Allahabad High Court chuan Uttar Pradesh(UP)-a Hindu unau hmeichhe pahnih chu Muslim-a an inleh avangin, an chenna inah an unau hian an pain a hrengbet/khuahkhirh a ni tih a hmu a; tin, Uttar Pradesh sorkar chuan hemi chungchangah hian hmalakna an nei lo bawk tih Court chuan a hmu a, hemi avang hian hmeichhe unaute pa leh UP sorkar chu zangnadawmna Rs. 25 lakhs chawi  turin thupek a chhuah.

He thubuai hi Diya Bhatia (kum 20) leh Anshu Bhatia (kum 35) te chungchang a ni a; an unau hian court-ah inlanin, kum 2021 leh 2020 khan anmahni duhthlanna ngeiin Hindu sakhua atangin Islam sakhuaah an inleh thu Court hmaah an sawi a. An thutlukna siam chu anmahni rinna, chhia leh tha hriatna a nih thu leh; an sakhaw inlehnaah hian tharum thawhna, bumna, nawrna emaw inthlemna engmah a tel loh thu Court an hrilh a. Justice Sandeep Jain chuan heng hmeichhe pahnihte thusawi a ngaihthlak hnu hian, an thusawite chu  anmahni duhthlanna ngeia sawi a ni tih a nemnghet a ni.

Court chuan hmeichhe pahnihte chu puitling an nih tawh avangin an sakhaw rinna, chenna hmun leh mimal nun chungchangah mahni a thutlukna siam theihna dikna chanvo chu India Danpui hnuaiah an nei tih a tarlang a. India Danpui Article 21 leh 25-na te tarlangin, chhia leh tha hriatna hmang tura zalenna  hian puitlingin mahni duhthlanna ngeia sakhaw thlan emaw, hnawl emaw ,thlakthleng theihna dikna chanvo emaw a huam tel vek tih a sawi bawk.

Sakhaw inleh kawngah Uttar Pradesh dan zawm a ni em tih chu a hranpaa enfiah theih a nih thu Court chuan a tarlang bawk a; sakhaw inleh dan chu bawhchhiat ni ta pawh ni se, chu chuan hmeichhe puitling pahnihte, an duh loh chunga dan lova khuahkhirh/hrenbeh chu thiam a chantir thei chuang lo a ni. Sorkar thuneitute chu hmeichhiate zalenna humhalhsak kawngah an chet an la lo a ni tih hmu bawk. He dan bawhchhiatna hi thil pawi leh liantham tak a nih avangin, zangnadawmna Rs. 25 lakh chu hmeichhe unaute pa leh State sorkar hian a inzat a inchawi turin thupek a chhuah ta a ni.

Chutih rualin, an pa chu an passport, zirna certificate-te, identity document-te, bank record-te leh an thil dang neih zawng zawngte pe let vek tura hriattir a ni a; an mimal zalenna, chetvel/veivahna, chenna hmun, eizawnna leh sakhaw thlanna kawngah inrawlh tawh lo turin khap a ni bawk. Court chuan nu leh pate thuneihna hian an fa puitling tawhte dikna chanvo leh mimal zalenna chu a luahlan thei lo a ni tih a sawi bawk(www.jclalnunsanga.in)

(He thubuai hi Kunwar Sultan Ali & 2 Others vs. State of U.P. & 3 Others 2026 a ni a. Thubuai thehluttu tan hian Adv. Ali Bin Saif, Adv. Kaif Hasan leh ukil dangte an ding a,UP sorkar tan Addl Advocate General Manish Goyal leh AGA Pankaj Saxena te an ding)