Ni 6, August 2026 khan Gauhati High Court, Aizawl Bench chuan Special Judge, Prevention of Corruption Act, Aizawl-a skywalk kaihhnawih eiruk thubuai kal mekah, Pu John Rotluangliana leh Pu Robert Romawia Royte laka charge siam tura hmalakna chu a stay rih a. Thubuai thehluttute hian Special Court-in 24 June, 2026-a an laka charge siam tura hma lak tumna thupek chu an khing a ni.

Thubuai thehluttute ukil hian Bharatiya Nagarik Suraksha Sanhita, 2023 hnuaia Section 250 anga charge siam a nih hmain discharge dilna hun siamsak a nih loh thu a sawi a. He thubuai hi Justice Budi Habung-a chuan a ngaithla a. Special Judge hian thubuai thehluttute lakah hian thubuai siam turin IPC Section 120B, 409, 420 leh Section 13(2) r/w Section 13(1)(a) &(b) of PC Act, 1988 ah te thubuai chhui zui zelna tur a awm thu a record tih Court hnenah hriattir a ni a. Nimahsela, charge fel tak, a taka siam erawh a la ni lova. Tin,  petitioner te discharge dilna chu Special Court-a an thehluh tawh thu leh a la pending mek thu a hmu a. Thu thlen tarlante hi pawmin, Court chuan SR(PCA) No. 2 of 2026-a thubuai thehluttute laka charge siam tura hma lakna zawng zawng chu he thubuai ngaihtuah a nih leh hma thleng stay a ni ang tiin thupek a chhuah a. Thubuai hi 17 August 2026-a ngaihtuah leh turin a ruahman a ni(www.jclalnunsanga.in)

(He thubuai Robert Romawia Royte vs SOM Criminal Petition No. 23 of 2026 leh John Rotluangliana vs SOM, Criminal Petition 22 of 2026 ah hian Petitioner aiawhin Adv. B. Lalramenga a ding a, sorkar aiawhin Vanneihsiami, Additional Public Prosecutor leh Mizoram Lokayukta aiawhin Mr. C. Lalfakzuala, Special Public Prosecutor te an inlan thung)