarlan a nih loh avangin, thubuai thehluttute thil phut chu thil chak lo tak a ni tih an sawi bawk.

Senior Advocate Sanjay Hedge chu thubuai thehluttu tan ding sakin ani chuan hremna awm lo mah se, he thurawn hian khawtlangah nawrna a siam thei a, hnam hla (national song) sa duh lo-te tan thliar hranna a thlen tih a sawi. Court erawh chuan he ngaihdan hi "rinhlelhna chiang lo" (vague apprehensions), fiahna mumal leh circular nena inzawmna direct tak nei lo tiin a hnawl a ni.

Thubuai dang avanga court-a lo awm Solicitor General Tushar Mehta chu inrawlhin , "Mipuite hi hnam hla zahna lantir turin thurawn hranpa an mamawh em ni?" tiin zawhna a zawt a, Article 51A(a) hnuaia kan tih tur pawimawhte a tarlang bawk. Mahse, thubuai thehluttu chuan Constitution-in National Flag leh National Anthem zah tur chauh a phut a, 'Vande Mataram' a huam lo tih leh 'patriotism' (ram hmangaihna) chu tih luihnss thleng tur a ni lo tih a hrilh thung.

Court chuan heng hrilhfiahna-te hi pawm lovin, thurawn hian tihmakmawh a nei lo tih a nawn leh a. Inthliarhranna leh intihluina thleng thei tura hlauhthawnna-te chu ngaihruatna mai a ni tih a sawi a ni. Court chuan nakin huna he hriattirna hman chungchanga harsatna dik tak a awm a nih chuan chinfel a nih tur thu a sawi bawk.

Supreme court chuan he thubuai hi 'hun lo taka thehluh' a nih thu sawiin a hnawl a, thupek khauh tak leh hliam tawk mumal a awm loh avangin court inrawlh a tul lo tih a nemnghet a ni. (www.jclalnunsanga.in)

( He thubuai hi Mohammed Sayeed Noori Vs Union of India; WP(C) No.341/2026 a ni a. Thubuai thehluttu tan Senior Advocate Sanjay Hedge a ding a ni.)