Ni 1 June, 2026 (Thawhtanni) khan Supreme Court chuan a nghet lova rei tak lo thawk tawhte chu, a ngheta lakluh ni lo mah se, pension hamthatna an dawn theih thu an sawi.Division Bench, Justice Sanjay Karol leh Justice Augustine George Masih te chuan a nghet lova hnathawktute chu sorkarin an hna a tihngheh theih loh avang ngawtin pension pek loh tur a ni lo, a ti. He thubuai hi Department of Posts-a nghet lova lo thawk tawhte leh hnathawktu boral tawhte chhungte, kum sawm tam tak lo thawk tawh, mahse pension-a an chawlh hnua pension hamthatna pek lohte chungchang a ni a. Patna High Court chuan hnathawktu nghet an nih loh avangin an ngenna hi a lo hnawl tawh a ni.

Heng hnathawktute hi kum 1971 leh 1981 inkarah a nghet lova thawk turin lak an ni a, pension-a an chawlh thlengin an thawk a. Casual Labourers (Grant of Temporary Status and Regularisation) Scheme, 1991 hnuaiah temporary status pek an ni a. Kum 1992-a circular tichhuahin a tarlan danin, temporary status hnuaia kum thum thawk tlingte chuan temporary Group ‘D’ hnathawktute dawn ang hamthatna an dawng ve thei dawn a. Heng hamthatnate hi dawngin kum tam tak thawk mah se, an hna hi tihngheh a ni ngai lo. Pension-a an chawlh hnuah, thuneitute chuan pension leh family pension an ngenna chu an hnawlsak a ni.

Supreme Court chuan he Scheme hi a nghet lova thawktute dinhmun leh an social security tihhmasawn nana duan a ni tih a hmu a. Court chuan pension hi mi khawngaih vanga thilthlawnpek ni lovin, kum tam tak thawh hah vanga chanvo a ni, a ti bawk. Temporary status-a hnathawktu, hun bi tuk thawk tling tawhte chu tihngheh an ni emaw, ni lo emaw CCS (Temporary Service) Rules, 1965 hnuaiah pension dawng thei an ni, a ti a. Chuvangin, Court chuan Patna High Court thutlukna chu thiatin, thuneitute chu thla thum chhung ngeiin pension leh pension hnu-a hamthatna dangte pechhuak turin a hriattir a, an pechhuak lo a nih chuan a pung kum khatah 6% zel pek tel tur a ni, tiin thutlukna a siam a ni(www.jclalnunsanga.in)

(He thubuai Bhikhani Devi & Etc. v. Union of India & Ors. (Neutral Citation: 2026 INSC 612) ah hian thubuai thehluttu tan Advocate Akhilesh Kumar Pandey a ding a; a leh lam tan ASG Bijender Chahar; Amrish Kumar AOR leh ukil dangte an ding)