M/S J Infratech Ltd. Kawngpui Siam Hnathawh Danah Gauhati High Court Lungawi Lo;Hnathawktu leh Hmanraw Hman Tipung Turin Hriattir

Ni 11, March 2026(Nilaini) khan Gauhati High Court, Aizawl Bench chuan  kawngpui chhe siam chungchanga PIL thehluh chu a ngaituah leh a. Division Bench, Justice Budi Habung leh Justice Kaushik Goswami te hian he thubuai hi ngaihtuahin, M/S J Infratech Ltd. te hnathawh danah an lungawi loh thu an sawi a ni. M/S J Infratech Ltd. te chu kawngpui siamna atana  thawktute leh an hmanraw hman te pawh a let a tipung turin a hriattir a, an hmalakna tarlanna affidavit chu ni 24, March 2026 hmaa thehlut turin an hriattir a. Hetianga an ti lo a nih chuan, thubuai ngaihtuah a nih leh hunah, a buaipuitu officer chu amah ngei inlan tura hriattir a nih tur thu an sawi bawk.

M/S J Infratech Ltd. te chuan hna thawktute leh an hmanraw hman an tihpun tawh thu  sawiin, a theih anga hmaa hnathawh zawh vat tum a tan an lak thu an sawi a. Nimahsela, thubuai thehluttu chuan order hmasa anga a hmuna an hna thawh dan te an endik tawh thu leh, kawng dinhmun chu a la chhiat reng thu Court hnenah a thlen a. Court chuan Km 72 - Km 95 (Bilkhawthlir - Kolasib), Km 118 - Km 133 (Kawnpui -Khamrang), Km 147.8 to Km 159 (Buichali -Sairang) kawngpui siam zawhna tura hun ruat chu April 2026 a nih avangin leh fur a lo thlen thuai dawn avangin, M/S J Infratech Ltd. te hmalakna leh an hnathawh dan chu an duh khawp loh thu an sawi a. Fur thlen hmaa an thawh zawh hman loh chuan buaina nasa zawk a thlen theih thu leh, hnathawh a khailak chhunzawm phah theih thu an sawi bawk. He thubuai hi March 25, 2026 a ngaihtuah leh tur a dah a ni(www.jclalnunsanga.in)

(He thubuai Mizoram Truck Drivers Association vs. SOM & 11 Ors. ah hian thubuai thehluttu tan Adv. Emily L Chhangte leh Adv. Lalrinawmi Chhakchhuak te an ding a, a lehlam tan Addl AG/GA, Zairemsangpuii AGA, Adv. Anil Kumar leh ukil dangte an ding)