Vawiin ni 1, October 2026 (Ningani) khan Gauhati High Court chuan Health Worker post 100 direct recruitment-a la tura Mizoram Sorkar-in advertisement a chhuah tawh chu a thiat a. Tun dinhmun a National Rural Health Mission (NRHM) hnuaia Contract Health Worker thawktu awm zingah a ngheta dah theih an awm em tih ngaihtuah hmasa a, chumi hnuah advertisement thar chhuah leh turin a hriattir.

Justice Mridul Kumar Kalita chuan State Sorkar chu post awm zat atangin engzah nge Government of Mizoram Regularization of Centrally Sponsored Scheme (CSS) Employees Scheme, 2024 (2024 scheme) hnuaia hna thawk lai mek, contract Health Worker-te zingah a ngheta dah theih an awm em tih chhut hmasa turin a hriattir a. Court chuan direct recruitment tura post bang la awm te a advertisement an chhuah leh hmain  2024 scheme dan leh kaihhruaina angin sorkar hian a ngaihtuah hmasa phawt tur a ni a ti.

He thubuai hi Health Worker 72, kum 2007-a Health Worker Training zo leh National Rural Health Mission (NRHM) hnuaia contract-a thawk tura lakte thehluh a ni a. Mission Director, National Health Mission, Mizoram State Health Society (MSHS), Aizawl chuan DPC/Selection Board-te recommend-na angin thawktu atan a la a. Thla 4 chhung atan chauh thla khata  Rs. 7,000 hlawh tura lak phawt an ni a, mahse an contract hi pawt sei zelin chawl miah lovin kum 18 chuang an thawk zui a ni.

Kum 2017 khan Health Worker ve tho 93 te chu special recruitment scheme hnuaiah a ngheta dah an ni tawh a. Hemi hnu hian CSS hnathawktu 354 chuang erawh contract-in an la thawk a. Chumi hnuah, CSS hna thawktute ngenna angin kum 2024 khan Mizoram Sorkar chuan CSS employee-te a ngheta dah an nih theih dan tur scheme a siam a. Nimahsela, July 2025 khan Sorkar chuan kum 2024 scheme anga a nghet a dah theih tur an awm leh awm loh pawh enfiah hmasa lovin direct recruitment kaltlanga Health Worker post 100 la turin advertisement a chhuah a. Thubuai thehluttute hian CSS hnuaiah thawktu 354 chuang contract-a thawk an la awm  mek a, contract-a thawktu awmsa te pawh a nghet a dah an la nih loh lai a, direct recruitment-a thawktu 100 chuang la tura sorkar-in advertisement a chhuah chu an duh lo hle a. Tin, kum 2024 scheme zul zui ni lova sorkar-in Advertisement No. 4 of 2025, No. A.12011/1/2025-DHS/MPW, dated 22.07.2025 kaltlanga  Health worker (Group ‘C’ post) te direct-recruitment a la tura advertisement a chhuah chu duh lovin he thubuai hi an thehlut ta a ni.

Court chuan 2024 regularisation scheme chuan CSS employee te tan rinna leh beiseina a siam sak tih a sawi a. Court chuan Sorkar chu scheme Clause 3 anga chet la phawt tur an nih thu leh, chumi hnua regularization atana post la awm te chhut chauh tur an nih thu a sawi a. Court chuan 2011 Recruitment Rules hnuaiah hian thawktu atana lak dan, kum leh qualification-ah te hriatthiamna a awm thei tih a hmu a. Nimahsela, Court chuan kum rei tak an thawh avang chauh erawh chuan a ngheta dah/lak theihna dikna chanvo an nei lo tih a sawi. Court chuan 2024 Scheme Clause 4-a eligibility condition-te chu an neih ngei a ngaih thu an sawi chiang a. Tin, Court chuan Sorkar-in Advertisement a chhuah hma a 2024 scheme anga an ngaihtuah hmasa lo chu Constitution Article 14 leh 16 hnuaia thubuai thehluttute dikna chanvo bawhchhiatna a ni a ti a. Chuvangin, advertisement hmasa chu thiatin, sorkar chu regularisation tur leh direct recruitment tur post zat chhut chhuak hmasa a advertisement thar chhuah leh turin a hriattir a ni(www.jclalnunsanga.in)

(He thubuai hi Manluni & 71 ors vs State of Mizoram & 4 ors WP(C)/104/2025 a ni a. Thubuai thehluttute tan hian Senior Advocate Pu C. Lalramzuava leh Advocate Stephen Lalbuatsaiha te an ding a, Mizoram sorkar tan Government Advocate Lalnunhlui a ding)