Ka Thianpa Dindina MCS Tling Ka Lawmpuina

Thuziak thiam ka ni lo a. Thahnem ngaihna avangin ka thiam zawng dan leh hrai, court rorel thar ber ber te rintlak thei tur berin an official website leh dan lam ziakna atang te in ka law firm a ka naute hovin ziak zawm tur leh tur lo pawh hre lovin kan han ziak ve tan a ni a. Chutiang kara ka thu hriat  ka tleirawl tirh atanga  ka thianpa Dindina’n Department kal tlanga MCS (Departmental Exam kaltlanga MF & AS tling hlim hlawl) a tlin chuan min ti lawm em a. Ngawih bo pui mai atan chuan ka ui a,ka lawmpuina ziaka dah a phu ka ti.

 In hriat tanna :

Ka thianpa hi kan inhriat tan chhoh dan chu BHSS a Class XI (SC) kan zir laiin Lunch Break ah pawisa kan ui  (nei lo) hi Christian Hospital kawt dawr atanga Cream Roll tlawn khat leiin Serkawna Saptuiah Saptui thianghlim tak nen kan va ei thin a. Mizo medium chhuak kan nih avang kan sir te biakah kan buai thin hle a, English in zir kan tum a.  Kan class bang hi English inzir nan ke ngata hawin mi tlemna hmun Lungchhe ngaw velah English te khan kan in be thin.

 An unau chenna kha ‘Buk In’ ang ka ti:

Tum khat chu lehkhabu hawh turin an chenna ah ka zu kal a, Rahsi Veng mawng lamah an lo awm a. An inluah mek chu ka zawng hmu mai a, an chenna tak kha ka khawngaih zawk. Keini chu engmah ni lo mah ila an unau a an lo chenna kha christmas dawna kan thian zaho va buk kan sak hi a ang ka ti tlat pek a. A nu leh pa Thehlep khuaah an la awm a, ama hovin an awm ve nawk nawk kha a ni a. A hnu deuhah a nu leh pa te Lungleia an lo pem chuan an in luah thin aia thlangah an awm a. A nu leh pa, leh a naute ho nen hi inpawhna thuk tak kan nei a. Ka lengin chaw te pawh ka ei tawh. A nu hian min fapa en a, a unaute ho hian  tun thleng hian min u en em em bawk.

 Ka nu leh pa ten an fak:

Chanchin kan inhretawn tawh lo vang vang a. Mizoram University hnuaiah BSc (Botany) ah Lunglei Government College atangin pakhatna a ni tih ka hria a. A hnu deuhah ka pa te thawhnaah (PWD) sum enkawltu(ADA/AAO) a lo ni tawh a. Ka nu leh pa te hian an fakin fel an ti thin hle a. Class 11 kan zir laia T-Shirt ban tlawn ka pek (kei chuan ka hre tawh lo a) te hi a lo sawi fo thin a. Ka nu leh pa te hian min hrilh nuam an ti thin. Ka pa thianpa ber,  Dindina thawhna a pu Pu Zorama(DA) hian Dindina hna thiam zia, taimak zia leh fel zia hi a sawi fo thin.

A unaute tan a in pe pumhlum :

A nau Dr Hmingmuana ‘n facebook-a a thuziak hian a sawi chiang hle.

Mahminga Sailo : Ka U pualin...

“Pathian malsawmna azarah Mizoram University hnuaiah B.Sc (Botany) topper a nih khan, duhsaktu thenkhat chuan Civil Service exam turin an rawn a, mahse kan chhungkaw dinhmun a hrethiam a. Kei lah, mahni ngaihtuah ang angin Leitlangpui pel ngeia college kal tum ta hrim hrim kha ka lo nia! Ka U hian hna a hmuh hmasak ang ang thawkin, a hun neih remchan apianga tuition pe bawkin chhungkaw tan a thawk thin a. Chuvangin, kum 20 liam taa exam a chak ruk ve tak kha, hnathawk zel chungin MCS a tling ve ta! Amah pawn a beisei ngam chiah lo va, mahse tling zingah a tel tlat si. Kan va lawm em!

