Vawiin ni 8, October 2026 (Ningani) khan Mizoram Bar Association (MBA) te leh High Court Bar Association, Mizoram te chuan Gauhati High Court(Aizawl Bench) Bar Room-ah Justice Helen Dawngliani, High Court judge lawmpuina hun an hmang a. He hun hi High Court Bar Association President, Senior Advocate Pu C. Lalramzauva chuan kaihhruaiin, lawmpuina hun hlimawm leh hlawkthlak tak hman a ni.

Mizoram Bar Association (MBA) aiawhin Advocate Rosaline L Hmar chuan lawmpuina thilpek a hlan a. High Court Bar Association aiawhin Advocate Vanneihsiami’n lawmpuina thuziak a hlan bawk.

He hunah hian MBA aiawhin, MBA President Advocate Lalremruata chuan lawmpuina thu a sawi a. High Court Bar Association aiawhin Vice President, Senior Advocate Pu LH Lianhrima’n thu a sawi bawk. Tin, a duh apiang tan thusawina hun hawn a ni a, he hunah hian Senior Advocate Dinari T Azyu, MBA General Secretary Advocate R. Lalhmingmawia leh  Advocate Lalremtluanga te’n lawmpuina thu an sawi a ni.

Justice Helen Dawngliani chuan MBA te a tana an hlutna leh tun dinhmun a thlen theih nachhan chu Bar-in an support tlat thin vang a nih thu a sawi a. Ukil hna a thawh thin lai chuan ukil ho chu chhungkua ang mai an nih thu leh an inpuih nasat thin thu te a sawi a. Tun dinhmun a thlen theih nana MBA in atana hma an lakna te a sawi a. Ukil naupang zawk te tana fuihna thu tha tak tak a sawi a, Ukil te chu nitina an tih tur chu tha taka ti zel turin a fuih. Judiciary zahawmna vawnhim pawimawhzia te a tarlang a ni. Justice Helen-i chuan inngaitlawm takin Bench-ah chuan nausen ang chauh a la nih thu leh zir tur a la ngah thu a sawi a. Ukil hna a thawh thin lai leh tun dinhmun chu a inthlauh thu te tarlangin, hmasawnna nasa tak Bar-ah pawh a awm thu a sawi a. Ukil-te chu inpui tlang dial dial tur an nih zia leh, midangte hmasawnna tur atana puih hreh lo turin a chah bawk.

“Pathian enkawlna leh a tanpuina tello chuan he hna hi kan thawk thei lo va. Pathian chuan a hun teah min chawisang thin a. Mahni tih tur hi ti ve mawp mawp mai i la, “One day at a time” tih hi zir i la, rilru ngil tak pu chungin, hmanhmawh tut tut lovin, Pathianin mi zawng zawng a inang vek a ni khat a darkar 24 min pek hi engtin nge ka hman dawn tiin, inzawt thin i la. Nimin a ka thil tih dan aiin vawiin a ka thil tih danah hma ka sawn em tih inzawt zel chungin, darkar 24 Pathianin min pek hi hman tangkai tum theuh ang u” tiin Justice Helen Dawngliani chuan a thusawi a khar a ni.

Senior Advocate Dinari T Azyu chuan Justice Helen Dawngliani nena ukil hna an thawh tan tirh atanga an zinkawng bumboh tak chanchin te a sawiin Justice Heleni hi High Court Judge kan neih tawh zawng zawng a experience nei tha ber- private ukil, sawrkar ukil, district judge, High Court Registrar, Law Dept Secretary te lo ni tawh a nih thu a sawi. Sr. Adv Dinari chuan nitin hun hman that pawimawih zia sawiin, “Kan tih tur nitin rinawm takin ti ila, kan chanvo tur chu Pathianin a ruat ang tih ka ring” tiin fuihna thu a sawi bawk.

MBA Secretary Pu Lalhmingmawia leh senior member Pu Lalremtluanga ten an practice tirh laia Justice Heleni an tana a tangkai thin zia te an sawi.

Thusawitu hrang hrang te chuan Justice Helen-i chu mi thliar hrang ngai lo, duhsak bik nei ngai lo leh Pathian tih mi a nih zia an sawi a. Mi rilru tluang a nih zia leh  nakin zelah pawh rorelna dik  thlentu a nih ngei an rin thu an sawi a. District Court-a a thut lai pawh a sawiselna an neih loh thu te an sawi a. A kal leh zelna turah duhsakna an hlan mawlh mawlh a ni(www.jclalnunsanga.in)