Vawiin ni 27, November 2025(Ningani) khan Supreme Court, Chief Justice Surya Kant leh Justice Joymalya Bagchi te chuan Delhi-National Capital Region (NCR) a boruak chhe zel chungchanga ngenna chu ni 3, December 2025 a ngaihtuah an remti. Amicus Curiae, Senior advocate Aparajita Singh chuan Delhi-NCR a boruak chhe nasa zel avang hian, vantlang hriselna atana pawi thei a thleng zel a, hemi avang hian he buaina hi a hma thei ang bera ngaihtuah a, court thupek chhuah vat turin a ngen a ni. Ni 19, November 2025 khan Supreme Court chuan Commission for Air Quality Management (CAQM)  te hnenah, November thlaa pawnlama sikul sports neih tur chu boruak that huna sawn tura ti turin a lo ti tawh a ni.

Chief Justice Surya Kant chuan air pollution chungchanga a thlirdan chu a sawi a. Air pollution chungchanga mawhphurtu hi thil pakhat chiah a ni thei lova, thil tam tak vang a ni thei tiin a sawi. Chief Justice kalchhuakta BR Gavai kha chuan Punjab a lo neitute thil hal thin chu air pollution thlentu te zinga a ngaihpawimawh a ni a. Chief Justice Surya Kant erawh hi chuan lo neitute chauh ni lovin air pollution thlentu chu thil tam tak an nih theih thu a tarlang.

Tukin zing khan Delhi chu chhum chhah takin a khuh chhunzawm zel a, boruak quality chu ‘very poor’ category-ah a awm chhunzawm zelin. Zing dar 7am a AQI chu 349 lai niin Central Pollution Control Board (CPCB) chuan a tarlang.

Chief Justice Surya Kant chuan,“Eng dawi tiang nge rorelna kengkawhtu lam hian kan hman theih ang? He thil hi Delhi-NCR tan chuan hlauhawm tak a ni tih ka hria a. He buaina hi chu kan hre vek a. Kan buaipui tur ber erawh chu eng nge a chinfel dan tur tih hi a ni. A chhan kan hriat chian a ngai a, a chinfel dan tur chu hemi lama mithiam te chauhin an pe thei a. Hun rei tak daih tur chinfelna hmuh a nih kan beisei a ni,” tiin a sawi(www.jclalnunsanga.in)