Kawng min sialsaktu ka U...

Thehlep atangin chhungte ina awm chungin High school a kal ve rawih a. Class-ah Pakhatna a nih thin avangin, pawl 8 ka nih khan ka U anga pakhatna ni ve turah min han ngai ngawt a. Nia, tlanchhe chunga eirawngbawl paha lehkha zir ve mai mai thin kha, Pathian zarah kan class-ah chuan Pakhatna chu ka'n ni ve leh mai thin bawk a! Ka U vang hian High school kan kal laiin zirtirtute duhsakna nasa tak kan dawng a. Kan nihlawh asin..”

Ka thianpa Dindina hian a nau in Doctor a zir chhuah theih nana a inpekna hi hrechiangtu te zingah ka tel a, IAS te hi bei se, a tlin hi ka ring thin zawk a.

 Kohhranah in hmang em em a ni:

Dindina hi UPC kohhran a ni a. A awmna apiangah hruaitu nihna a chelh deuh zel a. An Local Church mai ni lo, Lunglei District leh North East India huapin tunah pawh thalai(PYD) hruaitu pawimawh a ni. UPC a a nihna hi ziak dawn ila ziak fe tham nihna a nei. Heti chunga a hnathawhna a hna thawk tha, hna exam leh thil danga Mizorama ti tha pawl ni chho thei zel hi a chhuanawm tak zet a ni. ADA(Contract Basis) exam ah pakhatna a ni a, Contract Basis-a a thawh mek lai hian ADA Direct (Recruitment) exam lehin pakhatna a ni leh. Kum 7 chuang Accounts Officer(Group A) a thawh hnuah kumin January thla khan Induction hmangin MFAS(Jr. Grade) ah lutin pakhatna a ni a, thla 9 vel a thawh hnuah tunah hian Induction hmang thoin MCS(Jr. Grade) a lut leh ta a ni.

 A nupui Hmuni mawlh hi a fakawm :

High School kan kalpui, a nupui kan thiannu Hmuni hi a fakawm ka ti khawp mai. An  fate pathum hi en reng reng pawh hian  Hmuni hian a enkawl tha tih hi a hriat hliah hliah. Tun hnua ka thianpa ka hmuh na awm chhun chu  North East India huap UPC thalai Inkhawmpui liana stage a a thu leh inkhawm a hruai vel hi a ni deuh ber a. Hetianga a hun a pek theihna. A hna tha taka thawh theihna leh exam tura a inbuatsaihna chhan hi chhangchhe tak chung pawh a a nupui support thatna rah a tih loh theih loh.  chhan hi a nupui

Retheihna leh harsa kara hetiang khawpa hlawhtlinna a hmu hi ka lawmpui tak zet a. A entawn tlak em em ka ti. A in ngaitlawmin a tawng tam lo a,  tumah han rel leh sawi chhiat a neih hi ka hre ngai lo. A dinhmun a hniam leh a san in a danglam lo a. Sawrkarah hna tha tak tak in ziak tlingin thawk mahse in lian leh ropui din a la tum chuang lo. A incheina te hi man to tak a ni ngai lo. Ze nghet tak a nei a, mi pawi sawi hi a hlau em em thin. Hetiang ang mi MCS thianpa Mizoram in kan  nei hi Zoram tan pawh a lawmawm tak zet a ni. Ka thianpa Dindina te ang hi tunlai kan thalai, kan zirlai, nu leh pa te Icon/Idol ni se. Chanchinbu, Youtube, Facebook etc ah te hian retheihna in a bawhbet zo loh, kohhrana in hmang em em chunga hetiang a thlen theihna te hre ve ila. Ngaihthlut tur dik kan hriat chuan hma kan sawn deuh deuh ang.