Ni 6, August 2026 khan Bombay High Court, Goa Bench chuan Tehelka editor-in-chief hlui Tarun Tejpal chu kum 2013-a a hnuaia thawk hmeichhia pawngsual thubuaiah thiam loh a chantir ta. Justice Neela Gokhale leh Justice Amit Jamsandekar te ṭhutna Division Bench chuan Mapusa-a Sessions Court-in kum 2021-a  thiam a chantirna chu paihin, Indian Penal Code Section 376(2)(f) & 376(2)(k) leh 354A, 354B hnuaia pawngsual leh mipat hmeichhiatna kawnga pawikhawihah thiamloh a chantir a ni. Hremna a hmuh tur erawh hrana ruahman a ni ang.

He thutlukna ngaihthlak a nih lai hian Tejpal-a pawh Court-ah hian awm a ve reng a. Tejpal chuan kum 62 a nih tawh thu te, nupui a neih thu leh he thilah hian a tuartu ni ngeia a inhriat thu te sawiin,  a chunga zahngaihna lan tir turin ngenna a thlen a. A ukil pawhin thiam loh chantirna thupek hi supreme court-a an appeal theih nan, kar riat chhung atana stay turin a dil bawk. Mahse, Goa sorkar aiawha inlan Solicitor General Tushar Mehta chuan an ngenna chu dodalin, he court hian mipui hnenah thu chiang takin a thawn chhuak tur a ni- hmeichhiain aih a tih tawh chuan aih tihna ni mai, “Aih tih awmzia chu aih” tiin a sawi a ni.

Goa Police-te chuan thubuai hi an ziak lut a, November 30, 2013 khan Tejpal hi an man ta a ni. Kum 2014-ah charge sheet thehluh a ni a, Sessions Court chuan May 2021 khan thiam a chantir a, mahse State chuan hma lak chhunzawmin, High Court-ah an appeal leh a. High Court chuan thiam loh chantirna thupek hi a chhuah ta a ni(www.jclalnunsanga.in)

(He thubuai hi State of Goa vs Tarun Tejpal CRIA 16/2022 a ni)