Supreme Court chuan December ni 5, 2025 khan bail chu police station-a in report loh vang ringawtin sut theih a ni lo a ti. He thutlukna hi Sheikh Irshad @Monu-a appeal thehluh atanga lo chawr chhuak a ni a, ani hi Bombay High Court, Nagpur Bench-in a bail an lo sut sak tawh a ni.

Justice JK Maheshwari leh Justice Vijay Bishnoi-te thutna bench chuan he thubuai hi ngaihtuahin appeal chu an phal sak a. Bail order chu a ngai awhtirin, High Court bail sut thutlukna chu a thiah sak a. Tin, report tura thu a zawm loh avangin High Court chuan a bail chu a sut sak thei lo tih a sawi bawk.

An Buaina Bul:

Irshad-a (Thubuai thehluttu) hi kum 2020 khan Gittikhadan Police Station, Nagpur-a NDPS Act hnuaia Section 20 leh 29-ah leh Maharashtra Control of Organized Crime Act (MCOCA)-a Section 3(1)(i)(ii), 3(2) leh 3(4) hnuaia FIR register pakhatah puh a ni a. He thubuaiah hian Ganja 2kg 728g man a ni.

Kum khat leh thla sawm pakhat dawn police kuta a awm hnuah,  Bombay High Court chuan bail phal sakin kum 2022 August thla khan a chhuak a. Tualchhung police station-ah thla tin ni 1 leh ni 16-ah inlan turin court hian a hriattir bawk.

Supreme Court Ngaihdan leh Thuchhuah:

Supreme Court chuan bail pek a nih hnuah, investigation chu zawhfel a nih tawh thu leh chargesheet chu thehluh a nih tawh thu a hmu a. Sessions Court ah thubuai hi ngaihtuah mek a ni a. Tin, thubuai thehluttu Irshad-a hi a tul angin trial court hmaah a inlan fo tih a sawi bawk.

Supreme Court chuan High Court bail sutna chu thiatin, a tira bail an phalsakna chu a pawm sak a . Court chuan thubuai thehluttu chu bail a zawm theih tur thu sawiin ,trial court hmaah thuchhuah dang a awm a nih loh chuan a tul angin inlan zel turin a hriattir bawk (www.jclalnunsanga.in).

( He thubuai hi Sheikh Irhsad @Monu Vs State of Maharashtra, Criminal Appeal @SLP(Crl) Diary No. 60194 of 2025 a ni .)