Chief Justice of India, Surya Kant-an ni 15, May 2026-a thalai hna nei lote leh activist hrang hrangte chu 'Cockroach" tia a sawi hnua, online movement lar tak lo awm ta , “Cockroach Janta Party (CJP)” te chet lakna thil hrang hrangte CBI chhui tir tura ngenna chu Supreme Court-ah thehluh a ni a. He ngenna hi Advocate-on-Record(AoR), Raja Choudhary thehluh niin, hemi piah lamah hian tunhnaia Bar Council of India, Chairperson-in ukil 30%-40% te chu a lem a ni tia a sawi hnuah, ukil lem leh law degree lem chungchanga hmalakna nei turin a phut bawk a ni. He ngennaah hian ukil te tana nundan tura tehna chu a hniam tial tial a, hei hian mipuiin rorelna in (judiciary) an rinna chu a tihchhiat phah hle niin a sawi a, rorelna in te hi vantlang mipuiin an rinnaa innghat a ni a, hetianga court chhunga thusawi tawi te te siam a, thehdarh a nih hian rorelna zahawmna a tihchhiat thu a sawi bawk.

He ngennaah hian May 15,2026 a Supreme Court-a CJI, Surya Kant-a thusawi chu, a hmuna thil thlen dan kimchang hre miah lovin tawi te tein an chep tawi a, social media-ah nasa takin an thehdarh ta niin a tarlang a. Hemi hnu lawk hian fiamthua din “Cockroach Janta Party” chuan online-ah follower maktaduai tam tak a nei ta bawk a ni. He ngennaah hian court-a CJI thusawi chu meme, milar nih tumna leh online lama sumdawnna (branding) atana hman zui a ni ta tih a sawi a. Tin, court rorelna chu sawisel theih a ni a; nimahsela, court chhunga thusawite chu sumdawnna atana lo hman phal a ni lo, tiin a sawi bawk.

He ngennaah hian sawiselna leh fiamthua thu sawite chu duhzawng sawi tura zalennain a huam mah se, court-a thil sawite chu sumdawnna hmanrua atana hman emaw, trademark leh publicity atana hman emaw a ni tur a ni lo tih a sawi thung. Court chuan “Cockroach Janta Party” tih hming hmang hian trademark dilna tam tak thehluh a nih tawh thu a tarlang bawk. He ngenna hian ukil lemte chungchang leh court-a thil sawi lante chu sumdawnna atana hman a nihna lakah hian chhuina chiang zawk neih a phut a ni.

He hemi sawitu ngie CJI Surya Kant chuan hemi chungchang ngaihtuah thuai tura ngenna thlen chu hmanhmawhthlaka a ni lo tiin a phalsak lo a, case list dan pangngai a list a ni ang. CJI Kant thutpui Justice Joymalya Bagchi leh Justice VM Pancholi-te chuan , " Heng thil hi lak nat vak tur a ni lo" tiin an sawi. (www.jclalnunsanga.in)