Ni 1, December 2025 (Thawhṭanni) khan Supreme Court, Division Bench, Justice Vikram Nath leh Justice Sandeep Mehta te chuan, Sanjay Kumar Gupta vs. State of Uttar Pradesh thubuaiah, High Court-in pawikhawihtua puh laka FIR a ṭhiat duh lo a nih chuan pre-arrest bail (anticipatory bail)  an phalsak theih loh thu an sawi. Court chuan pre-arrest bail chu Sessions Court aṭangin pawikhawihtua puh chuan a dil tur a ni, tiin an sawi a. Pre-arrest bail chu  Uttar Pradesh sorkar chuan an dil theih thu an sawi a; amaherawhchu, writ petition kaltlanga man theihna laka venhimna dawng turin High Court hnenah kal nghal tur a ni lo, tiin Bench chuan an sawi. Mi tu pawh pawikhawihtua puh a nih emaw, dan kalha che a puh a nih chuan, pre-arrest bail chu phalna pe theitu, Sessions Court aṭangin a dil hmasa phawt tur a ni, tiin an sawi a. High Court-in writ jurisdiction a neih chu in bail chhuahna hmun atan hman tur a ni lo, tiin Bench chuan an sawi a ni.

Eng nge pre-arrest bail chu?

Pre-arrest bail (anticipatory bail) hi mi tu pawh, bail theih loh thila man a nih hma pawha bail-a chhuahtir theihna a ni a. Pre-arrest bail hi High Court emaw, Sessions Court-in an pe thei a. Mi tu pawh, bail theih loh thila pawikhawihna chungchangah an man dawna a inhriat chuan Section 482, BNSS hnuaiah pre-arrest bail hi a dil thei a ni.

Thubuai Chungchang leh Supreme Court Ngaihdan:

He thubuai hi Allahabad High Court thutlukna khinletna a ni a, High Court chuan he thubuaiah hian pawikhawihtu laka FIR theh luh chu a sut duh lova; nimahsela, pawikhawihtua puh hnenah hian chargesheet an theh luh hma thleng daih turin, man theihna laka ven himna (pre-arrest bail) pek a phalsak a ni. He thil thleng hian thubuai chhuina kawngah thil pawi a thlen theih thu Court chuan a sawi a. Tin, Bench chuan High Court-in he thupek a siam hian awmze nei tak leh chhia leh ṭha hriatna nena chhutna a awm lo, tiin an sawi bawk. FIR theh luh chu sut duh lo tur khawpa pawikhawihna lian a nih chuan man lohna tura ven himna chu awlsam taka pek tur a nih loh thu an sawi.

Supreme Court chuan an thutlukna hmasa, chutih hun laia CJI, Dr. DY Chandrachud kaihhruaina hnuaia thutlukna an lo siam tawh,  Neeharika Infrastructure (P) Ltd. v. State of Maharastra thubuai chungchang an tarlang a. He thubuaiah hian High Court chuan  Section 482 CrPC emaw, India Danpui Article 226 hnuaia petition theh luh a tihtawp chuan, man phal lohna thupek emaw, chutiang ang thupek chu chhui zuina neih lai emaw, chhui zuina an neih zawh thleng emaw, final report/chargesheet emaw Section 173 CrPC hnuaia an theh luh thlengin an phalsak theih loh thu a sawi.

Supreme Court chuan High Court order pahnih (Dt.16.06.2025 leh 15.07.25) te chu a sut a. Ngaihtuah ṭhat leh turin High Court hnenah an thawnkir a. Bench chuan petition sutna chungchang hi a thara ngaihtuah ṭha turin leh a hmaa thu ngaihthlak tawh zawng zawngah chuan innghat lo turin a ti a ni. High Court order chu sut ni mah se,  man theihna laka ven himna an  pek lailawk tawh chu phal chhunzawm a nih thu an sawi thung a. He ven himna hi High Court-in thubuai a ngaihtuah fel hma chu a huam ang a. Supreme Court chuan January ni 7, 2026 aṭanga chhiara thla li chhungin he thubuaiah hian thutlukna siam turin a ti a ni. (www.jclalnunsanga.in)

(He thubuai  SPL(Crl) No.17464-17465 of 2025, Sanjay Gupta Vs State of UP-ah hian thubuai thehluttu tan Roopansh Purohit, AoR a ding a. Lehlam tan hian Ratnakar Dash Sr, Adv, Shashank Shekhar Singh, AoR leh mi dangte an ding a ni.)